ރައީސް ޔާމީންގެ ކެމްޕޭނަށް ވޮލަންޓިއަރުން ހޯދުމުގެ ޕްރޮގްރާމެއް ފަށައިފި

މި އަހަރުގެ ރިޔާސީ އިންތިހާބުގެ ކެމްޕޭނުގައި ރައީސް އަބްދުﷲ ޔާމީންގެ ޓީމާ އެކު ވޮލަންޓިއާކޮށް ކެމްޕޭން ހަރަކާތްތަކުގައި މަސައްކަތްކުރާނެ މީހުން ހޯދުމުގެ ޕްރޮފްރާމެއް ޕީޕީއެމުން ރޭ ރަސްމީކޮށް އިފުތިތާހުކޮށްފި އެވެ.

އެކަން އިއުލާން ކުރީ ރައީސްގެ އަނބިކަނބަކުން ފާތުމަތު އިބްރާހީމް އިސްކޮށް ހުންނަވައިގެން ލ. ގަމުގައި ރޭ ބޭއްވި ކެމްޕޭން ޖަލްސާގަ އެވެ. އެ ޖަލްސާގައި ވޮލަންޓިއާ ޕްރޮގްރާމް އިފުތިތާހުކޮށްދެއްވައި، ފުރަތަމަ ވޮލަންޓިއަރުގެ ގޮތުގައި ރަޖިސްޓްރީކުރީ ވެސް އެ ކަމަނާ އެވެ.

ވޮލަންޓިއަރެއްގެ ގޮތުގައި ރަޖިސްޓްރީވުމުން ލިބޭ ކާޑު ރައީސްގެ އަނބިކަނބަލުންނާ ހަވާލުކުރެއްވީ ރައީސް ޔާމީންގެ ކެމްޕޭން އޮފީހުގެ ފަރާތުން މިފްކޯގެ މެނެޖިން ޑިރެކްޓަރު އަދްލީ އިސްމާއީލެވެ.

ޕީޕީއެމުން ބުނި ގޮތުގައި ހިލޭ ސާބަހަށް ކެމްޕޭން ޕްރޮގްރާމްގައި ރާއްޖޭގެ ހުރިހާ ހިސާބަކުން ވެސް މީހުންނަށް ބައިވެރި ވެވޭނެ އެވެ. އަދި އެކަމަށް ހާއްސަކޮށްފައިވާ ނަމްބަރަށް މައުލޫމާތު މެސެޖް ކުރުމުން ވޮލަންޓިއަރަކަށްވުމުގެ ފުރުސަތު ލިބޭނެ އެވެ.

ޕީޕީއެމުން ބުނި ގޮތުގައި ކުރިއަށް އޮތް ރޯދަ މަހަށް ފަހު، ރައީސް ޔާމީންގެ ކެމްޕޭން ހަރަކާތްތައް މުޅި ރާއްޖޭގައި ފުޅާ ކުރާނެ އެވެ.