ސްކޫލުތައް އަންނަ އަހަރު ޑިޖިޓަލައިޒް ކުރަނީ، އޭރުން ސްކޫލަށް ގެންދާނީ ޓެބްލެޓް

ރާއްޖޭގެ ހުރިހާ ސްކޫލުތަކެއް އަންނަ އަހަރު ޑިޖިޓަލައިޒް ކުރާނެ ކަމަށާއި އޭރުން ފޮތް ދަބަހުގެ ބަދަލުގައި ދަރިވަރުން ސްކޫލަށް ގެންދާނީ ޓެބްލެޓް ކޮމްޕިއުޓަރު ކަމަށް ފިނޭންސް މިނިސްޓަރު އަހުމަދުު މުނައްވަރު މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހަށް ދައުލަތުގެ މި އަހަރުގެ ބަޖެޓް ހުށަހަޅުއްވައި ދެއްވަމުން ފިނޭންސް މިނިސްޓަރު ވިދާޅުވީ ތައުލީމީ ދާއިރާ އަށް އަންނަ އަހަރު އިންގިލާބީ ބަދަލެއް ގެންނާނެ ކަމަށެވެ. އެންމެ ބޮޑު ބަދަލެއްގެ ގޮތުގައި އޭނާ ފާހަގަ ކުރެއްވީ ރާއްޖޭގެ ހުރިހާ ސްކޫލެއް ޑިޖިޓަލައިޒްކޮށް، އާ މަންހަޖަށް ކިޔަވައިދޭން ފެށުމެވެ.

މުނައްވަރު ވިދާޅުވި ގޮތުގައި ހުރިހާ ސްކޫލެއް ޑިޖިޓަލައިޒްކޮށް ނިމުމުން، ދަރިވަރުން ބަރު ފޮތް ދަބަހެއް ސްކޫލަކަށް ނުގެންދާނެ އެވެ. އޭގެ ބަދަލުގައި ދަރިވަރުން ބޭނުން ކުރާނީ ލުއި ޓެބްލެޓެއް ކަމަށާއި މި ފަސޭހަ ހުރިހާ ދަރިވަރުންނަށް ވެސް ލިބޭނެ ކަމަށެވެ. ލަފާ ކުރެވޭ ގޮތުން، މި ބަދަލު 2019 ވަނަ އަހަރު ގެންނާނެ އެވެ.

ހުރިހާ ސްކޫލުތަކެއް އަންނަ އަހަރު ޑިޖިޓަލައިޒް ކުރާނެ ފިނޭންސް މިނިސްޓަރު ވިދާޅުވި ނަމަވެސް އެޑިއުކޭޝަން މިނިސްޓްރީން އަދި މިކަން ރަސްމީކޮށެއް އިއުލާނެއް ނުކުރެ އެވެ. އެކަމަކު ޣިޔާސުއްދީން އިންޓަނޭޝަނަލް ސްކޫލު ފަދަ ބައެއް އަމިއްލަ ސްކޫލުތަކުގައި އަންނަ އަހަރު މަތީ ގްރޭޑްތަކުގެ ދަރިވަރުން ފޮތް ދަބަހުގެ ބަދަލުގައި، ހުރިހާ ފިލާވަޅުތަކެއް ހިމެނޭ ލެޕްޓޮޕެއް ބޭނުން ކުރާ ގޮތަށް ވަނީ ހަމަޖައްސައިފަ އެވެ.

މުނައްވަރު މިއަދު އިއުލާން ކުރެއްވި ގޮތުގައި ތައުލީމީ ދާއިރާގެ އެ މަޝްރޫއަށް 154 މިލިއަން ރުފިޔާގެ ބަޖެޓެއް ވަނީ ކަނޑައަޅާފަ އެވެ. އަދި ކިޔަވައިދިނުމާއި ދަރިވަރުންގެ ކިޔެވުމުގެ ފެންވަރު ބެލުމާއި ހޯމްވޯކް، ޒަމާނީ ވައްޓަފާޅީގެ އެއް ހަމައެއްގައި ގެނެސްދޭނެ ކަމަށް މިނިސްޓަރު ވިދާޅުވި އެވެ.

"މި މަޝްރޫއުގެ ދަށުން ޓެކްސްޓް ފޮތްތައް ޗާޕު ކުރުމަށް ކުރާ ހޭދަ މުސްތަގުބަލުގައި ލުއި ކުރެވޭނެ،" އޭނާ ވިދާޅުވި އެވެ.

ރާއްޖޭގެ ގިނަ ސްކޫލުތަކެއްގައި މިހާރު ވެސް ކިޔަވައިދިނުމަށް ސްމާޓް ބޯޑު ފަދަ ޑިޖިޓަލް ގިނަ ވަސީލަތްތަކެއް ބޭނުން ކުރެ އެވެ.