ރައީސްގެ އެކައުންޓަށް ޖަމާވި 1 މިލިއަން ޑޮލަރު އޭސީސީގެ ބެލުމުގެ ދަށަކު ނެތް!

މޯލްޑިވްސް އިސްލާމިކް ބޭންކް (އެމްއައިބީ)ގައި ހުޅުވާފައިވާ ރައީސް އަބްދުﷲ ޔާމީންގެ އެކައުންޓަށް ޖަމާވި 1 މިލިއަން ޑޮލަރު (ގާތްގަނޑަކަށް 15 މިލިއަން ރުފިޔާ) އެންޓި ކޮރަޕްޝަން ކޮމިޝަން (އޭސީސީ)ގެ ބެލުމުގެ ދަށުގައި ހުރި ކަމަށް، ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަހްމަދު ނިހާން ވިދާޅުވި ނަމަވެސް އެ ފައިސާ އެ ކޮމިޝަނުގެ ބެލުމުގެ ދަށުގައި ނެތް ކަމަށް އިތުބާރު ހުރި ފަރާތަކުން "މިހާރު" އަށް ކަށަވަރުކޮށް ދީފި އެވެ.

މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރުސީ) މެދުވެރިކޮށް ހިންގި ބޮޑު ޚިޔާނާތުގައި، ރައީސްގެ އެކައުންޓަށް އެސްއޯއެފް ކުންފުނިން ޖަމާކުރި އެއް މިލިއަން ޑޮލަަރާ ހެދި އެމަނިކުފާނަށް ދަނީ ބޮޑެތި ތުހުމަތުތަކެއް ކުރަމުންނެވެ.

ޕީޕީއެމުން މިއަދު ބޭއްވި ޕްރެސް ކޮންފަރެންސެއްގައި، އެ ފާޑުކިއުންތަކަށް ރައްދު ދެއްވައި ނިހާން ވިދާޅުވީ އެ ފައިސާ ރައީސް ޔާމީން ބޭނުން ނުކުރައްވާ ކަމަށެވެ. އެ ފައިސާ ހުރީ، އޭސީސީގެ ބެލުމުގެ ދަށުން "ފްރީޒްކޮށްފައި" ކަމަށް ވެސް އޭނާ ވިދާޅުވި އެވެ.

ނިހާން މިހެން ވިދާޅުވި ނަމަވެސް "މިހާރު"އާ ވާހަކަ ދެއްކެވި މައުލޫމާތު އެނގިވަޑައިގަންނަވާ ބޭފުޅަކު ވިދާޅުވީ "އޭސީސީގެ ބެލުމުގެ ދަށުގައި އެ ފައިސާ ނެތް" ކަމަށެވެ. އޭސީސީން ތަހުގީގު ނިންމައި މައްސަލަ ފައިލް ކުރިއިރު ވެސް، ފައިސާ ހުރީ ރައީސްގެ އެކައުންޓުގައި ކަމަށް އެ ބޭފުޅާ ވިދާޅުވި އެވެ.

އޭގެ ފަހުން، މިއަދާ ހަމައަށް ވެސް އޭސީސީއަކުން އެ ފައިސާއާ ހަވާލުވެފައެއް ނުވެ އެވެ. އެއީ، އެ މައްސަލައާ ގުޅުން ހުރި މުހިއްމު ބަޔަކާ ސުވާލު ނުކުރެވިގެން، އޭސީސީގެ މުޅި ތަހުގީގު ފުރިހަމަ ނުކޮށް މައްސަލަ ފައިލްކުރަން ޖެހުމުންނެވެ.

އޭސީސީގެ ބެލުމުގެ ދަށުގައި ފައިސާ ހުރި ކަމަށް ވިދާޅުވީ ކީއްވެތޯ "މިހާރު" އިން މިރޭ ސުވާލު ކުރުމުން ނިހާން ވިދާޅުވީ "އަޅުގަނޑު ދެންނެވީ، އެ ފައިސާ ރައީސް ބޭނުން ނުކުރައްވާ ކަން އޭސީސީއަށް އެނގޭނެ ވާހަކަ" ކަމަށެވެ. އޭސީސީގެ ތަހުގީގުގައި، އެއީ އެސްއޯއެފް އިން ޖަމާކުރި ފައިސާ ކަން އެނގުމާއެކު، އެ ފައިސާ ބޭނުން ނުކޮށް އެބަހުރި ކަމަށް ނިހާން ވިދާޅުވި އެވެ.

"އެ ތަހުގީގުގައި ބައެއް މީހުންނާ ސުވާލު ނުކުރެވޭތީއާ އެކު މުޅި ތަހުގީގު ފުރިހަމައެއް ނުކުރެވޭ. އެކަމަކު އެއީ، ކިހިނެއް ރައީސްގެ އެކައުންޓަށް ވަތް ފައިސާކަން އެނގުމާއެކު، އެ ފައިސާ ބޭނުން ނުކޮށް އެބަހުރި. އެކަން އޭސީސީ އަށް އެނގޭ ވާހަކަ އަޅުގަނޑު ދެންނެވީ،" ނިހާން ވިދާޅުވި އެވެ.

ރައީސްގެ އެކައުންޓަށް އެ ފައިސާ ޖަމާކުރީ، ޚިޔާނާތުގެ މައްސަލާގައި ހިމެނޭ ކުރީގެ ނައިބު ރައީސް އަހްމަދު އަދީބު ކަމަށް ވެސް ނިހާން ތުހުމަތު ކުރެއްވި އެވެ.

ފައިސާ ޖަމާވި މައްސަލަ ފައިލްކޮށް، އޭސީސީން ނެރުނު ރިޕޯޓުގައި ބުނީ ރައީސްގެ ޑޮލަރު އެކައުންޓަކަށް ޕްރައިވެޓް ކުންފުންޏަކުން ދެ ފަހަރެއްގެ މަތިން ފައިސާ ޖަމާކޮށްފައިވާ ކަމަށެވެ. އޮކްޓޯބަރު، 13، 2015 ގައި 500،000 ޑޮލަރު ޖަމާކުރުމަށް ފަހު އޮކްޓޯބަރު، 15، 2015 ގައި ވެސް 500،00 ޑޮލަރު ޖަމާކޮށްފައިވާ ކަމަށް ރިޕޯޓުގައިވެ އެވެ.

އޭސީސީން ބުނެފައިވާ ގޮތުގައި އިތުރަށް ކުރިއަށް ގެންދެވެން ނެތިގެން މައްސަލަ ފައިލްކުރީ، ރައީސްގެ އެކައުންޓަށް ފައިސާ ޖަމާކުރި ކުންފުނީގެ ހިއްސާދާރުން ތަހުގީގަށް ހާޒިރުކުރަން ކުރި މަސައްކަތް ކާމިޔާބު ނުވުމުންނެވެ. އެސްއޯފްގެ ހިއްސާދާރުންގެ ގޮތުގައި، އެމްއެމްޕީއާރުސީގެ ހިޔާނާތުގެ ތުހުމަތު ކުރެވޭ މުހައްމަދު އައްލާމް ލަތީފް (މޮހޯ) ހިމެނޭއިރު، އެމްއެމްޕީއާރުސީ ހިޔާނާތުގެ ތަހުގީގު ފެށުމާއެކު އޭނާ ވަނީ ރާއްޖެ އިން ބޭރަށް ގޮސް، ފިލައިފަ އެވެ.

އެމްއެމްޕީއާރުސީ މެދުވެރިކޮށް ރަށްތަކާއި ބިން އަދި ފަޅުތައް ކުއްޔަށް ދީގެން ދައުލަތަށް ލިބެން ޖެހޭ 1.2 ބިލިއަން ރުފިޔާ އަށް ހިޔާނާތްތެރިވެފައިވާ ކަމަށް އޮޑިޓް އޮފީހުގެ ތަހުގީގަށް ފަހު އާއްމުކުރި ރިޕޯޓުގައިވެ އެވެ.