އައްޑޫ އޮތީ މާޔޫސްވެ، ޝަކުވާތަކުގައި: ޝިޔާމް

މި ސަރުކާރުގެ ދޯހަޅި ސިޔާސަތުތަކުގެ ސަބަބުން އައްޑޫ އޮތީ މާޔޫސްވެ، ޝަކުވާތަކުން ފުނިޖެހިފައި ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ ޕީޕީއެމްގެ މެމްބަރު އަހުމަދު ޝިޔާމް ރޭ ވިދާޅުވެއްޖެ އެވެ.

އަންނަ އޭޕްރީލް މަހު ބާއްވާ ލޯކަލް ކައުންސިލްތަކުގެ އިންތިހާބަށް އިދިކޮޅު ޕީޕީއެމާއި ޕީއެންސީން ކުރިއަށް ގެންދާ ކެމްޕޭނުގެ ތެރެއިން، އައްޑޫ ހުޅުދޫގައި ބޭއްވި ޖަލްސާގައި ޝިޔާމް ވިދާޅުވީ، އައްޑޫ ރައްޔިތުންގެ ވާހަކަތައް އެއްސެވުމުން އިވިވަޑައިގަތީ މުޅިން ވެސް ޝަކުވާތަކާއި މާޔޫސްކަމުގެ ވާހަކަތައް ކަމަށެވެ. އަދި އިބްރާހީމް މުހައްމަދު ސޯލިހްގެ ސަރުކާރުގައި އައްޑޫގެ ތަރައްގީ އާއި ކުރިއެރުމަށް ހަރުދަނާ ޕްލޭންތަކެއް ނެތް ކަމަށް ވިދާޅުވި އެވެ.

ޝިޔާމް ވިދާޅުވި ގޮތުގައި، މި ސަބަބުތަކާ ހެދި އައްޑޫ ރައްޔިތުންނަށް ދެން އޮތް އުންމީދަކީ އޭޕްރީލް ހަތަރެއްގައި ބާއްވާ ލޯކަލް ކައުންސިލްތަކުގެ އިންތިހާބުގައި ޕީޕީއެމްގެ ޓިކެޓްގައި ވާދަކުރައްވާ ކެންޑިޑޭޓުންނަށް ވޯޓް ދީގެން އެ މީހުންނާ އެކު މަސައްކަތް ކުރުމެވެ.

"އެހެންވީމާ އަޅުގަނޑުމެން ބޭނުންވަނީ މި ޝަކުވާތަކަށް ހައްލު،" ޕީޕީއެމްގެ ނައިބު ރައީސްކަން ކުރައްވާ ޝިޔާމް ވިދާޅުވި އެވެ.

އޭނާ ވިދާޅުވީ ރައްޔިތުންގެ މަޖިލީހުގައި ސުޕަ މެޖޯރިޓީއާ އެކު، މި ސަރުކާރު މާ ބާރުގަދަ ސަރުކާރެއްގެ ގޮތުގައި އޮތުމުން ފެނިވަޑައިގަންނަވަނީ ރައްޔިތުންނަށް ކޮށްދޭންޖެހޭ ކަންތައްތަކުގައި ވެސް ފަރުވާކުޑަ ކުރާތަން ކަމަށެވެ. "ރައްޔިތުންގެ މާލިއްޔާ އިން ފައިސާ ނަންގަވައިގެން ހުރިހާ ބޭފުޅުން ވެސް ނިދިކުރައްވާ ތަން އަޅުގަނޑުމެންނަށް ފެންނަނީ. އަޅުގަނޑުމެން މި ކުރަން އުޅޭ ކަމަކީ މި ބޭފުޅުން ނިދިން ހޭލައްވާނެ ބަޔަކު ރައްޔިތުންގެ މަންދޫބުންގެ ގޮތުގައި ގެނެސްދިނުން،" ޝިޔާމް ވިދާޅުވި އެވެ.

އޭނާ ވިދާޅުވި ގޮތުގައި، ރައްޔިތުންގެ ހައްގުތައް ހޯދައި ދިނުމަށް ރައީސް އިބްރާހީމް މުހައްމަދު ސޯލިހުގެ ސަރުކާރަށް ގޮވާލައި އެކަމަށް ވަނީ ގިނަ މަސައްކަތްތަކެއް ކުރަން ޖެހިފަ އެވެ.

"ރައްޔިތުންނަށް ކަންކަން ކޮށްދޭނެ ކަމަށް ބުނެ އައި ސަރުކާރު ނިދާފައި އޮތީމަކާ ރައްޔިތުންނަށް ހައްގުވާ މިންވަރެއް ނުލިބޭ. އެހެންވީމާ މިއަދު މި އޮތީ މި ކަންތައް ކޮށްދިނުމުގެ ވާޖިބު ނުވަތަ އެ ޒިންމާ އަޅުގަނޑުމެންގެ ބޮލުގައި އެޅިފައި،" އޭނާ ވިދާޅުވި އެވެ.

"އަޅުގަނޑުމެން މި ތިބީ އެކަން ކުރަން."

ޝިޔާމް ވިދާޅުވީ މަޖިލީހުގައި ވެސް އިދިކޮޅު މެމްބަރުން ކިތަންމެ މަދުން ތިއްބެވިޔަސް އެ ބޭފުޅުން ކުރައްވާ ކަމަކީ މި ސަރުކާރަށް ރައްޔިތުންގެ ޝަކުވާތަކާއި އުދާސްތައް އަޑުއިއްވުން ކަމަށެވެ. ނަމަވެސް ސަރުކާރުން މިހާތަނަށް ވަމުން ދިޔަ އެއްވެސް ވައުދެއްގައި ކުލަޖެހޭ ތަން ނުފެން ކަމަށް ވިދާޅުވި އެވެ.

"އެ އިން އެއްވެސް ކަމެއް ނުކޮށް ދުވަސްތައް މި ސަރުކާރުން ގުނަމުންދާ ތަން އަޅުގަނޑުމެންނަށް ފެންނަނީ." ޝިޔާމް ވިދާޅުވި އެވެ.

"...އެހެންވީމާ މިއަދު އަޅުގަނޑު މި ސުވާލު ކުރަނީ އެމްޑީޕީގެ ވެރިކަން ގެނައުމަށްޓަކައި މަސައްކަތްކުރި އެމްޑީޕީގެ ސަޕޯޓަރުންނާއި އެ ވެރިކަން ގެނައުމަށް މަސައްކަތް ކުރެއްވި ބޭފުޅުންގެ އަރިހުން މިއީތޯ ތި ބޭފުޅުން ގެންނަން ބޭނުންވި ވެރިކަމަކީ؟ ތި ބޭފުޅުން ހާސިލް ކުރަން ބޭނުންވި ކަންކަން މި ސަރުކާރަށް ހާސިލްކޮށް ދެވޭތޯއޭ؟"

ޝިޔާމް ވިދާޅުވީ، ކޮންމެ ދިމާލަކުން ވެސް މިއަދު އިވެނީ މި ސަރުކާރުން ވި ވައުދުތައް ނުފުއްދާ ވާހަކަ އާއި ރައްޔިތުންނާ ދޭތެރޭ އިހުމާލުވަމުންދާ ކަމުގެ ވާހަކަތެކެވެ. އެހެންވެ، ލޯކަލް ކައުންސިލްތަކުގެ އިންތިހާބުގައި އެމްޑީޕީގެ ކެންޑިޑޭޓުންނަށް ވޯޓް ދޭން ޖެހޭ ސަބަބެއް ވެސް ނެތް ކަމަށް ވިދާޅުވި އެވެ.

"ރައްޔިތުންގެ އުންމީދުތައް މި ސަރުކާރަށް ހާސިލުކޮށް ނުދެވިގެން އުޅެނީ ކޯޗެއް މަދުވެގެންތޯ؟ މި ކަހަލަ ސަބަބުތައް ހުރީމާ އަހަރެމެން ކުރަންޖެހޭ ކަމަކީ މި ސަރުކާރު ނިދިން ހޭލައްވާނެ ބަޔަކު އެކި ކަންކޮޅުތަކުން އަޅުގަނޑުމެން އިންތިހާބުކުރުން،" ޝިޔާމު ވިދާޅުވި އެވެ.

"އެހެންނޫނީ މާދަމާ މި ރާއްޖެ އަހަރެމެންނަށް ފެންނާކަށް ނެތް."