ކޮންމެ ޕްލާސްޓިކް ހުސް ފުޅިއަކާއި ދަޅަކަށް ހިލޭ ފޮތެއް

ކުނި މެނޭޖްކޮށް، ތިމާވެއްޓަށް ގެއްލުން ހުރި ޕްލާސްޓިކް ފަދަ އެއްޗިއްސާ ދެކޮޅަށް ކުރާ މަސައްކަތުގެ ތެރެއިން އިޓަލީގެ ފޮތް ފިހާރައަކުން ތަފާތު ކަމެއް ފަށައިފި އެވެ. އެތަނަށް ހުސް ފުޅި އާއި އެލްމިނިއަމް ހުސް ދަޅެއް ގެންދާ ކުދިންނަށް ހިލޭ ފޮތެއް ދެނީ އެވެ.

އިޓަލީގެ ޕޮލާގައި ހިންގާ އެކްސް ލިބްރިސް ކެފޭ ބުކްޝޮޕްގެ ވެރިޔާ މިޝެލް ޖެންޓައިލް ބުނީ މި ކަމަކީ ކުދިންގެ މެދުގައި ކިޔުމުގެ އާދައަށަންގެންނެވުމާ އެކު، ތިމާވެށީގެ ހިމާޔަތުގައި މަސައްކަތްކުރަން ބާރުއެޅުމުގެ ގޮތުން ފެށި ކަމެއް ކަމަށެވެ.

އެގޮތުން ޕްލާސްޓިކް ހުސް ފުޅިއަކާ ހުސް ދަޅެއް ގެންދާ ކޮންމެ ކުއްޖަކަށް ހިލޭ ފޮތެއް ދޭނެ ކަމަށް މިޝެލް ބުންޏެވެ.

"އަހަރެން އުންމީދު ކުރަން މިކަމުން ރަނގަޅު ނަތީޖާއެއް ނުކުންނާނެ ކަމަށް. އެއް ކަމަކީ ކުދިންގެ މެދުގައި ކިޔުމުގެ ޖޯޝާއި ޝައުގުވެރިކަން އުފެއްދުން،" އޭނާ ބުންޏެވެ. "އަނެއް ކަމަކީ ޕްލާސްޓިކާއި އެލްމިނިއަމް ކަހަލަ ރިސައިކަލް ކުރެވޭ އެއްޗެހި ގެނެސްގެން އެ އެއްޗެހި ރިސައިލްކޮށްގެން ތިމާވެއްޓަށް ހިދުމަތެއްކޮށް ދިނުން."

މިޝެލް ބުނި ގޮތުގައި އޭނާގެ މި މަސައްކަތް މުޅި އިޓަލީގެ ސަމާލު ކަމަށް ގޮސް، އެ ގައުމުގެ އެކި ކަންކޮޅުތަކުގައި މިފަދަ ހަރަކާތްތައް ހިންގާ ތަން ފެނުމަކީ ވަރަށް ބޮޑު ހުވަފެނެކެވެ. އަދި ކުދިންގެ މެދުގައި ހޭލުންތެރިކަން އުފެދޭ ކަހަލަ ކަންކަން ކުރުމަކީ ދުނިޔެ ހިމާޔަތް ކުރަން ކުރާ މަސައްކަތަށް ވަރަށް މުހިއްމު ކަމެއް ކަމަށް ބުންޏެވެ.

މިޝެލް ބުނީ އޭނާ އެއްކުރާ ޕްލާސްޓިކް ފުޅި އާއި އެލްމިނިއަމް ދަޅުތައް ރިސައިކަލް ކުރާ ސެންޓަރަކަށް ފޯރުކޮށް ދީގެން ލިބޭ އާމްދަނީން ގަންނަނީ ފޮތް ކަމަށެވެ.

"އެހެންވީމާ މިއީ އެތައް ކުދިންނަކަށް ހިލޭ ފޮތް ފޯރުކޮށް ދެވޭނެ ހިދުމަތެއް،" އޭނާ ބުންޏެވެ. "މިކަމަށް ލިބޭ ތަރުހީބު ވެސް އަންނަނީ ބޮޑުވަމުން. ވަރަށް ގިނަ ކުދިން މިހާރު ކޮންމެ ދުވަހަކު ވެސް ހުސް ފުޅި އާއި ދަޅު ހިފައިގެން އެބަ އާދޭ."