ފުވައްމުލަކުގައި ހިނގި އެކްސިޑެންޓެއްގައި ތިން މީހަކަށް އަނިޔާވެއްޖެ

ފުވައްމުލަކުގައި މިއަދު ހިނގި އެކްސިޑެންޓެއްގައި ތިން މީހަކަށް އަނިޔާވެއްޖެ އެވެ.

ފުލުސް އޮފީހުން ބުނީ ފުނާޑުއަވަށު ހައިވޭ ކައިރިން ދުއްވާފައި ދިޔަ ދެ ސައިކަލު ޖެހި ތިން މީހަކަށް އަނިޔާވެފައިވާއިރު، އޭގެ ތެރެއިން އެކަކަށް ލިބުނު އަނިޔާތައް ސީރިއަސް އެވެ.

އެ ތިން މީހުންނަށް ވެސް މިހާރު އަންނަނީ ފުވައްމުލަކު ހޮސްޕިޓަލުގައި ފަރުވާ ދެމުންނެވެ.

ފުލުހުން ބުނިގޮތުގައި ސީރިއަސް އަނިޔާތަކެއް ލިބިފައިވަނީ އެކްސިޑެންޓްވި ދެ ސައިކަލުގެ ތެރެއިން އެއް ސައިކަލު ދުއްވަން އިން ސްރީލަންކާ މީހަކަށެވެ. އޭނާގެ ކަނާތު ފަޔާއި އަތް ވެސް ބިނދިފައިވާ ކަމަށް ފުލުހުން ބުންޏެވެ.

އެކްސިޑެންޓްވި އަނެއް ސައިކަލު ދުއްވަން އިނީ 18 އަހަރުގެ ޒުވާނެއް ކަމަށް ވެ އެވެ. އޭނާ އަށާއި އެ ސައިކަލުގެ ފަހަތުގައި އިން 24 އަހަރުގެ މީހާއަށް ވެސް އެކިވަރުގެ އަނިޔާތައް ލިބިފައިވާ ކަމަށް ފުލުހުން ބުންޏެވެ.