ނާސާ އިން "ޓްރާންފޯމާ" ރޮބޮޓެއް ޓައިޓަން އަށް ފޮނުވަން މަސައްކަތްކުރަނީ

އަހަރެމެންގެ އިރުގެ ނިޒާމުގައި، ސެޓާން އަކީ ހަ ވަނަ ޕްލެނެޓް އެވެ. ސެޓާން ވަށައިގެން 62 ހަނދު އެނބުރޭ ކަމަށް ވެ އެވެ. މި އަދަދު އަދި އިތުރުވެދާނެ ކަމަށް ވެސް ސައިންސްވެރިން ބުނެ އެވެ. ސެޓާން އަށް ލިބިގެންވާ ހަނދުތަކުގެ ތެރެއިން، އެންމެ ބޮޑީ "ޓައިޓަން" އެވެ.

ޓައިޓަންއާ ބެހޭ ގޮތުން ހޯދައި، ދަސްކުރުމަށް އުޅަނދެއް ފޮނުވުމަކީ ސައިންސްވެރިން ދެކޭ ހުވަފެނެކެވެ. ނަމަވެސް، ޓައިޓަން އަށް ފޮނުވަން ކަމުދާ ޒާތުގެ އުޅަނދެއް، އަދިވެސް ކަށަވަރެއް ނުވެ އެވެ. ޑިޒައިނަރުން ކުރަހަނީ އެވެ. އުޅަނދަކާ ބެހޭ ގޮތުން މިހާރު ކުރެވޭ ފިކުރަކީ، ޓްރާންފޯމާ ފިލްމުތަކުން އެ ފެންނަ ޒާތުގެ، ބައްޓަން ބަދަލުކުރެވޭ، ރޫޅައި ރޭވޭ ޒާތުގެ ރޮބޮޓެކެވެ.

ސައިންސްވެރިންގެ ވިސްނުން ހުރީ މި ކަހަލަ ގޮތަކަށެވެ. އުޅަނދު ބިމުން ފުރައިގެން ދަތުރުކޮށް ދާންވީ އެވެ. އެކި ފަހަރު އެކި ބައްޓަމަށް ބަދަލުކުރަމުންނެވެ. ޓައިޓަން އަށް ދެވުނު ދުވަހަކުން، އެ ތަނުގައި ވެސް އުޅަނދު ހަރަކާތްތެރި ވާނީ، ރޫޅައި އަދި ރޭވޭ ޒާތުގެ "ލެގޯ ބްލޮކް"ތަކެއް ފަދައިންނެވެ. އެއީ ބައެއް ފަހަރު، މަގު ހިނގާ ރޮބޮޓެކެވެ. ބައެއް ފަހަރު ޑްރޯންއެކެވެ. ބައެއް ފަހަރު އެނބުރޭ ފުރޮޅެކެވެ.

ޓައިޓަން އަށް ފޮނުވާ އުޅަނދަކާ ބެހޭ ގޮތުން ދެކެވޭ ވާހަތަކުގައި، ޓައިޓަން އަށް މައި އުޅަނދެއް ފޮނުވުމާ ބެހޭ ގޮތުން ވެސް މަޝްވަރާކުރެވެ އެވެ. މައި އުޅަނދު ދަތުރުކޮށް ދާނީ ކުދި ރޮބޮޓްތަކެއް ގޮވައިގެންނެވެ. ޓައިޓަން އަށް ދެވުމުން، ކުދި ރޮބޮޓްތައް އެކުވެ، އެކަތިގަނޑަކަށް ރާވާލެވެ އެވެ. އަދި މައި އުޅަދު ދޫކޮށް ޓައިޓަން ތެރޭގައި ދަތުރުކޮށް ސާމްޕަލް ހޯދައި ގެނެވެ އެވެ. ރޮބޮޓްތައް ވަކިވަކިން އެކި ސަރަހައްދުތަކަށް ގޮަސް ސާމްޕަލް ނެގުމަކީ ވެސް ވިސްނުމެކެވެ.

މިއީި އަޑުއަހާލަން ފަސޭހަ ވާހަކައެއް ނަމަވެސް، އަމަލީ ސިފަޖެހޭނެ ދުވަހެއް ވެސް އެނގޭ ކަމެއް ނޫނެވެ. ރޫޅާ ރާވާ ރޮބޮޓެއް ޓައިޓަން އަށް ފޮނުވަން ބޭނުންވާ ޓެކްނޮލޮޖީ މި ޒަމާނުގައި ހުރި ނަމަ ވެސް، އުޅަނދު ފުރިހަމަކުރަން ނަގާނެ ވަގުތު ބުނެދޭކަށް އަދި ނޭނގެ އެވެ.