ބަންދުގައި ތިބި އަންހެން އެކްޓިވިސްޓުންނަށް ސައުދީން މަރުގެ އަދަބު ދޭން އުޅެނީ

ރިޔާޒް (އޮގަސްޓް 23) - ބަންދުކޮށްފައި މިހާރު ތިބި އަންހެން ފަސް އެކްޓިވިސްޓަކަށް މަރުގެ އަދަބު ދިނުމަށް ސައުދީ އަރަބިއާގެ ޕަބްލިކް ޕްރޮސެކިއުޓަރު މަސައްކަތް ކުރަމުންދާ ކަމަށް ހިއުމަން ރައިޓްސް ވޮޗް (އެޗްއާރްއެމް) އިން ބުނެފި އެވެ.

މަރުގެ އަދަބު ދޭން އުޅޭ މީހުންގެ ތެރޭގައި އަންހެނުންގެ ހައްގުތަކަށް ވަކާލާތު ކުރަމުން ގެންދާ އިސްރާ އަލްޣުމްޣާމް ހިމެނޭ ކަމަށް ވެސް ބުނެފައިވެ އެވެ. ޣުމްޣާން ވެގެން ދާނީ އިންސާނީ ހައްގުތަކާ ގުޅޭ ގޮތުން އަޑު އުފުލައިގެން މަރުގެ އަދަބު ދެވޭ ފުރަތަމަ ސައުދީ އަންހެނާ ކަމަށް ކަމަށް ވެސް ބުނެފައިވެ އެވެ.

އެޗްއާރްއެމް ބުނީ އިންސާނީ ހައްގުތަކަށް މަސައްކަތް ކުރާ އެކްޓިވިސްޓުންނަށް މަރުގެ އަދަބު ދިނުމަކީ ސައުދީގައި ގާއިމް ވެގެންދާނެ ނުބައި އިޖްރާއަތެއް ކަމަށެވެ.

މިދިޔަ މެއި މަހުގެ ފަހުން ސައުދީގައި 13 އަންހެން އެކްޓިވިސްޓުން ހައްޔަރުކޮށްފައިވާ ކަމަށްވެ އެވެ. އޭގެ ތެރޭން ބައެއް މީހުން ވަނީ ދޫކޮށްލައިފަ އެވެ. އަނެއް ބަޔަކު އަދިވެސް ތިބީ ޖަލުގަ އެވެ.

ޣުމްޣާމް އަކީ 2001 ވަނަ އަހަރުން ފެށިގެން އީސްޓަން ޕްރޮވިންސްގެ ގާތިފް ޓައުނުގައި ސައުދީ ސަރުކާރާ ދެކޮޅަށް އަޑުއުފުލުމުގައި ފާހަގަކޮށްލެވޭ ފަރާތެކެވެ. ޣުމްޣާމް އާއި އޭނާގެ ފިރިމީހާ ހައްޔަރުކޮށްފައިވާ ކަމަށް ބެލެވެނީ ޑިސެމްބަރު 2015 ގަ އެވެ. އެ މީހުން މިހާރު ތިބީ ދައްމާމުގެ އަލް މަބާހިތު ޖަލުގައި ކަމަށްވެ އެވެ.

ސައުދީ ޕަބްލިކް ޕްރޮސެކިއުޓާ ތުހުމަތު ކުރާ ގޮތުގައި ޣުމްޣާމް އާއި އަނެއް ހަތަރު އެކްޓިވިސްޓުން ވަނީ ގާތިފްގައި އިހްތިޖާޖްކޮށް، ދައުލަތާ ދެކޮޅު އަމަލު ހިންގާ، ހަމަނުޖެހުމަށް ހިތްވަރުދީ، އަދި ސަރުކާރާ މެދު އާއްމުން ރުޅިއެރުވުމަށް މަސައްކަތް ކޮށްފަ އެވެ. އެޗްއާރްޑަބްލިއު އިން ބުނެފައި ވަނީ ޕަބްލިކް ޕްރޮސެކިއުޓަރު އުޅެނީ ޝަރީއަތުގައި އެ ފަސް އަންހެނުން މަރުގެ އަދަބު ދިނުމަށް ބާރު އެޅުމަށް ކަމަށެވެ.

"އިސްރާ އަލް ޣުމްޣާމް ފަދަ ހަމަނުޖެހުން އުފައްދަން މަސައްކަތް ކޮށްފައި ނުވާ އެކްޓިވިސްޓުންގެ މައްޗަށް މަރުގެ އަދަބު ދޭން އުޅުމަކީ ވަރަށް ނުރައްކާތެރި، ނުބައި ކަމެއް،" އެޗްއާރްޑަބްލިއުގެ މެދުއިރުމަތީގެ ޑިރެކްޓަރު ސާރާ ލިއާ ވިޓްސަން ނެރުނު ބަޔާނެއްގައި ބުނެފައިވެ އެވެ.

އެޗްއާރްޑަބްލިއު އިން ބުނީ ފަސް އެކްޓިވިސްޓުންގެ ޝަރީއަތުގެ އަޑުއެހުމެއް އޮކްޓޯބަރު 28 ވަނަ ދުވަހު ބާއްވަން ހަމަޖައްސާފައިވާ ކަމަށެވެ. އެ މީހުންގެ މައްސަލަ ބަލަނީ ޓެރަރިޒަމްގެ މައްސަލަތައް ބަލަން 2008 ވަނަ އަހަރު އުފެއްދި ސްޕެޝަލައިޒްޑް ކްރިމިނަލް ކޯޓް (އެސްސީސީ) އިންނެވެ.

ސައުދީގެ އިންސާނީ ހައްގުތަކުގެ މައްސަލަތައް ބަލާ ދިރާސާ ކުރަން ލަންޑަނުގައި ހިންގާ ޔޫރަޕިއަން ސައުދީ އޮގަނައިޒޭޝަން ފޯ ހިއުމަން ރައިޓްސް އެންޑް އަލްގަސްތު އިން ވަނީ ޣުމްޣާމްގެ މައްޗަށް އުފުލާފައިވާ ދައުވާ އުވާލުމަށް ގޮވާލައިފަ އެވެ.

ޣުމްޣާމްގެ ޝަރީއަތާ ގުޅޭ ގޮތުން ސައުދީ ސަރުކާރުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.