އެފްރިކާގެ އެންމެ އުސް އިމާރާތް އަންނަ މަހު ހުޅުވަނީ

އެފްރިކާގެ އެންމެ އުސް އިމާރާތް އަންނަ މަހު ހުޅުވަން ނިންމައިފި އެވެ. ދެކުނު އެފްރިކާގެ ސޭންޑްޓަންގައި ބިނާކޮށްފައިވާ 55 ބުރީގެ މި އިމާރާތުގެ އުސްމިނުގައި ހުންނަނީ 234 މީޓަރު (768 ފޫޓް) އެވެ. "ލިއޮނާޑޯ" ގެ ނަމުގައި މި އިމާރާތް ތަރައްގީކޮށްފައި ވަނީ ދެކުނު އެފްރިކާގެ ލެގަސީ ގްރޫޕާއި ނެޑްބޭންކް ޕްރައިވެޓް ލިމިޓެޑް ގުޅިގެންނެވެ. މަތީ ފެންވަރުގެ ގިނަ ހިދުމަތްތަކެއް ލިބޭ ގޮތަށް ހަދާފައިވާ އިމާރާތުގައި އޮފީސްތަކާއި މޯލްތަކާއި ރެސްޓޯރަންޓާއި ޖިމާއި ހާބް ގާޑަން އާއި 254 އެޕާޓްމަންޓް ވެސް ހިމެނޭނެ އެވެ. އެގޮތުން އެތަނުގައި ތިން ފްލޯގެ ޕެންޓްހައުސްތައް ވެސް ހުންނާނެ އެވެ.

ތިން ބިލިއަން ރޭންޑް (203 މިލިއަން ޑޮލަރު)ގެ "ލިއޮނާޑޯ" ފަރުމާކޮށްފައި ވަނީ ޖޮހެނެސްބާގްގެ ކޯ-އާކް އިންޓަނޭޝަނަލް އާކިޓެކްޓްސްއިންނެވެ. "ލިއޮނާޑޯ" ގެ ޖެނެރެލް މެނޭޖަރު އެޑްރިއަން ލޭންޑްރީ ވިދާޅުވީ އެތަނުގެ އެޕާޓްމަންޓްތައް ކުއްޔަށް ދޫކުރުމުގެ އިރުރަށް ވިއްކަން ވެސް ހަމަޖެހިފައިވާ ކަމަށެވެ. އަދި އެޕާޓްމަންޓްތައް ގަންނަން ބޮޑު ތަރުހީބެއް ލިބެމުން ދިޔަ ނަމަވެސް އެޕާޓްމަންޓްތައް ވިއްކާގެ ސީދާ އަގެއް ވިދާޅެއް ނުވެ އެވެ. އެކަމަކު ގިނަ އެޕާޓްމަންޓްތައް މިހާރު ވިކިފައިވާ ކަމަށްވެ އެވެ.

އެފްރިކާގެ އެންމެ އުސް އިމާރާތުގެ މަގާމު ލިއޮނާޑޯ ހޯދާ އިރު، މި ވަގުތު ރަސްމީކޮށް ބޭނުން ކުރަމުން އަންނަ އެފްރިކާ ބައްރުގެ އެންމެ އުސް އިމާރަތަކީ ޖޮހެނެސްބާގްގައި ހުންނަ 55 ބުރީގެ ކާލްޓަން ސެންޓަރެވެ. އެތަނުގެ އުސްމިނަކީ 223 މީޓަރު (732 ފޫޓް) އެވެ.