ޖޯކް ޖެހިޔަސް ޓެސްލާގެ "ސައިބަޓްރަކް" އަށް 200،000 އޯޑަރު

ވަރަށް ޒަމާނީ އަދި އެހާމެ ވަރުގަދަ އުޅަނދެއްގެ ގޮތުގައި އީލޮން މަސްކްގެ ޓެސްލާ އިން މިދިޔަ ހަފުތާގައި ދައްކައިލި އާ އުޅަނދު "ސައިބަޓްރަކް" އަށް މިހާތަނަށް 200،000 އަށް ވުރެ ގިނަ އޯޑަރު ލިބިފައިވާ ކަމަށް ބުނެފި އެވެ.

އީލޮން ކުރި ޓްވީޓެއްގައި ބުނީ މިދިޔަ ބުރާސްފަތި ދުވަހުން ފެށިގެން އާ އުޅަނދުގެ ޕްރި-އޯޑަރަށް ހުޅުވާލާފައިވާ އިރު، ހޯމަ ދުވަހާ ހަމައަށް 200،000 އޯޑަރު ލިބިފައިވާ ކަމަށެވެ.

ވަޒަން ނާރާ ވަރުގަދަ ބިއްލޫރި ދޮރުތައް ވެސް ހިމެނޭ އެއްޗެއް ކަމަށް ބުނެ "ސައިބަޓްރަކް" ބުރާސްފަތި ދުވަހު ދައްކައިލަން ކެލިފޯނިއާގައި ބޭއްވި ހަފުލާގެ ތެރޭގައި ދަގަނޑު ބޯޅައަކުން އުޅަނދުގެ ބިއްލޫރިގަނޑުގައި ޖެހުމުން ރެނދުލައި، ފޫއަޅަައިގެން ދިއުމުން ވަރަށް ގިނަ ބަޔަކު ވަނީ ޓެސްލާ އާއި އީލޮން އަށް މަލާމާތްކޮށް، ޖޯކް ޖަހައިފަ އެވެ.

މިކަމާ ގުޅިގެން އީލޮން ބުނީ އެއީ މައްސަލައެއް ނޫން ކަމަށާއި ކޮންމެ އެއްޗެއްގައި ވެސް އިތުރަށް ރަނގަޅުކުރަން ޖެހޭ ކަންކަން ހުންނާނެ ކަމަށެވެ. އެހެންވެ 2021 ގެ ފަހުކޮޅު "ސައިބަޓްރަކް" ނެރޭ އިރު، ފެންވަރު ރަނގަޅު އުފެއްދުމަކަށް ވާނެ ކަމަށް ގެރެންޓީ ދޭ ކަމަށް ބުންޏެވެ.

މި އުޅަނދުގެ ވިއްކާ އަގު ފެށެނީ 39،900 ޑޮލަރުންނެވެ.

"ސައިބަޓްރަކް" އަށް އަމާޒުވި ފާޑުކިޔުންތަކާ އެކު ޓެސްލާގެ ހިއްސާގެ އަގު ވެސް މި ހަފުތާގެ ކުރީކޮޅު 6.1 ޕަސެންޓް ދަށްވެ، ކުންފުންޏަށް 768 މިލިއަން ޑޮލަރުގެ ގެއްލުމެއް ލިބިފައިވެ އެވެ.