ޑރ. ޒަކަރިއްޔާގެ ދެ ފޮތެއް އައިޔޫއެމް އިން ނެރެފި

ޑރ. އިބްރާހިމް ޒަކަރިއްޔާ މޫސާ ލިޔުއްވި ދެ ފޮތެއް، އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އިން މިއަދު ނެރެފި އެވެ.

ޒަކަރިއްޔާ އަމިއްލައަށް ދިރާސާކުރައްވައިގެން ދިވެހި ބަހުން ލިޔުއްވި "ކީރިތި ގުރުއާނުގެ ދިފާއުގައި" އަދި އޭނާ ދިވެހި ބަހަށް ތަރުޖަމާކުރެއްވި އިސްލާމީ ފައިނޭންސްގެ ފޮތް ނެރެދެއްވީ ޔުނިވާސިޓީގައި ބޭއްވި ރަސްމިއްޔާތެއްގައި އައިޔޫއެމްގެ ޗާންސެލާ ޑރ. މުހައްމަދު ޝަހީމް އަލީ ސައީދެވެ.

އެ ރަސްމިއްޔާތުގައި ވާހަކަދައްކަވަމުން އައިޔޫއެމްގެ ސެންޓާ ފޯ ޕޯސްޓް ގްރެޖުއޭޓްގެ ޑީން ޑރ. ޒަކަރިއްޔާ ވިދާޅުވީ މިހާރު ކިޔަވަމުން އަންނަ ދަރިވަރުންނަށް އެ ދެ ފޮތުން ވަރަށް ބޮޑު އެހީއެއް ލިބޭނެ ކަމަށެވެ. އަދި އެ ދެ ފޮތް ލިޔެ ތައްޔާރުކުރެއްވުމުގެ ތެރޭގައި އޭނާ އަށް ވެސް ވަރަށް ގިނަ މައުލޫމާތުތަކެއް ލިބިވަޑައިގެންނެވި ކަމަށް ވިދާޅުވި އެވެ.

ޗާންސެލާ ޑރ. ޝަހީމް ވިދާޅުވީ އެ ޔުނިވާސިޓީން މިއަދު ނެރުނު ދެ ފޮތަކީ އާއްމު ދިރިއުޅުމަށް ވެސް ބޭނުންތެރި ފޮތަކަށް ވެގެންދާނެ ކަމަށެވެ. އަދި އެކަމުގެ ފައިދާ ގާރީ ކޯހާއި އިމާމު ކޯހުގެ ދަރިވަރުންނާއި އިސްލާމް ޓީޗަރުންނަށް ވަރަށް ބޮޑަށް ކުރާނެ ކަން ފާހަގަކުރެއްވި އެވެ.

ޝަހީމް ވިދާޅުވީ އެ ޔުނިވާސިޓީގެ އަމާޒަކީ އަހަރަކު އެއްފަހަރު އިލްމީ ދިރާސާ ފޮތެއް ނެރުއްވުން ކަމަށެވެ.

އޭނާ ވިދާޅުވީ އައިޔޫއެމްގެ އެންމެ ފުރަތަމަ އެސޯސިއޭޓް ޕްރޮފެސަރަކަށް ޒަކަރިއްޔާ ވެގެންދާނެ ކަމަށެވެ. އެކަމަށް ތަރުހީބު ހޯދުމަށް އެ ޔުނިވާސިޓީގެ ކައުންސިލަށް އަންނަ ހަފުތާގައި ހުށަހަޅުއްވާނެ ކަމަށް ވެސް ޝަހީމް ވިދާޅުވި އެވެ.

ކީރިތި ގުރުއާނުގެ ދިފާއުގެ ފޮތަކީ ޒަކަރިއްޔާ އަމިއްލައަށް ދިރާސާކުރައްވައިގެން ލިޔުއްވި ފޮތެކެވެ. އޭގައި ގުރުއާނާ ބެހޭ މުހިއްމު މައުލޫމާތުތަކެއް ހިމަނާފައި ވެ އެވެ. އައިޔޫއެމްގެ ފޮތް ފިހާރައިން ލިބެން ހުރި އެ ފޮތުގައި 684 ސޮފްހާ ހިމެނެ އެވެ.

އިސްލާމީ މާލީ މުއާމަލާތަށް މަގެއް ފޮތަކީ މުފްތީ މުހައްމަދު ތަގީ އުޘްމާނީ ލިޔުއްވައި، ޒަކަރިއްޔާ ތަރުޖަމާ ކުރެއްވި ފޮތެކެވެ. އިސްލާމިކް ފައިނޭންސާއި ބޭންކިން ދާއިރާއާ ގުޅޭ މުހިއްމު މައުލޫމާތެއް ލިބޭނެ އެ ފޮތުގައި 333 ސޮފްހާ ހިމެނެ އެވެ.

އެ ދެ ފޮތް ވިއްކައިގެން ލިބޭ ފައިސާ ހަރަދުކުރަން ހަމަޖައްސާފައިވަނީ އައިޔޫއެމްގެ ތަރައްގީ އަށެވެ.