މަޖިލީހުގެ ޗުއްޓީ ދިގުކޮށް ޖަލްސާތައް ރޯދައިގެ ފަހުން

ރައްޔިތުންގެ މަޖިލިހުގެ މި އަހަރުގެ ފުރަތަމަ ދައުރަށް ފަހު ލިބުނު އެއް މަސް ދުވަހުގެ ޗުއްޓީ އިތުރު ދެ ހަފުތާއަށް ދިގުކޮށް، ރޯދައިގެ ފަހުން ޖަލްސާތައް ފަށަން ނިންމައިފި އެވެ.

މަޖިލީހުގެ ގަވައިދު ބުނާ ގޮތުން ދެވަނަ ދައުރު ކުރިއަށް ދާނީ މި މަހުގެ ފުރަތަމަ ހަފުތާ އިން ފެށިގެން އޮގަސްޓް މަހުގެ ނިޔަލަށެވެ.

މަޖިލީހުގެ ޖަލްސާތައް ބެހިގެންވާ ތިން ދައުރުގެ ތެރެއިން ކޮންމެ ދައުރެއްގެ ވެސް ފުރަތަމަ ޖަލްސާ ބާއްވަން ޖެހޭނީ އެ ދައުރެއް ފެށޭ ތާރީހާ ވިދިގެން އަންނަ ފުރަތަމަ ހޯމަ ނުވަތަ ފުރަތަމަ ބުރާސްފަތި ދުވަހު ކަމަށް ވެސް ގަވައިދުގައި ބުނެފައިވެ އެވެ. އެގޮތުން ދެ ވަނަ ދައުރުގެ ޖަލްސާތައް މިދިއަ ހޯމަ ނުވަތަ މިއަދު ފަށަން ޖެހެ އެވެ.

އެކަމަކު ވެރިކަން ކުރާ އަދި މަޖިލިސް ކޮންޓްރޯލްކޮށްގެން އުޅޭ ޕީޕީއެމްގެ ބައެއް މެމްބަރުން "މިހާރު" އަށް ވިދާޅުވީ ދެވަނަ ދައުރުގެ ޖަލްސާތައް ފަށާނީ އީދަށް ފަހު ކަމަށެވެ. އެކަމަކު ތާރީހެއް އަދި ކަނޑައަޅާފައި ނުވާ ކަމަށް އެ މެމްބަރުން ވިދާޅުވި އެވެ.

"މެމްބަރުން އަޅުކަމުގައި ގިނަ ވަގުތު ހޭދަކުރަން ފުރުސަތު ދިނުމުގެ ގޮތުން ރޯދަ މަހު ޖަލްސާތައް ނުބާއްވަނީ. އެކަމަކު ރޯދައިގެ ފަހުން ޖަލްސާތައް ފަށާނެ،" މެމްބަރަކު ވިދާޅުވި އެވެ.

މި އަހަރުގެ ފުރަތަމަ ދައުރުގައި ބޭއްވީ އެންމެ 13 ޖަލްސާ އެވެ. އެއީ ދައުރުން ބޭރުގައި ބޭއްވި ހާއްސަ ދެ ޖަލްސާއަކާއި ދައުރުގެ 11 ޖަލްސާ އެވެ. ނިމިގެން ދިޔަ ދައުރަކީ އެންމެ މަދުން ޖަލްސާތައް ބޭއްވި އެއް ދައުރެވެ. ފުރަތަމަ ދައުރުގައި މާ ބޮޑެތި މަސައްކަތްތަކެއް މަޖިލީހުގައި ނުހިނގަ އެވެ. އަދި ފުރަތަމަ ދައުރުގެ މަސައްކަތްތައް ނިންމާލީ އިދިކޮޅު އެއްވެސް މެމްބަރެއްގެ ބައިވެރިވުމެއް ނެތި އެވެ.

މަޖިލީހުގައި މެމްބަރުން އެކަށީގެންވާ މަސައްކަތެއް ނުކުރައްވާތީ ގިނަ ބައެއްގެ ފާޑު ކިޔުން އަބަދުވެސް މަޖިލީހަށް އަމާޒުވެ އެވެ. ޕީޕީއެމްގެ ބައެއް މެމްބަރުން ވިދާޅުވީ ޖަލްސާތައް އެކަށީގެންވާ ގޮތެއްގައި ނުބޭއްވެނީ އިދިކޮޅު މެމްބަރުންގެ ބައިވެރިވުމާ އެކު، ފާސްކުރަން ޖެހޭ ބިލްތަކެއް ހުރުމުން ކަމަށެވެ.

އެކަމަކު އިދިކޮޅު ފަރާތްތަކުން އެކަމަށް ރައްދު ދީ ބުނަމުން އަންނަނީ އިދިކޮޅު 12 މެމްބަރަކަށް މަޖިލީހަށް ނުވަދެވުމާއި މަޖިލީހުގެ ރައީސްގެ މަގާމުގައި އަބްދުﷲ މަސީހް އިންނަވައިގެން ކުރިއަށް ގެންދާ ނަމަ، ޖަލްސާތައް ސައްހަނުވާނެ ކަމަށެވެ.

އިދިކޮޅު 12 މެމްބަރުންގެ ގޮނޑި ގެއްލުނު ކަމާ މެދު ހިލާފު އުފެދިފައިވާ މައްސަލަ ސުޕްރީމް ކޯޓުގައި އޮތް އިރު، އެ މައްސަލައިގައި އަދިވެސް ގޮތެއް ނުނިންމަ އެވެ.