ބަންދުގައި ހުރި ޕްރިންސަކު ސައުދީން މިނިވަންކޮށްފި

ރިޔާޒް (ނޮވެމްބަރު 4) - ކޮރަޕްޝަނުގެ ތުހުމަތުގައި މިދިޔަ އަހަރުގެ ފަހުކޮޅު ހައްޔަރު ކުރި ސައުދީ ޕްރިންސަކު މިނިވަންކޮށްފައިވާ ކަމަށް ރިޕޯޓްތައް ބުނެފި އެވެ.

ޕްރިންސް ޚާލިދު ބިން ތަލާލްގެ އާއިލާގެ މެންބަރުން ވަނީ ޕްރިންސަށް މަރުހަބާ ކިޔާ މަންޒަރުގެ ފޮޓޯތައް ސޯޝަލް މީޑިއާގައި ޝެއާކޮށްފަ އެވެ. ސަލްމާން ރަސްގެފާނަށް ބޮޑުބޭބެ ވިދާޅުވާ ޚާލިދު ދޫކޮށްލާފައި މި ވަނީ އަހަރެއްހާ ދުވަހު ބަންދުގައި ބެހެއްޓުމަށް ފަހު އެވެ.

ކޮރަޕްޝަނުގެ ތުހުމަތުގައި ހައްޔަރު ކުރި މީހުންގެ ތެރޭގައި ޕްރިންސް ޚާލިދުގެ ބޭބެ ޕްރިންސް ވަލީދު ބިން ތަލާލް ވެސް ހިމެނެ އެވެ. ނަމަވެސް ޕްރިންސް ވަލީދު ވަނީ މި އަހަރު ކުރީކޮޅު މިނިވަންކޮށްފަ އެވެ.

ޕްރިންސް ޚާލިދު އަށް ބޮޑުބޭބެ ވިދާޅުވާ ޕްރިންސަސް ރީމް ވަނީ އާއިލާ މެންބަރުންނާ އެކު ޚާލިދު ހުންނެވި ފޮޓޯއެއް ޓްވީޓް ކުރައްވައިފަ އެވެ. ޕްރިންސްގެ ފިރިހެން ދަރިފުޅު ގައިގައި ބޮސްދޭ ފޮޓޯތައް ވެސް ވަނީ ޝެއާކޮށްފަ އެވެ. ޕްރިންސްގެ ދަރިފުޅު ކޯމާއެއްގައި އޮންނަތާ އެތައް އަހަރެއް ވެއްޖެ އެވެ.

ޕްރިންސް ޚާލިދު ހައްޔަރު ކުރި ސަބަބެއް އަދި ދޫކޮށްލި ސަބަބު ވެސް ސައުދީ ސަރުކާރުން ސާފުކޮށްދީފައެއް ނުވެ އެވެ. ނަމަވެސް ވޯލް ސްޓްރީޓް ޖާނަލް އިން ބުނެފައި ވަނީ 11 މަސް ދުވަސް ވަންދެން ޕްރިންސް ޚާލިދު ބަންދުކޮށްފައި ބެހެއްޓީ ކޮރަޕްޝަނުގެ ތުހުމަތުގައި ޝާހީ އާއިލާގެ ބައެއް މެންބަރުންނާއި ޕްރިންސުން އަދި ކުރީގެ ވަޒީރުން ހައްޔަރު ކުރަން ފެށުމުން އެކަމަށް ފާޑު ވިދާޅުވާން ފެށުމުން ކަމަށެވެ. ގާތްގަނޑަކަށް 200 މީހުން ބަންދުކޮށްފައި ބޭތިއްބީ ރިޔާޒުގެ ފަސް ތަރީގެ ރިޒް ކާލްޓަން ހޮޓަލުގަ އެވެ. ޖެނުއަރީ މަހު ފަހުކޮޅު ސައުދީ ޕްރޮސެކިއުޓަ ޖެނެރަލް ވިދާޅުވެފައި ވަނީ ބަންދުކުރި މީހުންގެ އަތުން ބަދަލުގެ ގޮތުގައި 100 ބިލިއަން ޑޮލަރު ލިބިފައިވާ ކަމަށެވެ.