ތިލަދުންމަތިން ރައީސް ޔާމީނަށް ދޭނެ ވޯޓެއް ނެތް: ޝާހިދު

ހއ. އަތޮޅު ރައްޔިތުން ރައީސް އަބްދުﷲ ޔާމީނަށް ދޭނެ ވޯޓެއް ނެތް ކަމަށާއި ރައްޔިތުން ހަރު އަޑުން ގޮވަނީ ރައީސް ޔާމީނަށް ނޫނެކޭ ކަމަށް މަޖިލީހުގެ ކުރީގެ ރައީސް އަބްދުﷲ ޝާހިދު ރޭ ވިދާޅުވެއްޖެ އެވެ.

އިދިކޮޅު ފަރާތްތަކުން ދިއްދޫގައި ބޭއްވި ޖަލްސާގައި ޝާހިދު ވިދާޅުވީ ރައީސް ޔާމީން ވެރިކަމަށް ވަޑައިގެން ފަހުން ތަކެތީގެ އަގާއި ހިދުމަތްތަކުގެ އަގު ބޮޑުވެފައިވާ ކަމަށެވެ. އަދި ރައީސް ޔާމީންގެ ވެރިކަމުގައި ވައްކަމާއި އަނިޔާވެރިކަމާއި ދަރަނިވީ ބޮޑު ކަމަށް ވެސް ޝާހިދު ވިދާޅުވި އެވެ.

"ކާޑުގެ އަގުވީ ބޮޑު. ތެލުގެ އަގުވީ ބޮޑު. ކަރަންޓުގެ އަގުވީ ބޮޑު. ޓެކްސް ބޮޑުވީ. ކޮރަޕްޝަން ބޮޑުވީ. ވައްކަން އިތުރުވީ. އަނިޔާވެރިކަން އިތުރުވީ. ދަރަނިވީ ބޮޑު. އެއީ މިއަދުގެ ހަގީގަތަކީ،" ޝާހިދު ވިދާޅުވި އެވެ.

ޝާހިދު ވިދާޅުވި ގޮތުގައި ގުޅިފައިވާ ޕާޓީތަކުން "ކަމަރު ބަނދެގެން" ކުރާ މަސައްކަތް ހުއްޓާލާނީ ރައީސް ޔާމީން ބަލިކޮށް، ރައްޔިތުންނަށް ވަމުންދާ ހަރާންކޯރުވުން ހުއްޓުވާފަ އެވެ. އަދި ދިވެހި ރައްޔިތުން އެކަމުގެ ފެޔަށް ނުޖެހި ކުރިއަށް ދާނެ ކަމަށް، ހެންވޭރު އުތުރު ދާއިރާގެ މެމްބަރުކަން ވެސް ކުރައްވާ ޝާހިދު ވިދާޅުވި އެވެ.

ރިޔާސީ ދައުރެއްގެ ހަތަރު އަހަރު ނިމޭއިރު، އެމީހާގެ ދިރިއުޅުމަށް އައީ ކޮން ހެޔޮ ބަދަލެއްތޯ ކޮންމެ މީހަކު ވެސް އެމީހެއްގެ އަމިއްލަ ނަފުސާ ސުވާލު ކޮށްލަން ޖެހޭ ކަމަށް ޝާހިދު ވިދާޅުވި އެވެ. އެގޮތުން ރައްޔިތުންގެ ދިރިއުޅުން ދިޔައީ ފަހަތަށް ކަމަށް ވެސް ޝާހިދު ވިދާޅުވި އެވެ.

ދިވެހިން ބޭނުންވަނީ އަނިޔާވެރިކަމެއް ނެތް ތަނަވަސް ދިރިއުޅުމެއް ކަމަށާއި އެކަން ސަރުކާރަށް ހާސިލް ނުވާކަން ކޮންމެ މީހަކަށް ވެސް ވިސްނާލުމުން އެނގޭނެ ކަމަށް ޝާހިދު ވިދާޅުވި އެވެ.

މި ޖަލްސާގައި އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވެސް ވިދާޅުވީ އަންނަ އަހަރުގެ ރިޔާސީ އިންތިހާބުގައި ގުޅިފައިވާ ޕާޓީތަކުން ރައީސް ޔާމީން ބަލި ކުރާނެ ކަމަށެވެ. އަދި ރައީސް ޔާމީންގެ ވެރިކަމުގައި އަދުލު އިންސާފުގެ ދާއިރާ ތަޣައްޔަރުކޮށްފައިވާ ކަމަށް އޭނާ ވިދާޅުވި އެވެ. އަދި ކޮރަޕްޝަންގެ އަމަލުތައް އިންތިހާއަށް އިތުރުވެފައިވާ ކަމަށް ވެސް ރޮޒެއިނާ ވިދާޅުވި އެވެ.