ގުރުއާން އެސެސްކުރާ ގޮތަށް އަނެއްކާ ވެސް ބަދަލު ގެނެސްފި

އެސްއެސްސީ އިމްތިހާނުގައި ގުރުއާން އެސެސްކުރާ ގޮތަށް ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ) އިން އަނެއްކާ ވެސް ބަދަލު ގެނެސްފި އެވެ.

މިއަހަރު، ފުރަތަމަ ފަހަރަށް އެސްއެސްސީ އިމްތިހާނުގައި ގުރުއާން ހިމަނައި ދަރިވަރުންނަށް ކުއްލިއަކަށް ބޮޑެތި މަސައްކަތްތަކެއް ހަވާލުކުރުމުން ބެލެނިވެރިން ކަންބޮޑުވުން ފާޅުކުރި އެވެ. އެއާއެކު ދެ އެސައިމަންޓުގެ ބަދަލުގައި އެއް އެސައިމަންޓު ހުށަހަޅަންޖެހޭ ގޮތަށް ބަދަލުކުރި އެވެ.

އޭގެ ފަހުން ގުރުއާނުން ހިތުން ކިޔެވުމުގެ ބައިން ކުރާ ސުވާލުތައް ވެސް ބަދަލުކުރި އެވެ. ކުރިިން ހަމަޖައްސާފައި އޮތީ މުއްދަސިރް ސޫރަތުން ފެށިގެން ނާސި ސޫރަތުގެ ނިޔަލަށް ސުވާލުކުރާށެވެ. ނަމަވެސް ފަހުން ވަނީ ސޫރަތުއް ޟުހާ އިން ފެށިގެން ނާސި ސޫރަތުގެ ނިޔަލަށް ކިޔަވަން ޖެހޭ ގޮތަށް ހަމަޖައްސައިފަ އެވެ.

ބަލައިގެން ކިޔުން އޮންނާނީ ކުރިން ވެސް ހަމަޖައްސާފައި އޮތްގޮތަށް، ޒުމަރު ސޫރަތުން ފެށިގެން ނާސި ސޫރަތުގެ ނިޔަލަށެވެ.

އެ ބަދަލާއެކު ގުރުއާނުގައި ހިމެނޭ ކިޔެވުމުގެ ބައި އިމްތިޚާނުކޮށް އޮގަސްޓް 31 ވަނަ ދުވަހު ނިންމަންޖެހެ އެވެ.

ބަލައިގެން ގުރުއާން ކިޔެވުމަށް 40 ޕަސެންޓް، ހިތުން ކިޔެވުމަށް 20 އަދި އެސެސްމަންޓަށް ކަނޑައަޅާފައިވަނީ 40 ޕަސެންޓެވެ.

ޑީޕީއީ ހިންގުމާ ހަވާލުވެހުންނެވި ޑެޕިއުޓީ މިނިސްޓަރު މުހައްމަދު އިހުސާން ސޮއިކުރައްވައި ސްކޫލުތަކަށް އިއްޔެ ފޮނުއްވި ސިޓީއެއްގައި ވިދާޅުވީ، ގުރުއާންގެ އިތުރުން އިސްލާމާއި ދިވެހި ބަސް އިމްތިހާނު ކުރާ ގޮތަށް ބަދަލު ގެންނަން ނިންމާފައިވާ ކަމަށެވެ.

ގުރުއާންގެ ދަށުން ހަދަންޖެހޭ އެސައިމަންޓުގެ ސުވާލު މިހާރު ވަނީ ގައިޑެޑް ސުވާލަކަށް ބަދަލުކޮށް، ކުރިން ސުވާލު އޮތްގޮތަށް ވުރެ ފަސޭހަ ކޮށްފަ އެވެ. އެސައިމަންޓުގައި ރިފަރެންސް ނުދޭގޮތަށް ނިންމާފައިވާ ކަމަށް ވެސް ސިޓީގައި ބުންޏެވެ.

އެ މާއްދާގެ އިތުރުން އިސްލާމް މާއްދާގައި ޕޭޕަރު އެކެއްގައި އިހުތިޔާރީ ސުވާލު ދިނުމުގެ ބަދަލުގައި ދިނުމަށް ހަމަޖައްސާފައިވަނީ ކަނޑައެޅޭ ވަކި ސުރުހީތަކަކުން ކުރު ޖަވާބުދޭ ސުވާލެވެ. އަދި ދިވެހި މާއްދާގައި ހަދަންޖެހޭ ކޯސް ވޯކް މިއަހަރު ނުދޭގޮތަށް ވަނީ ނިންމައިފަ އެވެ.

"ނަމަވެސް މިހާރު ތައްޔާރުކޮށްފައިވާ ޓޭބަލް އޮފް ސްޕެސިފިކޭޝަނަށް ބައެއް ބަދަލުތައް ގެނެސް، ނަމޫނާ ކަރުދާހާއެކު ފެބްރުއަރީ މަހުގެ 15 ވަނަ ދުވަހުގެ ކުރިން ސުކޫލުތަަކަށް ފޮނުވޭނެ ވާހަކަ ދެންނެވީމެވެ،" ސިޓީގައި ވެ އެވެ.

އެޑިއުކޭޝަން މިނިސްޓްރީން މި ގެނައި ކުއްލި ބަދަލުތަކާ މެދު ކަންބޮޑުވުން ފާޅުކޮށް، ސްކޫލަކުން ވާހަކަދެއްކެވި އޮފިޝަލަކު ވިދާޅުވީ، ދަރިވަރުން އިމްތިހާނުކުރަންޖެހޭ ގޮތަށް ބަދަލު މި ގެންނަނީ ދުރާލާ ތައްޔާރުވެފައި ނެތުމުން ކަމަށެވެ. ކުއްލިއަކަށް މި ގެންނަ ބަދަލުތަކުގެ ގެއްލުން ލިބެނީ ދަރިވަރުންނަށް ކަމަށް ވެސް އޭނާ ވިދާޅުވި އެވެ.

"މިއީ މިކަން އޮންނަން ޖެހޭ ގޮތެއް ނޫން،" އޮފިޝަލަކު ވިދާޅުވި އެވެ.

އޭނާ ވިދާޅުވީ ގުރުއާން އެސެސްކުރުމާއި އެސްއެސްސީ އިމްތިހާނަށް ބަދަލު ގެނައިރު، އެ ޕޭޕަރުތައް އޮންނަގޮތެއް ޓީޗަރުން އަދި ދަރިވަރުންނަށް ވެސް ނޭނގޭ ކަމަށެވެ.