އެމެރިކާގެ ފިޓްނަސް މަޖައްލާއެއްގެ ކަވަރަށް ބުރުގާ އެޅި ދުވުންތެރިއެއް

އެމެރިކާގެ ފިޓްނަސް މަޖައްލާއެއްގެ ކަވަރުގައި ފީޗާކުރި، ބުރުގާ އެޅި ފުރަތަމަ މީހާގެ ގޮތުގައި ދުވުންތެރިޔާ ރާހަފް ހާތިބް "ވިމެންސް ރަނިން" ގައި ފީޗާކޮށްފި އެވެ.

އުމުރުން 32 އަހަރުގެ ރާހަފް އަކީ ސީރިއާގެ ވެރިރަށް ދިމިޝްގަށް އުފަން، އެމެރިކާގެ މިޝިގަންގައި ދިރިއުޅޭ މީހެކެވެ. އޭނާ އެމެރިކާއަށް ހިޖުރަކުރީ 80ގެ އަހަރުތަކުގަ އެވެ.

ރާހަފް ފުރަތަމަ ދުވަން ފެށީ އޭނާގެ ޖިމް ކްލާސްތަކުގައި ފޫހިވެގެން ކަމަށް އޭނާ ބުންޏެވެ. ތިން ކުދިންގެ މަންމައެއް ކަމަށްވާ ރާހަފް، އޭގެ ފަހުން ހަ މެރެތަން އަދި ދެ ޓްރައިތޮލޮންގައި ބައިވެރިވެފައިވެ އެވެ.

"ރަން ލައިކް އަ ހިޖާބީ" އަކީ ރާހަފްގެ އިންސްޓަގްރާމް ޕޭޖެވެ. އަދި އޭނާގެ މަގްސަދަކީ މުސްލިމު އަންހެނުން ރާހަފް ގޮތަށް ދުވެ، ބައިނަލްއަގްވާމީ މެރަތޮންތަކުގައި ބައިވެރި ވުމެވެ. އޭނާގެ އިންސްޓަގްރާމް ޕޯސްޓުތަކަށް ބަލައިލުމުން ކޮންމެ މީހަކަށްވެސް ހިތްވަރު ލިބޭނެ އެވެ.

"ދުވުމުން ހަށިގަނޑުގެ ހަކަތަ އިތުރު ކޮށްދޭ އަދި އީމާންކަން ވެސް އިތުރުވޭ. ދުޅަހެޔޮ ސިއްހަތެއްގައި ހުރުމަށް އިސްލާމް ދީނުގައި ވެސް އަންގަވާފައިވޭ،" ވިމެންސް ރަނިން މަޖައްލާއަށް ރާހަފް ކިޔައިދިނެވެ.

ހުޅަނގުގެ ގައުމުތަކުގައި، ބުރުގާ އެޅި މެރަތަން ދުވުންތެރިންނަކީ އާއްމުކޮށް ފެންނަ ބައެއް ނޫނެވެ. ރާހަފް މެރަތަންތަކުގައި ދުވަން ފެށީންސުރެ، މީހުން އެންމެ ގިނައިން ކުރާ ސުވާލަކީ "ހޫނުވޭތޯ" ކަމަށް ރާހަފް ބުނެ އެވެ. އޭނާ ބައިވެރިވި ރޭސްތަކުގައި އެންމެން ވެސް އޭނައަށް ނުވަތަ މުސްލިމުންނަށް އެއްވެސް ތަފާތުކުރުމެއް ނުގެންގުޅޭ ކަމަށް ރާހަފް ބުންޏެވެ.

ދުވުމަކީ އޭނާ އެންމެ ކުރާހިތްވާ ކަމެވެ. އަދި މުސްތަގުބަލުގައި މި ރޮނގުން އޭނާ ކުރިއަށްދާން ބޭނުންވާކަމަށް ވެސް ބުނެފައިވެ އެވެ. ވިމެންސް ރަނިން ފަދަ މަޝްހޫރު ފިޓްނަސް މަޖައްލާއެއްގެ ކަވަ ތަރިއަކަށް ވުމުން ރާހަފް ވަރަށް އުފާވި ކަމަށް ބުންޏެވެ.

"މިއީ އަހަރެންގެ ދަރިންނަށް، މުސްލިމުންނަށް އަދި ހާއްސަކޮށް އަހަރެންގެ މައިންބަފައިންނަށް ފަހުރުވެރިކަމާ އެކު ދައްކާލެވޭނެ އެއްޗެއް،" ރާހަފް ބުންޏެވެ.