ކްރިސްމަަސް އާއި އާ އަހަރާ ދިމާކޮށް 140 އަށް ވުރެ ގިނަ ޕްރައިވެޓް ޖެޓް ރާއްޖެ އަށް

މިދިޔަ ކްރިސްމަަސް އާއި އާ އަހަރު ފުރުން ފާހަގަކުރަން ހަފުތާއެއް ތެރޭގައި 140 އަށް ވުރެ ގިނަ ޕްރައިވެޓް ޖެޓް ރާއްޖެ އައި ކަމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން މިއަދު ބުނެފި އެވެ.

ރާއްޖޭގެ ޓޫރިޒަމްގެ އެންމެ ބިޒީ ދުވަސްވަރަކީ ޔޫރަޕަށް ފިނި މޫސުން ކަމަށްވާ ނޮވެމްބަރުން އޭޕްރީލް މަހާ ދެމެދެވެ. ހާއްސަކޮށް، ކްރިސްމަސް އާއި އާ އަހަރާ ދިމާކޮށް ގިނަ އަދަދެއްގެ ޓޫރިސްޓުން ރާއްޖެ އާދެ އެވެ. އޭގެ ތެރޭގައި ބޮޑެތި މަހުޖަނުންނާއި މަޝްހޫރު މީހުން ހިމެނެ އެވެ.

ވެލާނާ އިންޓަނޭޝަނަލް އެއާޕޯޓް ހިންގާ ކުންފުނީގެ އިސް އޮފިޝަލަކު ވިދާޅުވީ ކްރިސްމަސް އާއި އާ އަހަރު ފާހަގަކުރަން މިފަހަރު އައި ޖެޓްތައް ކުރިން ލަފާކުރި އަދަދަށް ވުރެ އިތުރު ކަމަށެވެ. އަދި މި އަހަރު އައި ޖެޓްތައް އިތުރުވެފައި، ސައިޒު ވެސް ބޮޑު ކަމަށް އޮފިޝަލް ވިދާޅުވި އެވެ.

އެމްއޭސީއެލްގެ ތަފާސްހިސާބުތައް ދައްކާ ގޮތުން މިދިޔަ ހަފުތާއެއްހާ ދުވަހުގެ ތެރޭގައި އެވްރެޖްކޮށް ދުވާލަކު 17 ޖެޓް ޖެއްސި އެވެ. އެ ކުންފުނިން ކުރިން ލަފާކުރީ ދުވާލަކު 12 ޖެޓް ޖައްސާނެ ކަމަށެވެ.

ޖެނުއަރީ 1 ވީ މިދިޔަ ހޯމަ ދުވަހު 38 ޖެޓް ޖައްސާނެ ކަމަށް އެމްއޭސީއެލް އިން ކުރިން އޮތީ ބުނެފަ އެވެ.

ވެލާނާ އެއާޕޯޓުގައި ޖާގަ ނެތިގެން މީގެ ކުރިން ޖެޓުތައް ޕާކުކުރަން ޑޮމެސްޓިކް ބައެއް އެއާޕޯޓުތަކަށާއި އަވައްޓެރި ގައުމުތަކަށް ވެސް ފޮނުވާފައިވެ އެވެ. އެކަމަކު، އަމިއްލަ ޖެޓުތަކަށް ހާއްސަކޮށް އެއާޕޯޓުގެ އުތުރު ކޮޅުގައި ތަރައްގީ ކޮށްފައިވާ އޭޕްރަން ބޭނުން ކުރަން ފެށުމުން ޖާގަ ވަނީ ތަނަވަސްވެފަ އެވެ. އެތަނުގައި އެއްފަހަރާ 30 ޖެޓް ޕާކުކުރެވެ އެވެ.