ޕީޕީއެމް ކޮންގްރެސް ބަލައިނުގަތް މައްސަލަ މާދަމާރޭ ކޯޓުން ނިންމަނީ

ވެރިކަން ކުރާ ޕީޕީއެމުން މިދިޔަ ސެޕްޓެމްބަރު މަހުގެ ފަހުކޮޅު ބޭއްވި ޚާއްސަ ކޮންގްރެސްގެ ނިންމުންތައް ބަލައިނުގަތުމަށް އިލެކްޝަންސް ކޮމިޝަން (އީސީ) އިން ނިިންމުމާ ގުޅިގެން އެކަމާ ދެކޮޅަށް ޕީޕީއެމުން ހައި ކޯޓަށް ހުށަހެޅި މައްސަލައިގެ ހުކުމް އިއްވުމަށް މާދަމާރެޔަށް ތާވަލްކޮށްފި އެވެ.

ޕީޕީއެމުން ބޭއްވި ޚާއްސަ ކޮންގްރެސްގައި ރައީސް އަބްދުﷲ ޔާމީން ވަނީ އެ ޕާޓީގެ ރައީސްގެ މަގާމަށް އިންތިޚާބުކޮށްފަ އެވެ. އަދި ޕީޕީއެމްގެ ހަތަރު ނައިބު ރައީސުންގެ ގޮތުގައި މިހާރު ވެސް އެ ޕާޓީގެ ނައިބު ރައީސުން ކަމަށްވާ ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އާއި ޓޫރިޒަމް މިނިސްޓަރު މޫސާ ޒަމީރުގެ އިތުރުން އިކޮނޮމިކް މިނިސްޓަރު މުހައްމަދު ސައީދާއި ރައީސް އޮފީހުގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރު ވަނީ އިންތިޚާބުކޮށްފަ އެވެ.

އެކަމަކު އެ ކޮންގްރެސްގެ ނިންމުންތައް ބަލައިނުގަތުމަށް އިލެކްޝަންސް ކޮމިޝަނުން ނިންމުމުން އެ އެ މައްސަލަ ޕީޕީއެމުން ވަނީ ކޯޓަށް ހުށަހަޅައިފަ އެވެ. އިލެކްޝަންސް ކޮމިޝަނާ ދެކޮޅަށް ޕީޕީއެމުން ހައި ކޯޓަށް ހުށަހެޅި މައްސަލައިގެ އަޑުއެހުންތައް އިއްޔެ ވަނީ ނިންމާލައިފަ އެވެ.

އެހެންވެ، ބެލެވޭ ގޮތުގައި މާދަމާރޭ 8:30 ގައި އޮންނާނީ އެ މައްސަލައިގެ ހުކުމް އިއްވުމެވެ.

އެންމެ ފަހުން ބޭއްވި ޝަރީއަތުގެ މަޖިލީހުގައި ފަނޑިޔާރުންގެ ބެންޗުން އިއުލާން ކުރެއްވީ އެ މައްސަލާގައި އިތުރު ކަމެއް ސާފުކުރަން ނުޖެހޭނަމަ ދެން އޮންނާނީ ހުކުމް އިއްވުން ކަމަށެވެ.

ހައި ކޯޓުގައި ބޭއްވި ޝަރީއަތުގައި އިލެކްޝަންސް ކޮމިޝަނުން ފާހަގަ ކުރި ގޮތުގައި ކޮންގްރެސްގެ ނިންމުންތައް ބަލައިނުގަތުމަށް ނިންމީ ޕީޕީއެމްގެ ގަވާއިދުތަކާ ޚިލާފަށް ކޮންގްރެސްއާ ގުޅޭ ކަންކަން ކޮށްފައި ހުރި ކަން ކޮމިޝަނަށް ފާހަގަވުމުންނެވެ. އެކަމަކު، ޕީޕީއެމުން ބުނީ ކޮންގްރެސް ބޭއްވީ ޕާޓީގެ ކައުންސިލްގެ ބައްދަލުވުމެއް ބާއްވައި، އެ ޕާޓީގެ އިންތިޚާބުތަކާ ބެހޭ ގަވާއިދުގެ ބައެއް މާއްދާތަކަށް އަމަލު ނުކުރަން ނިންމުމަށް ފަހު ކަމަށާއި އެކަން އެގޮތަށް ކައުންސިލަށް ނިންމިދާނެ ކަމަށެވެ.

އެ މައްސަލަ ބައްލަވަނީ ފަނޑިޔާރު މުހައްމަދު ފައިސަލް އާއި ފަނޑިޔާރު ހަސަން އަލީގެ އިތުރުން ފަނޑިޔާރު ހުސައިން ޝަހީދެވެ. ރިޔާސަތު ބަލަހައްޓަވަނީ ފަނޑިޔާރު ފައިސަލް އެވެ.