މުއާއާ އިންނަން އައްޒަގެ ރަނަކީ 30ރ.

ފިލްމީ ތަރިން ކަމަށްވާ މަރިޔަމް އައްޒަ އާއި އަބްދުﷲ މުއާޒް (މުއާ) އިންނަން މިއަދު ރަން ކިޔައިފި އެވެ.

އައްޒަގެ އާއިލާ ދިރިއުޅޭ ވިލިމާލޭ އަތިރިމަތީގައި ދިވެހި ސަގާފީ ގޮތަކަށް ބޭއްވި ރަން ކިއުމުގެ ހަފުލާ ވަރަށް ކުލަގަދަކޮށް ބާއްވާފައި އިރު، ދެ ފަރާތުގެ އާއިލާގެ މީހުން ބައިވެރިވެފައިވެ އެވެ.

މުއާ އާއި އައްޒަ ކައިވެނިކުރަން ރަން ކީ ދެ މީހުން ރައްޓެހިވެގެން އުޅޭތާ ދެ އަހަރެއްހާ ދުވަސް ފަހުންނެވެ. އަޑުތައް އަރާފައިވާ ގޮތުން ދެ މީހުންގެ މެދުގައި ހާއްސަ ގުޅުމެއް އުފެދި، އެ ގުޅުން ލޯތްބަށް ބަދަލުވީ މުއާ ޑައިރެކްޓްކޮށް، އައްޒަ ޓައިޓްލް ރޯލް ކުޅެ މިދިޔަ އަހަރު ގެނެސްދިން "ލީނާ" ޝޫޓްކުރި ދުވަސްވަރު އެވެ.

އެ ދެ މީހުން ރަން ކީ ނަމަވެސް ކައިވެނިކުރާނެ ތާރީހެއް އަދި އިއުލާނެއްނުކުރެ އެވެ. އައްޒަ އާއި މުއާ ވެސް ކުރިން ކައިވެނިކޮށް، ދަރިން ލިބިފައިވެ އެވެ.

އައްޒަ ކުރިން ކައިވެނިކުރީ އެކްޓަރު/ޑިޒައިނަރު އިސްމާއީލް ޖުމާހް (ޖުމާ) އާ އެވެ. މުއާ ކައިވެނިކުރީ ޕީއެސްއެމްގެ ކުރީގެ ޑެޕިއުޓީ މެނެޖިން ޑިރެކްޓަރު ޝާޔަން ޝާހިދާ އެވެ.

މުއާ އާއި އައްޒަ ކައިވެންޏަށް ތައްޔާރުވަމުން އަންނަ އިރު، ބައިސްކޯފުން މިހާރު ސްޓްރީމްކުރާ ފާތުމަތު ނަހުލާގެ ވެބް ސީރީޒް "ހުވާ" ގެ ދެވަނަ ސީޒަނުން ވެސް ދެ މީހުން ޖޯޑެއްގެ ގޮތުގައި ފެންނާނެ އެވެ. އޭގައި މުއާ ކުޅެނީ އައްޒަގެ މިހާރުގެ ޅިޔަނު ރަވީ ފާރޫގް ކުޅުނު އާޒިމްގެ ކެރެކްޓާ އެވެ. ރަވީ އަކީ އައްޒަގެ ދައްތަ އަދި ބަަތަލާ އައިޝަތު ރިޝްމީގެ ފިރިމީހާ އެވެ.