ފަހުގެ އަތްދަބަސް ޓްރެންޑްގައި ތަފާތު ކަމެއް

ފެޝަން ވީކަކީ ހަމައެކަނި ތަފާތު ހެދުންތަކެއް ދައްކާލާ ހަފުތާއެއް ނޫނެވެ. އެކި ޒާތުގެ ހެދުން ޑިޒައިންތަކުގެ އިތުރުން މުސްތަގުބަލުގައި މަގުބޫލުވާނެ ފެޝަން ޓްރެންޑްތަކުގެ ފެށުން ވެސް އަންނަނީ ފެޝަން ވީކްތަކުންނެވެ.

މިއަހަރުގެ ސްޕްރިން ސަމަ ފެޝަން ވީކް ނިޔު ޔޯކް، ލަންޑަން، މިލާން އަދި ޕެރިސްގައި ހިނގަމުން ދާއިރު އެކި ވައްތަރުގެ ޓްރެންޑްތައް ފާހަގަވި އެވެ. އޭގެ ތެރެއިން ސްޓައިލިޝް ގޮތްގޮތަށް ފަރުމާކޮށްފައިވާ އެކި ވައްތަރުތަކަށް ބަދަލުކޮށްލެވޭ އަތް ދަބަސް "ސްޓްރެޕްސް" ހިމެނެ އެވެ.

ފެޝަން ބްރޭންޑު ފެންޑީ އާއި ވެލެންޓީނޯ ފުރަތަމަ ތައާރަފު ކުރި "ރިމޫވަބްލް ގިޓާ ސްޓްރެޕްސް" މިއަހަރުގެ ސްޕްރިން ސަމާ ފެޝަން ވީކްގައި އެހެން ބްރޭންޑުތައް ވެސް ބޭނުންކޮށްފައިވެ އެވެ. އަތްދަބަހަކީ ކޮންމެ ދުވަހަކު ބޭނުންކުރާ އެކްސެސަރީ އެކެވެ. އަދި ރީތި އަތްދަބަހެއްގެ އަގު ހެވެއް ނުވާނެ އެވެ.

ސްޓްރެޕް ނުވަތަ ދަބަހުގެ ވާގަނޑު ބަދަލުކޮށްލެވޭ ގޮތަށް ހުރުމަކީ ކޮންމެ ފަހަރަކު އާ އަތްދަބަހެއް ގަތުމުގެ ބަދަލުގައި، އަތްދަބަސް އާކޮށްލެވޭނެ ފަސޭހަ އަދި ސްޓައިލިޝް ގޮތެއް ކަމަށް ޕޮޕްޝުގާ ފަދަ އެކި ސްޓައިލް މަޖައްލާ ތަކުން ބުނެފައިވެ އެވެ. މި ސްޓްރެޕްތައް ފަރުމާކޮށްފައި ވަނީ ފަލަކޮށް، މިޔުޒިކު ކުޅޭ ގިޓާއެއްގެ ވާގަނޑު ގޮތަށެވެ. އަދި ސްޓްރެޕްގައި އެކި ވައްތަރުގެ ސްޓަޑް އަދި މިނާ އެކި ކުލަތަކުން ޖަރީކޮށްފައިވެ އެވެ.

ރެބެކާ މިންކޮފް، އަންޔަ ހިންޑްމާކް، ވަސަޗޭ އަދި ޑޮލްޗޭ އެންޑް ގައްބާނާގެ ފެޝަން ޝޯގައި މި ޓްރެންޑް ވަރަށް ހިތްގައިމުކޮށް ހުށަހަޅާދީފައިވެ އެވެ. އަދި ގިނަ ޝޯތަކުގައި އަތްދަބަހުގެ ވާގަނޑު ފަލަކޮށް ފަރުމާކޮށްފައިވާކަމަށް ފާހަގަވެ އެވެ. މިއަންނަ އަހަރުވެސް އެންމެ ގިނައިން ފެންނާނެ އަތްދަބަހަކީ ފަލަ ސްޓްރެޕް ހުންނަ ދަބަސް ކަމަށް ގިނަ ފެޝަން ރިޕޯޓްތަކުގައި ބުނެފައިވެ އެވެ.