އަލުން ރެޖިސްޓަރީ ނުކުރި މަޖޫރީންގެ ހުއްދަތައް ބާތިލްވެއްޖެ

ސަރުކާރުން ކަނޑައެޅި އަގަށް މާލޭ ކޮމާޝަލް ހާބަރުގައި މުދާ ހުސް ކުރާނެ މަޖޫރީން އަލުން ރެޖިސްޓަރީ ވާން ދިން މުއްދަތުގައި އެކަން ނުކުރި މަޖޫރީންގެ ހުއްދަތައް މިއަދުން ފެށިގެން ބާތިލްވެއްޖެ އެވެ.

ކޮމާޝަލް ހާބަރު ހިންގާ މޯލްޑިވްސް ޕޯޓްސް ލިމިޑެޓް (އެމްޕީއެލް) އިން މަޖޫރީންތައް އަލުން ރެޖިސްޓަރީ ވާން އެންގީ ކޮމާޝަލް ހާބަރުން މުދާ ހުސް ކުރުމުގެ އަގު މި މަހުން ފެށިގެން ސަރުކާރުން ކޮންޓްރޯލް ކުރުމުންނެވެ. އަގު ކޮންޓްރޯލް ކުރުމުން އެމްޕީއެލް އިން ވަނީ ސަރުކާރުން ކަނޑައެޅި އަގަށް މުދާ ހުސް ކުރާނެ މަޖޫރީން އަލުން ރެޖިސްޓަރީ ވާން އަންގައިފަ އެވެ.

އެމްޕީއެލް އިން މިއަދު ނެރުނު އިއުލާނެއްގައި ވަނީ އަލުން ރެޖިސްޓަރީ ވާން ދިން ހަތް ދުވަހުގެ މުއްދަތު ހަމަވެފައިވާތީ، މިހާތަނަށް ރެޖިސްޓަރީ ވާން ހުށަނާޅާ ފަރާތްތަކުގެ ހުއްދަތައް ބާތިލްވެފައިވާ ކަމަށެވެ. އެކަމަކު މަޖޫރީންގެ ގޮތުގައި މަސައްކަތް ކުރުމަށް އަލަށް ރެޖިސްޓަރީ ކުރި މީހުންގެ އަދަދެއް އެމްޕީއެލް އަކުން ނުބުނެ އެވެ.

މަޖޫރީން މުދާ ހުސްކޮށްދޭ އަގު ސަރުކާރުން ކޮންޓްރޯލް ކުރީ މި މަހުން ފެށިގެން މާލޭގައި ދުވާލުގެ ވަގުތުތަކުގައި މުދާ އުފުލުން ސަރުކާރުން މަނާ ކުރުމާ ގުޅިގެން މަޖޫރީން މުދާ ހުސްކުރަން ނަގާ އަގު ބޮޑު ކުރުމުންނެވެ. ސަރުކާރުން މިހާރު ވަނީ މެންދަމުގެ ވަގުތުތަކާއި އެ ނޫން ވަގުތުތަކުގައި މުދާ ހުސްކުރަން ނެގޭނެ އެންމެ މަތީ އަގު ކަނޑައަޅައި، އިއުލާން ކޮށްފަ އެވެ.