ޕީޕީއެމް ކޮންގްރެސް މައްސަލަ ސުޕްރީމް ކޯޓަށް ހުށަހަޅަނީ

މިދިޔަ ރިޔާސީ އިންތިހާބަށް ފަހު ޕީޕީއެމުން ބޭއްވި ކޮންގްރެސް އަދި އެ ކޮންގްރެސްގެ ނިންމުންތައް ބަލައިނުގަންނަން އިލެކްޝަންސް ކޮމިޝަނުން ނިންމި ނިންމުން ސައްހަ ނޫން ކަމަށް ހައި ކޯޓުން މިއަދު ކަނޑައެޅުމުން އެ މައްސަލަ ސުޕްރީމް ކޯޓުގައި އިސްތިއުނާފް ކުރުމަށް ނިންމައިފި އެވެ.

އިލެކްޝަންސް ކޮމިޝަނުން މިއަދު ބުނީ ހައި ކޯޓުގެ ނިންމުމުގައި ކަންބޮޑުވާ ކަންތައްތަކެއް އެބަހުރި ކަމަށެވެ. އެހެންކަމުން އެކަންތައް މިހާރު ބަލަމުންދާ ކަމަށް އެ ކޮމިޝަނުން ބުންޏެވެ.

"ހައި ކޯޓުގެ ހުކުމަށް އިހުރިތާމް ކުރަން. އެކަމަކު އެ ނިންމުމާ ގުޅޭ ގޮތުން އިލެކްޝަންސް ކޮމިޝަނުން ކަންބޮޑުވާ ކަންތައްތަކެއް ހުރުމުން މައްސަލަ އިސްތިއުނާފް ކުރާނަން. މިހާރު އެކަން އެބަ ކުރިއަށްދޭ،" އިލެކްޝަންސްގެ އޮފިޝަލަކު ވިދާޅުވި އެވެ.

ހައި ކޯޓުން މިއަދު ކުރި ހުކުމުގައި ބުނެފައި ވަނީ ޕީޕީއެމުން ސެޕްޓެމްބަރު ފަހުކޮޅު ބޭއްވި ކޮންގްރެސް ސައްހަ ކަމަށާއި އެ ކޮންގްރެސްގައި އަސާސީ ގަވާއިދަށް ގެނައި ބަދަލާއި އިންތިހާބު ކުރި އިންތިހާބު ކުރި މަގާމުތައް ވެސް ސައްހަ ކަމަށެވެ.

ޕީޕީއެމްގެ މަގާމުތަކަށް އިންތިހާބު ކުރި މީހުން ކުރިއަށް އޮތް 24 ގަޑިއިރުގެ ތެރޭގައި އިލެކްޝަންސް ކޮމިޝަންގެ ދަފްތަރުގައި ޖެއްސުމަށް ވެސް ހައި ކޯޓުން ވަނީ އެ ކޮމިޝަނުގެ މައްޗަށް އަމުރުކޮށްފަ އެވެ.

ސެޕްޓެމްބަރު މަހު ބޭއްވި ޕީޕީއެމްގެ ކޮންގްރެސްގައި ޕާޓީގެ ރައީސަކަށް އިންތިހާބު ކޮށްފައި ވަނީ ކުރީގެ ރައީސް އަބްދުﷲ ޔާމީން އަބްދުލްގައްޔޫމެވެ. ޕާޓީގެ ނައިބު ރައީސުންގެ ގޮތުގައި ކަނޑައަޅާފައި ވަނީ އަބްދުއްރަހީމް އަބްދުﷲ އާއި ކުރީގެ ޓޫރިޒަމް މިނިސްޓަރު މޫސާ ޒަމީރާއި ކުރީގެ އިކޮނޮމިކް މިނިސްޓަރު މުހައްމަދު ސައީދާއި ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރެވެ.

މަގާމްތަކަށް މީހުން އިންތިހާބު ކުރުމުގެ އިތުރުން އެ ކޮންގްރެސްގައި ޕީޕީއެމްގެ އަސާސީ ގަވާއިދަށް 10 އިސްލާހެއް ގެނެސްފައިވެ އެވެ.