ފަރްދީން ޚާން މާބޮޑަށް ފަލަވުމުން މަލާމާތްކުރާ މީހުން ގިނަވެއްޖެ

ފަރުދީން ޚާންގެ ބޮލީވުޑް ކެރިއަރުގައި އެއްވެސް އިރެއްގައި މާބޮޑު ކާމިޔާބެއް ހޯދިފައެއް ނެތެވެ. އެންމެ ފަހުން އޭނާގެ ތަރިން މަޑުމަޑުން ފަނޑުވަމުން ގޮސް ގެއްލުނީ އެވެ. އޭނާގެ އެންމެ ފަހުގެ ފިލްމަކީ 2010 ގައި ނުކުތް "ދުލްހާ މިލްގަޔާ" އެވެ. އޭގެ ފަހުން ފަރުދީން އެއްވެސް ފިލްމަކުން މިހާތަނަކަށް ނުފެނެ އެވެ.

ހައެއްކަ އަހަރު މީހުންގެ ލޯތަކަށް ނުފެނި ހުރުމަށްފަހު ދާދިފަހުން ފަރުދީންގެ ފޮޓޯތަކެއް އާއްމުވުމާއެކު ސޯޝަލް މީޑިއާގައި އޭނާއާ ދިމާކޮށް މަލާމާތްކުރުމުގައި ބައެއް މީހުން ހައްދުން ނެއްޓުނެވެ. ސަބަބަކީ މީގެ ހަ އަހަރު ކުރިން ފެނުނު ފަރްދީން އާ އަޅާބަލާއިރު މިހާރު އޭނާ މާބޮޑަށް ފަލަވެ ސިފަ ހުތުރުވެފައި ވާތީ އެވެ.

ފަރްދީން، 42، އާ ދިމާލަށް މީހުން ތަފާތު މަލާމާތްތައް ކުރަން ފެށުމުން އެކަމާ ބަޔަކު ހިތްހަމަނުޖެހުނަސް އަނެއް ބަޔަކަށް ވީ ބޮޑު މަޖަލަކަށެވެ.

ގިނަ ބަޔަކު ފަރުދީން އަށް މަލާމާތުގެ ބަސްތައް ރައްކުރަމުން ދިޔައިރު ދަ ސައިލެންޓް އިންޑިއަންގެ ނަމުގައިވާ ޓުވިޓާ އެކައުންޓަކުން ޓުވީޓް ކުރި މީހާ ވަނީ ފަރްދީން އަށް މަލާމާތްކުރާ މީހުންނަށް ރައްދު ދީފަ އެވެ. އެމީހާ ބުނެފައިވާ ގޮތުގައި ވިހައިގެން ނުކުންނަ އަންހެނުންގެ ހަށިގަނޑު ހުންނަ ގޮތަށް މީހުން މަލާމާތް ނުކުރާއިރު ފަރުދީންގެ ހަށިގަނޑު ހުރި ގޮތަށް މަލާމަތްކުރަން ނުޖެހޭ ކަމަށާއި ޕިއްޒާ ކައިގެން ފަލަވުމަކީ އޭނާގެ އަމިއްލަ ކަމެއް ކަމަށެވެ.

މި ނޫނަސް ފަރުދީން އަށް ތާއީދުކޮށްފަޔާއި މަލާމާތްކޮށްފައި ގިނަ ބަޔަކު ޓުވީޓްތައް ކޮށްފައިވެ އެވެ.