މޯލްޑިވިއަންގެ ބޯޓަށް މައްސަލަ ޖެހި 80 މީހުން ރާއްޖެ ނާދެވިފައި

އިންޑިއާގެ، ޓްރިވަންޑްރަމުން މިއަދު މާލެ އައުމަށް ހަމަޖެހިފައި އޮތް، މޯލްޑިވިއަންގެ ފްލައިޓަކަށް ޓެކްނިކަލް މައްސަލައެއް ދިމާވެ، އެ ފްލައިޓުން ދަތުރުކުރަން ހަމަޖެހިފައިވާ 80 މީހުންނަށް މާލެ ނާދެވި މަޑުކުރަން ޖެހިއްޖެ އެވެ.

އައިލެންޑް އޭވިއޭޝަނުގެ ހެޑް އޮފް އެޑްމިނިސްޓްރޭޝަން އަލީ ނަޝާތު މިރޭ ވިދާޅުވީ މައްސަލަ ދިމާވެފައިވަނީ އެއާބަސް 321 މަރުކާރުގެ، 200 މީހުންގެ ޖާގައިގެ ބޯޓަށް ކަމަށެވެ. އެބޯޓު ޓްރިވަންޑްރަމުން މާލެ އަށް ފުރުމަށް ހަމަޖެހިފައި އޮތީ މިއަދު ހެނދުނު 10:30 ގަ އެވެ.

ބޯޓަށް މައްސަލަ ދިމާވުމުގެ ސަބަބުން ރާއްޖެ ނާދެވި ތިބި ފަސިންޖަރުންނަށް ހުރުމާއި ކެއުން ހަމަޖައްސައި ދީފައިވާ ކަމަށް ނަޝާތު ވިދާޅުވި އެވެ. އަދި ވަރަށް އަވަހަށް މައްސަލަ ހައްލު ކުރެވޭނެ ކަމަށް ވެސް އޭނާ ވިދާޅުވި އެވެ.

"އަޅުގަނޑުމެން މަސައްކަތް މިކުރަނީ ވީހާ ވެސް އަވަހަކަށް މައްސަލަ ހައްލުކޮށް ފްލައިޓް ބޭއްވުމަށް. އަޅުގަނޑުމެން ވާނީ ހުރުމާއި ކެއުން ހަމަޖައްސައިދީފަ،" ނަޝާތު ވިދާޅުވި އެވެ.

ދަރިންނަށް ކިޔަވައިދިނުމަށާއި ބޭސްފަރުވާގެ ކަންތަކަށް ގިނަ އަދަދެއްގެ ދިވެހިން އަބަދު ވެސް ޓްރިވަންޑްރަމްގައި ތިބެ އެވެ.

މޯލްޑިވިއަން އިން ބޭރުގެ ދަތުރުތަކުގައި އާންމުކޮށް ބޭނުން ކުރަމުނީ އެއާބަސް 321 މަރުކާރުގެ، 200 މީހުންގެ ޖާގައިގެ ބޯޓަކާއި، އެއާބަސް 320 މަރުކާގެ، 150 މީހުންގެ ޖާގައިގެ ބޯޓެކެވެ.