ހެޕީމާކެޓުން ރޯދައަށް ތަކެތި އަގުހެޔޮކޮށްފި

މާލޭގައި ކާބޯތަކެތީގެ ބާވަތްތަކުގެ ވިޔަފާރި ފުޅާ ދާއިރާއެއްގައި ކުރަމުން އަންނަ ހެޕީ މާކެޓުން ވިއްކާ ބާވަތްތައް ރޯދަމަހަށް އަގުހެޔޮކޮށްފި އެވެ.

ހެޕީ މާކެޓުން މިއަދު ނެރުނު ބަޔާނެއްގައި ބުނީ ކޮންމެ އަހަރަކު ވެސް ރޯދަމަހަށް ކާބޯތަކެތީގެ އަގު އުފުލޭ ކަމަށާއި އެކަމަކު މި އަހަރު ބައެއް ބާވަތްތަކުގެ އަގު އާދަޔާ ހިލާފަށް ބޮޑުވެފައިވާކަން ފާހަގަ ކުރާ ކަމަށެވެ.

"...މިކަމުން ރައްޔިތުންނަށް ދިމާވާނެ ދަތިކަން އިހުސާސްވާ ހާލު އަޅުގަނޑުމެންގެ ކުންފުނިން ވިއްކަމުންދާ ހުރިހާ މުދަލެއްގެ އަގު ރަމަޟާން މަސް ނިމެންދެން ބެހެއްޓޭނެ އެންމެ ހެޔޮ އަގުގައި ހިފަހައްޓާނެ ކަމުގެ ޔަގީންކަން އަރުވަމެވެ،" ސޯޝަލް މީޑިއާގައި ހެޕީ މާކެޓުން ޖެހި ބަޔާނުގައި ބުނެފައި ވެ އެވެ.

ހެޕީ މާކެޓުން ވަކިން ހާއްސަކޮށް އަގުހެޔޮ ކުރާނެ ބާވަތްތަކެއް ވަނީ ފާހަގަކޮށްފަ އެވެ. އެގޮތުން ފާހަގަކޮށްފައި ވަނީ ކުކުޅާއި ކުކުޅުގެ ބައިތަކާއި ބިހެވެ.

ތަކެތީގެ އަގު ހެޔޮކުރަން ހެޕީ މާކެޓުން ވަނީ ރާއްޖޭގެ އެހެން ވިޔަފާރިވެރިންނަށް ވެސް ގޮވާލައިފަ އެވެ.

ރޯދަ މަސް ފެށުނު އިރު ބާޒާރުގައި އެންމެ އަގު ބޮޑުވެފައި ވަނީ މިރުހާއި މަހެވެ. ކަނޑޫދޫ މިރުސް ކިލޯއެއްގެ އަގު 1000 އަށް ވުރެ މަތީގައި ހުރި އިރު މަސް ވެސް ހުރީ ކިލޯއެއް 40 އާ 50 އާ ދޭތެރޭގެ އަގުތަކެއްގަ އެވެ.