ރައީސް އުކުޅަހަށް ވަޑައިގެންފި

ރައީސް އިބްރާހީމް މުހައްމަދު ސޯލިހު އއ. އުކުޅަހަށް މިއަދު ވަޑައިގެންފި އެވެ.

މަސްވެރި ރަށެއް ކަމަށްވާ އުކުޅަހަށް ރައީސް މިއަދު ވަޑައިގަތީ މިއަދު ފާހަގަކުރާ މަސްވެރިންގެ ދުވަހާއި ދުނިޔޭގެ އިންސާނީ ހައްގުތަކުގެ ދުވަހުގެ މުނާސަބަތާ ގުޅުވައިގެންނެވެ. މިއަދުގެ ދަތުރުފުޅުގައި އެމަނިކުފާނުގެ އަރިހުގައި ބައެއް ވަޒީރުންނާއި ސަރުކާރުގެ އިސް އެހެން ބައެއް ބޭފުޅުން ބައިވެރިވަޑައިގެންނެވި އެވެ.

ރައީސް އުކުޅަހަށް ވަޑައިގެންނެވުމުން އެމަނިކުފާނަށް މަރުހަބާ ދަންނަވަން ގިނަ ބަޔަކު ބަނދަރަށް ނުކުތެވެ. އެގޮތުން ގިނަ ބަޔަކު އެ މީހުންގެ ދަރިންނާ އެކު ނުކުތް އިރު އެ ހުރިހާ އެންމެންނާ ވެސް އެމަނިކުފާނު ސަލާމްކުރައްވައި ބައެއް މީހުންނާ ވާހަކަފުޅު ވެސް ދެއްކެވި އެވެ.

އުކުޅަހުގައި މިހާރު ކުރިއަށްދާ ޖަލްސާގައި ރައީސް ވާހަކަފުޅު ދައްކަވާނެ އެވެ.

ރައީސް އިބްރާހީމް މުހައްމަދު ސޯލިހު ރައީސް ކަމަށް ވަޑައިގެންނެވި ފަހުން އަތޮޅުތަކަށް ކުރައްވާ ދަތުރުފުޅުތަކުގައި ފުރަތަމަ ވަޑައިގެންނެވީ ކ. ދިއްފުށްޓަށެވެ. އުކުޅަހަކީ އެގޮތުން އެމަނިކުފާނު ދެވަނައަށް ވަޑައިގެންނެވި ރަށެވެ. ރައީސް އިބްރާހިމް މުހައްމަދު ސޯލިހަށް މި އަހަރުގެ ރިޔާސީ ޓިކެޓު ދިނުމަށް ފާސްކުރީ ވެސް އުކުޅަހުގައި ބޭއްވި އެމްޑީޕީގެ ކޮންގްރެސްގަ އެވެ.