އެމްއާރުޑީސީގެ އިސްވެރިން ހާޒިރުކުރުމަށް ފަހު މާލިއްޔަތު ކޮމެޓީ ސިއްރުކޮށްފި

މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ)ގެ އިސްވެރިން ރައްޔިތުންގެ މަޖިލީހުގެ މާލިއްޔަތު ކޮމެޓީއަށް ހާޒިރުކުރުމަށް ފަހު، ކޮމެޓީ ބައްދަލުވުން މިއަދު ސިއްރުކޮށްފި އެވެ.

ކޮމެޓީގެ ބައްދަލުވުމުގައި އޮތީ އެމްއާރުޑީސީގެ އޮޕަރޭޝަންސް އަދި މާލީ ހާލަތާ ގުޅޭގޮތުން މަޝްވަރާ ކުރުމެވެ. ނަމަވެސް ކޮމެޓީ ބައްދަލުވުން ފެށުމާއެކު ބައްދަލުވުން ވަނީ ސިއްރުކޮށްފަ އެވެ.

އެމްއާރުޑީސީއާ ބެހޭ ގޮތުން އޮޑިޓާ ޖެނެރަލް ނެރުނު ރިޕޯޓް މާލިއްޔަތު ކޮމިޓީން އަންނަނީ ބަލަމުންނެވެ.

މަގު ހެދުމާއި މަގުތައް މަރާމާތުކުރުމަށް އުފައްދާފައިވާ ސަރުކާރުގެ 100 ޕަސެންޓް ހިއްސާވާ ކުންފުންޏާ ބެހޭ ގޮތުން އޮޑިޓާ ޖެނެރަލް ނެރުނު ރިޕޯޓްގައި ބުނެފައި ވަނީ އެމްއާރުޑީސީ އަށް ލިބެން ޖެހޭ ވަރަށް ގިނަ ފައިސާ ނުލިބި އެބަހުރި ކަމަށެވެ.

އެގޮތުން މިދިޔަ އަހަރުގެ ޖުލައި މަހުގެ ނިޔަލަށް 17.8 މިލިއަން ރުފިޔާ ނުލިބި އެބަހުރި ކަމަށާއި ކުންފުންޏަށް ސަރުކާރާއި އަމިއްލަ ފަރާތްތަކުން ދައްކަން ޖެހޭ ފައިސާ ހޯދަން އެކަށީގެންވާ މަސައްކަތްތަކެއް ކޮށްފައި ނުވާ ކަމަށް ވެސް ރިޕޯޓުގައި ބުންޏެވެ. އަދި އެ ފައިސާތައް ހޯދުމަށް ވަރަށް ގިނަ ދަތިތަކެއް އެބަހުރި ކަމަށް ވެސް ރިޕޯޓްގައިވެ އެވެ.

އޮޑިޓް ރިޕޯޓްގައި ބުނެފައި ވަނީ ކުންފުންޏަށް 2012 ވަނަ އަހަރު ލިބުނު ޖުމްލަ ފައިދާ 39 ޕަސެންޓް އަދި 2013 ވަނަ އަހަރު 34 ޕަސެންޓް، 2014 ވަނަ އަހަރު 41 ޕަސެންޓް ދަށްވެފައިވާ ކަމަށެވެ. އެ ކުންފުނީގެ މަސްއޫލިއްޔަތުތަކުގެ ތެރޭގައި ނުހިމެނޭ މަސައްކަތްތަކެއް ކުރަމުން އަންނަކަން ވެސް އޮޑިޓް ރިޕޯޓްގައި ފާހަގަކޮށްފައިވެ އެވެ. އެ ގޮތުން، ބައެއް ރަށްރަށުގެ ފުޓްސަލް ދަނޑުތައް ހެދުމާއި ކުނި ނައްތާލުމުގެ މަސައްކަތާއި ވެލި ނަގައިގެން ވިއްކުމުގެ މަސައްކަތް ކުރަމުން އަންނަ ކަމަށް ރިޕޯޓްގައި ބުނެފައިވެ އެވެ.