ރާއްޖޭގެ އިންތިހާބުގެ އެއްވެސް ކަމެއްގައި އދ. އިން ބައިވެރިއެއް ނުވާނެ!

ކުރީގެ ރިޔާސީ އިންތިހާބުތަކުގައި އިލެކްޝަންސް ކޮމިޝަނަށް އެކި ގޮތްގޮތުން އެހީވި ނަމަވެސް އަންނަ މަހު ބާއްވާ އިންތިހާބުގެ އެއްވެސް ކަމެއްގައި އދ. އިން ބައިވެރިނުވާ ކަމަށް ބުނެފި އެވެ.

އދ. އިން ރާއްޖެއަށް ކަނޑައަޅާފައިވާ ރެސިޑެންޓް ކޯޑިނޭޓާގެ އޮފީހުގެ ފަރާތުން ވާހަކަ ދެއްކެވި އައިމިނަތު ހުދާ "މިހާރު" އަށް ވިދާޅުވީ އިންތިހާބު އޮބްޒާވް ކުރުމުގައި ނުވަތަ އެކި ގޮތްގޮތުން އިންތިހާބަށް އެހީ ފޯރުކޮށްދިނުން ފަދަ އެއްވެސް ކަމެއްގައި އދ. އިން މިފަހަރު ބައިވެރި ނުވާނެ ކަމަށެވެ.

"އދ. ގެ ސެކިއުރިޓީ ކައުންސިލުން ނިންމަން ޖެހޭ މިފަދަ ކަންކަމުގައި ބައިވެރިވާ ނަމަ. [ރިޔާސީ އިންތިހާބާ ގުޅޭ އެއްވެސް ކަމެއްގައި ބައިވެރިވާން] ސެކިއުރިޓީ ކައުންސިލުން ފާސްކޮށްފައެއް ނެތް،" ހުދާ ވިދާޅުވި އެވެ.

އަންނަ ސެޕްޓެމްބަރު، 23ގައި، ބާއްވާ ރިޔާސީ އިންތިހާބުގެ އެއްވެސް ކަމެއްގައި ބައިވެރިނުވާން އދ. އިން ނިންމި އިރު، އދ. ގެ ޕޮލިޓިކަލް އެފެއާސް ޑިޕާޓްމަންޓުގެ އެސިސްޓެންޓް ސެކްރެޓަރީ ޖެނެރަލް މިރޯސްލާވް ޖެންކާ ވަނީ މިދިޔަ ހަފްތާގައި ރާއްޖެ ވަޑައިގެން، ރައީސް އަބްދުﷲ ޔާމީންގެ އިތުރުން އިދިކޮޅު ފަރާތްތަކާ ވެސް ބައްދަލުކުރައްވައިފަ އެވެ.

އެ ބައްދަލުވުމަށް ފަހު އދ. އިން ބުނެފައި ވަނީ ކުރިއަށް އޮތް ރިޔާސީ އިންތިހާބާ ގުޅޭ ގޮތުން ރައީސް ޔާމީން އަދި އެމަނިކުފާނުގެ ކެބިނެޓް މެންބަރުންނާ އެކު "ހަރުދަނާ މަޝްވަރާތަކެއް" ކުރެއްވި ކަމަށެވެ.

ޖެންކާ އާއި ރައީސް ޔާމީންގެ ބައްދަލު ކުރެއްވުމަށް ފަހު ރައީސް އޮފީހުން ބުނެފައި ވަނީ "މިނިވަން އަދި އިންސާފުވެރި ރިޔާސީ އިންތިހާބެއް ބޭއްވުމަށް އިލެކްޝަންސް ކޮމިޝަނަށް އެހީތެރިވެދިނުމަށް ތައްޔާރަށް ކަމަށް" އދ. އިން ބުނެފައިވާ ކަމަށެވެ.

އދ. އިން ރާއްޖޭގައި ކުރާ މަސައްކަތްތަކުގެ މައުލޫމާތު ހުރި ބޭފުޅަކު، ނަން ނުޖަހާ ގޮތަށް، ވިދާޅުވީ މީގެ އަހަރެއްހާ ދުވަސް ކުރިން އދ. ޕޮލިޓިކަލް އެފެއާޒް ޑިޕާޓްމަންޓުން ރާއްޖޭއާ ބެހޭ އެސެސްމަންޓެއް ހަދާފައިވާ ކަމަށާއި އިންތިހާބުގައި ބައިވެރިނުވުމުގެ ވިސްނުން އައީ އެ ހިސާބުން ކަމަށެވެ. އެގޮތުން އދ. އިން އެއްބާރުލުން ދޭން ޖެހޭ ފަދަ "މާހައުލެއް ރާއްޖޭގައި ނެތް" ކަމަށް އެ އެސެސްމަންޓުން ދެއްކި ކަމަށް ވެސް އޭނާ ވިދާޅުވި އެވެ.

"މިއީ އދ. އިން އިންތިހާބު މޮނީޓާ ކުރުން ފަދަ ކަންކަން ކުރުމުގެ ކުރިން އެ ޖަމިއްޔާއިން ހަދަން ޖެހޭ އެސެސްމަންޓެއް. މި އެސެސްމެންޓް ހެދުމަށް ފަހު އެ މީހުން ނިންމީ އދ. އިން އިންތިހާބަށް އެއްބާރުލުންދޭނެ ފަދަ މާހައުލެއް ރާއްޖޭގައި ނެތް ކަމަށް،" އޭނާ ބުންޏެވެ.

މީގެ ކުރިން 2013 ގައި ރާއްޖޭގައި ބޭއްވި ރިޔާސީ އިންތިހާބުގައި އދ. އިން ވަނީ ބޮޑު އެހީތެރިކަމެއް ފޯރުކޮށްދީފަ އެވެ. އެގޮތުން ވޯޓުލާ މީހުން ހޭލުންތެރިކުރުމުގެ ގައުމީ މަޝްރޫއަކާއި ޓްރެއިނަރުން ޓްރެއިން ކުރުމުގެ ޕްރޮގްރާމަކާއި ޒުވާނުންނަށް ހާއްސަކޮށް ވެސް ޕްރޮގްރާމްތަކެއް، އިލެކްޝަންސް ކޮމިޝަނާ ގުޅިގެން ހިންގާފައިވެ އެވެ.