މަޖިލީހުގައި ބޮޑެތި މައްސަލަތަކެއް އެބަހުރި: މެމްބަރުން

ރައްޔިތުންގެ މަޖިލީހުގެ އިދާރާގެ ތެރޭގައި ހައްލު ކުރަން ޖެހޭ ބޮޑެތި މައްސަލަތަކެއް ހުރި ކަމަށް ވިދާޅުވެ، އެ މައްސަލަތައް ހައްލުކުރަން މެމްބަރުން މިއަދު ގޮވާލައްވައިފި އެވެ.

މިނިވަން މުއައްސަސާތަކަށް ކަނޑައެޅި ބަޖެޓާ ގުޅޭ ގޮތުން، ބަޖެޓު ދިރާސާ ކުރާ ކޮމިޓީގައި މަޖިލީހުގެ ވިލުފުށީ ދާއިރާގެ މެމްބަރު ރިޔާޒް ރަޝީދު ވިދާޅުވީ މަޖިލީހުގެ ފާހަނާތަކުން ފެން ރަނގަޅަށް ނުލިބުން ފަދަ ގިނަ މައްސަލަތަކެއް ހުރި ކަމަށެވެ. މަޖިލީހުގެ އެތެރޭގެ ކަންތައްތައް މިހާ ދެރަވަރުކޮށް ހުރީމަ، މަޖިލީހުގެ ކުރީގެ ރައީސް އަހުމަދު ޒާހިރު ނެތް ކަމުގެ އިހްސާސް ކުރެވޭ ކަމަށް އޭނާ ވިދާޅުވި އެވެ.

ރިޔާޒް ވިދާޅުވި ގޮތުގައި މަޖިލީހުގެ ރައީސަކަށް ޒާހިރު ހުންނެވި އިރު، މަޖިލީހުގެ ކަންކަން ކުރިއަށް ގެންގޮސްފައި ވަނީ ވަރަށް ރޭވުންތެރިކަމާއި ފުރިހަމަކަމާ އެކުގަ އެވެ. މަޖިލީހުގެ ކަންކަން ރަނގަޅު ކުރުމަކީ މަޖިލީހުގެ ރައީސްގެ ޒިންމާއެއް ކަން ވެސް ރިޔާޒް ފާހަގަ ކުރެއްވި އެވެ.

ރިޔާޒް އެހެން ވިދާޅުވި އިރު، ވޭތުވެދިޔަ ހަތަރު އަހަރެއްހާ ދުވަހު މަޖިލީހުގެ ރައީސެއްގެ ގޮތުގައި ހުންނެވީ އަބްދުﷲ މަސީހް މުހައްމަދެވެ. މަސީހުގެ މައްޗަށް އިތުބާރު ނެތް ކަމުގެ ވޯޓު ނަގަން ތައްޔާރުވަމުން ދަނިކޮށް، އޭނާ އިސްތިއުފާ ދެއްވުމާ ގުޅިގެން، ދެން އެ މަގާމަށް އިންތިހާބު ކުރީ ގާސިމް އިބްރާހިމެވެ.

"އެއްވެސް ސަރުކާރަކުން ރައްޔިތުންގެ މަޖިލީހާ ދޭތެރޭ އިހާނެތިކޮށް ކަމެއް ނުކުރޭ. އެއިރެއްގައި ހުންނަ ރައީސެއްގައި ހިންގުމުގައި ނުވަތަ [ކަންކަމާ] އުޅޭ މިންވަރުން މަޖިލީހުގެ ކަންކަން ނުވެ އޮންނަނީ. އެއީ އަޅުގަނޑު ގަބޫލު ކުރާ ގޮތަކީ،" ޕީޕީއެމް ޕާލަމެންޓްރީ ގްރޫޕްގެ ނައިބު ލީޑަރުކަން ކުރައްވާ ރިޔާޒް ވިދާޅުވި އެވެ.

ރިޔާޒް ވިދާޅުވި ގޮތުގައި، މަޖިލީހުގައި މެމްބަރުން ބޭނުން ކުރައްވާނެ ވެހިކަލެއް އޮންނަން ޖެހެ އެވެ. އަދި ރައީސުލްޖުމްހޫރިއްޔާއެކޭ އެއްގޮތަށް ލޯންޗެއް ވެސް މަޖިލީހުގައި އޮންނަން ވާނެ ކަމަށް ވިދާޅުވި އެވެ.

ކެލާ ދާއިރާގެ ޕީޕީއެމްގެ މެމްބަރު އަލީ އާރިފް ވިދާޅުވީ މަޖިލީހުގެ މެޖޯރިޓީ ލީޑަރުގެ ކޮޓަރީގެ އޭސީ މަސައްކަތް ނުކުރާ އިރު، ބޮކިތައް ވެސް ނުދިއްލޭ ފަހަރު އަންނަ ކަމަށެވެ. އެހެންވެ، މަޖިލީހުގެ އިދާރާގެ މައްސަލަތައް ހައްލުކުރަން އަންނަ އަހަރުގެ ބަޖެޓުގައި ފައިސާ ހިމެނުމަށް އޭނާ އެދިވަޑައިގަތެވެ.

މަޖިލީހުގެ އިދާރާ އިން ބުނި ގޮތުގައި މަޖިލީހަށް ބަޖެޓު ހުށަހެޅި އިރު، އޮތީ ފިނޭންސް މިނިސްޓްރީ އަށް މަޖިލީހުން ފޮނުވި އަދަދަށް ވުރެ ފަސް މިލިއަން ރުފިޔާ މަދުކޮށެވެ.

މަޖިލީހުގެ އިދާރާ އިން ވަނީ 11 މީހުންގެ ޖާގައިގެ ވެހިކަލެއް ހޯދަން ހަތް ލައްކަ ރުފިޔާ، ލައިބްރަރީއެއް ގާއިމު ކުރަން އެއް މިލިއަން ރުފިޔާ، ސޮފްޓްވެއާތައް ހޯދުމަށް އަށް ލައްކަ ރުފިޔާ، މުވައްޒަފުންގެ ކޮމްޕިއުޓާ ސިސްޓަމް އާކުރުމަށް ހަތަރު ލައްކަ ރުފިޔާ، ޕްރިންޓިން މެޝިންތަކެއް ގަތުމަށް ހަތަރު ލައްކަ ރުފިޔާ، އޯޑިއޯ/ވީޑިއޯ އަޕްގްރޭޑް ކުރުމަށް ތިން ލައްކަ ރުފިޔާ، މަޖިލީހުގެ ޗެމްބަރުގައި ހުރި އޮޓެމޭޓެޑް ސިސްޓަމްތަކެއް ތަރައްގީ ކުރަން އެއް މިލިއަން ރުފިޔާ ބޭނުންވާ ކަން ހާމަކޮށްފަ އެވެ.

މީގެ އިތުރުން މަރާމާތަށް ތިން ލައްކަ އަށް ވުރެ ގިނަ ރުފިޔާ ބޭނުންވާ ކަމަށް މަޖިލީހުން ބުންޏެވެ. އެކަމަކު، މިއިން އެއްވެސް ކަމެއް ބަޖެޓުގައި ހިމަނާފައިނުވާ ކަމަށް މަޖިލީހުގެ އިދާރާ އިން ބުންޏެވެ.

ރައްޔިތުންގެ މަޖިލީހުގެ ޖާގައިގެ ދަތިކަން ހައްލު ކުރަން ހަދާފައިވާ 13 ބުރީގެ އިމާރާތް ގާތްގަނޑަކަށް ނިމިފައިވާ ކަމަށް މަޖިލީހުގެ އިދާރާ އިން ވަނީ ބުނެފަ އެވެ. އެ އިދާރާ އިން ބުނި ގޮތުގައި މިހާރު ހަމައެކަނި ކުރަން ހުރި ކަމަކީ އިމާރާތަށް ބޭނުންވާ ސާމާނުތައް ހޯދުމެވެ. އަދި ތަނުގެ ކަރަންޓު މަސައްކަތް ޑިސެމްބަރު މަހު ފަށާނެ ކަމަށް މަޖިލީހުން ބުންޏެވެ.