މޭޑޭގައި ހައްޔަރުކުރި މީހަކަށް ނުބައި ދައުވާއެއް ކުރުމުން ހުކުމުން ސަލާމަތްވެއްޖެ

އިދިކޮޅު ފަރާތްތަކުން 2015 ވަނަ އަހަރުގެ މޭ ޑޭގައި ބޭއްވި ބޮޑު މުޒާހަރާގައި ހައްޔަރުކޮށް ޖަލަށް ހުކުމް ކޮށްފައިވާ މީހަކަށް، ކޮށްފައިވާ ދައުވާ ރަނގަޅު ނޫން ކަމަށް ކަނޑައަޅައި ހައި ކޯޓުން މިއަދު އޭނާ މިނިވަންކޮށްފި އެވެ.

ކްރިމިނަލް ކޯޓުން 2016 ވަނަ އަހަރު ސ. ހުޅުދޫ، އޮސްޓްރޭލިއާ، އިބްރާހިމް އިބާދަށް ހުކުމްކުރީ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާ ސާބިތުވުމުންނެވެ.

އިބާދުގެ ވަކީލް ނާޒިމް އަބްދުއްސައްތާރު ވިދާޅުވީ ހަތް އަހަރުގެ ޖަލު ހުކުމް ހައި ކޯޓުން މިއަދު ބާތިލްކުރީ ދައުވާ އާއި ހުކުމް ގޯސްވެގެން ކަމަށެވެ. އިބާދަށް ދައުވާކުރީ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާ އެވެ. ނަމަވެސް އޭނާގެ މައްޗަށް ދަށު ކޯޓުން ހުކުމް ކުރީ، ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން މާރާމާރީ ހިންގިކަމަށް ސާބިތުވެގެންނެވެ.

އިބާދާއެކު ގ. ފެރެސްލައިޓް އިބްރާހިމް ރަޝީދު ވެސް ހަތް އަހަރަށް ޖަލަށް ލާން ހުކުމް ކުރި އެވެ. އޭނާގެ ޖަލު ހުކުމުގެ އިސްތިއުނާފުގެ އަޑުއެހުމަށް ހާޒިރުވެފައި ނުވާތީ ކޯޓުން އެ މައްސަލަ ބޭރުކޮށްލީ އެެވެ.

ރާއްޖޭގައި މިހާތަނަށް ބޭއްވި އެންމެ ބޮޑު މުޒާހަރާގައި 200 އަށްވުރެ ގިނަ މީހުން ހައްޔަރުކުރި އެވެ. އޭގެ ތެރެއިން ދައުވާކުރި މީހުންގެ ތެރެއިން މިހާރު ބަންދުގައި ތިބީ ދެ މީހުންނެވެ. އޭގެ ތެރެއިން އިބްރާހިމް ރަޝީދުގެ ސިއްހީ ހާލަތު ހުރިގޮތުން ހުރީ ގޭބަންދުގަ އެވެ. ޖަލުގައި ހުރީ އެންމެ މީހެކެވެ.

މޭޑޭ މުޒާހަރާގައި ދެއްކެވި ވާހަކަތަކާ ގުޅިގެން އަދާލަތު ޕާޓީގެ ރައީސް އިމްރާން އަބްދުﷲ އަށް ވެސް ދައުލަތުން ޓެރަރިޒަމްގެ ދައުވާކުރި އެވެ. އޭނާގެ މައްޗަށް އިއްވި 11 އަހަރުގެ ޖަލު ހުކުމް ތަންފީޒުކުރުން ފަސްކުރަން ސުޕްރީމް ކޯޓުން ވަނީ މި މަހުގެ 1ވަނަ ދުވަހު އަމުރުކޮށްފަ އެވެ.