ރައީސް ޔާމީނަށް ބިރު ދެއްކި ކަމަށް ބުނާ މައްސަލާގައި ދައުވާ ނުކުރަން ނިންމައިފި

ރައީސް އަބްދުﷲ ޔާމީނަށް ސޯޝަލް މީޑިއާ ގައި ބިރު ދެއްކި ކަމަށް ބުނާ މައްސަލާގައި ދައުވާ ނުކުރަން ނިންމައި އެ މައްސަލަ ފުލުހުން ފައިލްކޮށްފި އެވެ.

ރައީސް ޔާމީނަށް ބިރު ދެއްކި ކަމަށް ބުނެ ލ. ގަން، ތުނޑި، ހުދުވިލާގޭ މުހައްމަދު އަދުހަމްގެ މައްޗަށް ފުލުހުން ތުހުމަތު ކުރި ނަމަވެސް، ފުލުހުން އިއްޔެ އޭނާ އަށް ފޮނުވި ލިޔުމުގައި ވަނީ އެ މައްސަލާގައި ޖިނާއީ ދައުވާ ކުރެވޭ ވަރަށް ހެކި ލިބިފައި ނެތް ކަމަށެވެ. އެހެންވެ، އެ މައްސަލަ ފައިލް ކުރަން ނިންމާފައިވާ ކަމަށް އަދުހަމަށް ފޮނުވި ލިޔުމުގައި ފުލުހުން ބުންޏެވެ.

އަދުހަމަށް ތުހުމަތު ކޮށްފައިވަނީ މިދިޔަ ޖޫން މަހުގެ 24 ވަނަ ދުވަހު އޭނާ ކުރި ޓްވީޓެއްގެ މައްސަލަ އެވެ. އެ ޓްވީޓުގައި އޭނާ ރައީސް ޔާމީނަށް ގޮވާލާފައި ވަނީ ސިޔާސީ ބައެއް ބޭފުޅުން މިނިވަން ނުކޮށް، ޕީޕީއެމްގެ ޑޯޓުޑޯ ކެމްޕެއިނަށް އަދުހަމްގެ އަށް ގޮސް ދޮރުގައި ޓަކި ނުދިނުމަށެވެ. އެގޮތަށް ޓަކި ދީފި ނަމަ، ރައީސް ޔާމީންގެ އިސްތަށިފުޅަށް ގެއްލުންވާ މިންވަރަށް އޭނާ ޓަކި ޖަހާނެ އަދުހަމްގެ ޓްވީޓުގައި ވެ އެވެ.

އެ މައްސަލައިގެ ތުހުމަތަށް އަދުހަމްގެ ފޯނާއި އިލެކްޓްރޯނިން ޑިވައިސްތައް ވެސް ހިފަހައްޓާފައި ވެ އެވެ.