ހުނަރު ދައްކާލުމުގެ ދުނިޔޭގެ މުބާރާތެއްގައި ރާއްޖޭގެ ހަތް ކުދިން

ހޮންކޮންގުގެ އަނާނާ ޖަމިއްޔާ އިން ދުނިޔޭގެ އޯޓިޒަމް ކުދިންނަށް ހާއްސަކޮށްފައިވާ މުބާރާތެއްގައި ރާއްޖޭގެ ހަތް ކުއްޖަކު ބައިވެރިކޮށްފި އެވެ.

މިއީ، އޯޓިޒަމް ކުދިންގެ ހުނަރު ދުނިޔެ އަށް ދައްކާލައި، އެ ކުދިންނަށް ހިތްވަރު ދިނުމުގެ ގޮތުން ކުރިއަށް ގެންދާ މުބާރާތެކެވެ. ދުނިޔޭގެ 22 ގައުމަކުން ބައިވެރިވެފައިވާ މި މުބާރާތުގައި ރާއްޖޭގެ ހަތް ކުއްޖަކު ބައިވެރިކުރީ އޯޓިޒަމް އެސޯސިއޭޝަންގެ ދަށުން ހިންގާ މާލޭ އޯޓިޒަމް ސެންޓަރަށް ލިބުނު ދައުވަތެއްގަ އެވެ. ރާއްޖޭގެ ދަރިވަރުން ބައިވެރިކުރީ މިއުޒިކަށް ހާއްސަ ކެޓަގަރީގަ އެވެ.

މި ކުދިން ކިޔާފައިވާ ލަވަތަކާ އެކު މިހާރު ވަނީ އޮންލައިންކޮށް ވޯޓަށް ހުޅުވާލައިފަ އެވެ. މި މުބާރާތުގައި ހުނަރުވެރި ކުދިން ހޮވަނީ ފޭސްބުކްގައި ލިބޭ ވޯޓުގެ އަދަދުންނާއި ޖަޖުންގެ މާކްސް އިންނެވެ. ރާއްޖޭގެ ކުދިން ބައިވެރިވި ކެޓަގަރީން އެ ކުދިން އުޅެނީ ކުރީގަ އެވެ.

މޯލްޑިވްސް އޯޓިޒަމް އެސޯސިއޭޝަންގެ މޭނޭޖިން ޑިރެކްޓަރު އިފްހާމް ހުސެއިން ވިދާޅުވީ މުބާރާތުގައި ބައިވެރި ކުރި ހުރިހާ ކުދިންނަކީ ވެސް ވަރަށް ހުނަރުވެރި ކުދިން ކަމަށެވެ. ދިވެހިންގެ ވޯޓާއެކު އޭގެ ތެރެއިން ކުއްޖަކު މުބާރާތުން އެއް ވަނަ ލިބުމުގެ ފުރުސަތު އޮތް ކަމަށް ވިދާޅުވި އެވެ.

"އެހެންވީމަ ވޯޓު ވަރަށް މުހިއްމު މި ކުދިންނަށް. މި މަހު ހަތަކާ ހަމައަށް އޮންލައިންކޮށް ވޯޓު ދެވޭނެ،" އިފްހާމް ވިދާޅުވި އެވެ.

މުބާރާތުން އެއް ވަނަ ލިބޭ ކުއްޖަކަށް ހާއްސަ އިނާމެއް ދޭން ހޮންކޮންގުގެ ޖަމިއްޔާ އިން ވަނީ ނިންމައިފަ އެވެ.

މުބާރާތުގައި ބައިވެރިވި ކުދިންނާއި އެ ކުދިންގެ ލަވަތައް ވަނީ މޯލްޑިވްސް އޯޓިޒަމް އެސޯސިއޭޝަންގެ ފޭސްބުކްޕޭޖްގައި ޝެއާކޮށްފަ އެވެ. އެ ޕޭޖުން އެ ކުދިންނަށް ވޯޓު ދެވޭނެ އެވެ.

މި މުބާރާތުގައި ރާއްޖެ އިން 5 އަހަރާއި 13 އަހަރާ ދެމެދުގެ ކުދިން ބައިވެރިކުރިއިރު އެހެން ގައުމުތަކުން ވަރަށް ދޮށީ އުމުރުގެ ކުދިން ވެސް ބައިވެރިކޮށްފައިވާ ކަމަށް އިފްހާމް ވިދާޅުވި އެވެ. އެއީ، މުބާރާތުގައި ބައިވެރިވި ދިވެހި ކުދިންނަށް އޮތް ޗެލެންޖަކަށް ވާތީ މުއްދަތު ހަމަވުމުގެ ކުރިން މި ކުދިންނަށް ވޯޓު ދިނުމަށް އިފްހާމް އެދެ އެވެ.