މޯލްޑިވިއަންގެ ސީ ޕްލޭންގެ ޚިދުމަތަށް ހަތަރު އަހަރު ފުރިއްޖެ

މޯލްޑިވިއަންގެ ސީ ޕްލޭންގެ ޚިދުމަތަށް މިއަދު ހަތަރު އަހަރު ފުރިއްޖެ އެވެ.

ރާއްޖޭގައި ވައިގެ ދަތުރުފަތުރުގެ ޚިދުމަތް ދޭ ސަރުކާރުގެ ކުންފުނީގެ ސީ ޕްލޭން އޮޕަރޭޝަނަށް ހަތަރު އަހަރު ފުރުނުއިރު، ކަނޑަށް ޖައްސާ މަތިންދާބޯޓު ދުއްވަން އެ ކުންފުނިން ފެށީ އެންމެ ދެ ސީ ޕްލޭނާ އެކު އެވެ. އެކަމަކު، މޯލްޑިވިއަނުން 11 ސީ ޕްލޭން ބޭނުންކޮށްގެން 13 ތަނަކަށް މިހާރު ދަތުރުކުރެ އެވެ.

އެ ކުންފުނިން ބުނިގޮތުގައި، ސީ ޕްލޭންގެ ޚިދުމަތާ ހަމައަށް ދަތުރުކުރެވުނީ ވަރަށް ގިނަ ދުވަހުންނެވެ. އެގޮތުން، އެ ކާމިޔާބީ ހާސިލް ކުރެވުނީ، ޑޮމެސްޓިކް ދަތުރުތައް ފެށުމަށް ފަހު، އަދި ބައިނަލްއަގްވާމީ ދަތުރުތައް ވެސް ކުރަމުން ކަމަށް މޯލްޑިވިއަނުން ބުނެ އެވެ.

"އަޅުގަނޑުމެންގެ މި ހިދުމަތަށް ހަތަރު އަހަރު ފުރުން ފާހަގަކުރާއިރު، އަޅުގަނޑުމެންގެ ހުރިހާ ކްލަޔަންޓުންނަށާއި ކަސްޓަމަރުން، ޕާޓްނަރުން އަދި އަޅުގަނޑުމެންގެ ހިތްވަރުގަދަ މުވައްޒަފުންނާއި މެނޭޖްމަންޓުން ހުއްޓުމެއް ނެތި ކުރާ މަސައްކަތް ފާހަގަކޮށް، ޝުކުރު އަދާކުރަން. އަދި މި މަސައްކަތަށް ރައީސް އަބްދުﷲ ޔާމީން ދެއްވާ އެއްބާރުލުމާއި އެހީތެރިކަން ފާހަގަކުރަން،" މޯލްޑިވިއަނުން ބުންޏެވެ.

އައިލެންޑް އޭވިއޭޝަންގެ ނަމުގައި ސަރުކާރުން 2000 ވަނަ އަހަރު އުފެއްދި ކުންފުނިން ހިދުމަތް ފަށައިގަތީ އެންމެ ދެ ބޯޓާ އެކު އެވެ. ނަމަވެސް އެ ކުންފުނީގައި މިހާރު 23 ބޯޓު ބޭނުންކުރެ އެވެ. އަދި އެ އަންނަނީ ކާގޯ އާއި ޓްރެވަލްގެ ޚިދުމަތާއި އެއާޕޯޓުތައް ވެސް ހިންގަމުންނެވެ.