ޑިފެންސް މިނިސްޓަރު އާދަމް ޝަރީފު މަޖިލީހަށް ކުރިމަތިލައްވަނީ

ޑިފެންސް މިނިސްޓަރު އާދަމް ޝަރީފް، ރައްޔިތުންގެ މަޖިލީހުގެ މަޑުއްވަރީ ދާއިރާ އަށް ކުރިމަތިލައްވަން ނިންމަވައިފި އެވެ.

ކޯސްޓް ގާޑް ބިލްޑިންގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާދަމް ޝަރީފު ވިދާޅުވީ، މިނިސްޓަރުގެ މަގާމުން ވަކިވިއަސް ރައްޔިތުންނަށް ހިދުމަތް ކުރުމުގައި ދެމިހުންނަވާނެ ކަމަށެވެ. އެހެންވެ މަޖިލީހުގެ ތެރެއިން ސަރުކާރު ޒިންމާދާރު ކުރުވައި ހިދުމަތް ދިނުމަށް ނިންމަވާފައިވާ ކަމަށް، ޕީޕީއެމްގެ ޓިކެޓުގައި މަޖިލީހަށް ކުރިމަތިލައްވާ އާދަމް ޝަރީފު ވިދާޅުވި އެވެ.

އަންނަ ހޮނިހިރު ދުވަހު އިންތިޚާބީ ރައީސް އިބްރާހިމް މުހައްމަދު ސޯލިހް (އިބޫ) ހުވާކުރައްވައި އެ މަނިކުފާނުގެ ވެރިކަން ފެށުމާއެކު، ޕީޕީއެމްގައި ރައީސް އަބްދުﷲ ޔާމީނާ އެކު މިހާރު ތިއްބެވި ބޭފުޅުން ވާނީ އިދިކޮޅު ބޭފުޅުންނަށެވެ.

އާދަމް ޝަރީފަކީ ރ. ފައިނަށް އުފަން ބޭފުޅަކަށް ވިއަސް، އުމުރުގެ ބޮޑު ބައެއް ހޭދަކުރައްވާފައިވަނީ މަޑުއްވަރީ ދާއިރާގައި ހިމެނޭ މީދޫގަ އެވެ. ތައުލީމް ހާސިލްކުރެއްވުމަށް ވެސް އެ ރަށުގައި ހުންނަ އަތޮޅު ތައުލީމީ މަރުކަޒުގައި ގިނަ އަހަރުތަކެއް ހޭދަކުރައްވާފައިވެ އެވެ. އަދި ތައުލީމީ ދާއިރާ އިން ކިޔަވައި ވިދާޅުވުމަށް ފަހު ވެސް އެ ސްކޫލުގައި މަސައްކަތް ކުރައްވާފައިވެ އެވެ.

ހައުސިން މިނިސްޓަރު ޑރ. މުހައްމަދު މުއިއްޒު ވެސް ވަނީ މަޖިލީހަށް ކުރިމަތިލައްވަން ނިންމަވައިފަ އެވެ. ނަމަވެސް ކުރިމަތިލައްވާނެ ދާއިރާއެއް އަދި ކަނޑައެއް ނާޅުއްވަ އެވެ.