އެސްއޯގެ ކުރީގެ ކޮމާންޑަރު ޑީޑީ ހައްޔަރެއް ނުކުރަން، ހާޒިރުކުރީ ތަހުގީގަށް: ފުލުހުން

ފުލުހުންގެ ސްޕެޝަލް އޮޕަރޭޝަންސް (އެސްއޯ)ގެ ކުރީގެ ކޮމާންޑާ، އަބްދުﷲ އިބްރާހިމް (ޑީޑީ) ހައްޔަރު ކޮށްފައިނުވާނެ ކަމަށާއި އޭނާ ފުލުހުންގެ އިދާރާއަށް ހާޒިރު ކުރީ ފުލުހުން ކުރަމުން އަންނަ ތަހުގީގަކާ ގުޅިގެން ކަމަށް ފުލުހުން މިރޭ ބުނެފި އެވެ.

ގއ. ގެމަނަފުށީ ޕޮލިސް ސްޓޭޝަނުގައި މަސައްކަތް ކުރާ ޑީޑީ މިއަދު މާލެ އައީ ފުލުހުންގެ އެނއގުމަށެވެ. ވެލާނާ އިންޓަނޭޝަނަލް އެއާޕޯޓުގައި އޭނާ ހުއްޓައި ފުލުހުން ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. އެއަށް ފަހު ފުލުހުންގެ ލޯންޗަކަށް އަރުވައިގެން ގެންދިޔަ ތަނެއް ނޭންގެ އެވެ. ޑީޑީގެ އާއިލާއިން ބުނީ އޭނާ ހައްޔަރު ކުރީ ކަމަށެވެ.

ނަމަވެސް ފުލުހުންގެ ތަރުޖަމާން އަހުމަދު ޝިފާން ވިދާޅުވީ ޑީޑީ ހައްޔަރު ނުކުރާ ކަމަށާއި އޭނާ ފުލުހުންގެ މަރުކަޒަށް ގެންދިޔައީ ފުލުހުން ތަހުގީގު ކުރަމުން އަންނަ މައްސަލައަކާ ގުޅިގެން މައުލޫމާތު ސާފު ކުރުމަށް ކަމަށެވެ. އެއީ ކޮން މައްސަލައެއް ކަމެއް ޝިފާން ވިދާޅެއްނުވެ އެވެ.

އެނގިފައިވާގޮތުގައި ޑީޑީއަށް ކުރަނީ މިދިޔަ މަހުގެ އެއް ވަނަ ދުވަހު، ސިޔާސީ ލީޑަރުން ހިމެނޭގޮތަށް ނުވަ މީހަކު މިނިވަން ކުރުމަށް ސުޕްރީމް ކޯޓުން ކުރި ހުކުމާ ގުޅިގެން ފުލުހުންގެ ތެރޭގައި ހަމަނުޖެހުން އުފެއްދި ކަމުގެ ތުހުމަތެވެ.

އަދިވެސް ޑީޑީ ހުރީ ފުލުހުންގެ ބެލުމުގެ ދަށުގައިތޯ ނުވަތަ ދޫކޮށްލާފައިތޯ ތަކުރާރުކޮށް ސުވާލު ކުރުމުން ވެސް ޝިފާން އެ ސުވާލަށް ޖަވާބެއް ނުދެއްވި އެވެ.

ފުލުހުން ތަހުގީގު ކުރަމުން އަންނަ މައްސަލައަކަށް ޑީޑީ ފުލުހުންގެ މަރުކަޒަށް ހާޒިރުކޮށްފައިވާއިރު، ސްޕެޝަލް ވެޕަންސް އެންޑް ޓެކްޓިކްސް (ސްވޮޓް) ގެ ކުރީގެ ކޮމާންޑަރު ހުސައިން ސައިފް، އާއި އިތުރު ފަސް ފުލުހަކު މިދިޔަ މަހު ވަނީ ހައްޔަރުކޮށްފަ އެވެ. އޭގެ ތެރެއިން ވަޒީފާއިން ވަކިކޮށްފައިވާ ސައިފް އާއި ޑީޑީ އަކީ ގާތް ދެ މީހުން ކަމަށްވެ އެވެ.