ޔޫޓިއުބުން ބައި ގަރުނަށް ޖަލަށް!

ޔޫޓިއުބްގައި މަގުބޫލުކަން ހޯދި މެކްސިކޯގެ ޒުވާނެއް ކަމަށްވާ ޖާމަން އަބްރަހަމް ލޮއޭރާ އެކޯސްޓާ، މީހަކު ކިޑްނެޕްކޮށް ފައިސާ ފޭރެން އުޅުނު މައްސަލައެއްގައި ކުށްވެރިވެ 50 އަހަރަށް ޖަލަށް ލާން ހުކުމްކޮށްފި އެވެ.

އުމުރުން 25 އަހަރުގެ އެކޯސްޓާ އަށް މި ހުކުމް އައީ 2018 ވަނަ އަހަރުގެ ފެބްރުއަރީ މަހު، 33 އަހަރުގެ އަންހެން ވަކީލަކު ކިޑްނެޕްކޮށް އޭނާގެ އަތުން ދެ މިލިއަން ޕެސޮސް (103،000 ޑޮލަރު) ބިޓްކޮއިނުން ހޯދަން ޑިމާންޑްކުރި މައްސަލައިގަ އެވެ.

އޭނާއާ އެކު ހަ މީހަކު ހިމެނޭ ގްރޫޕަކުން ވަކީލު ގަދަކަމުން ކާރަކަށް އެރުވުމަށް ފަހު، އޭނާ ބަންދުކޮށްގެން ގެންގުޅުނީ އެކޯސްޓާ ކުއްޔަށް ހިފައިގެން އުޅުނު އެޕާޓްމަންޓެއްގެ ތެރޭގަ އެވެ.

މި ހާދިސާގެ މައުލޫމާތު ފުލުހުންނަށް ލިބުމާ އެކު، ވަކީލު ސަލާމަތްކުރަން ކުރި މަސައްކަތުން އޭނާ މިނިވަންކުރެވުނީ ދެ ދުވަސް ފަހުންނެވެ. އަދި މި މައްސަލާގައި އެކޯސްޓާ އާއި އޭނާގެ ބައިވެރިން ހައްޔަރުކުރި އެވެ.

އެކޯސްޓާގެ މައްޗަށް އިއްވި 50 އަހަރުގެ ޖަލު ހުކުމާ އެކު، އޭނާއާ ބައިވެރިވި މީހުން ވަނީ 500،000 ޕެސޮސް (25،730 ޑޮލަރު) އިން ޖޫރިމަނާ ވެސް ކޮށްފަ އެވެ.

އެކޯސްޓާ އަކީ ކުރިން ވިޔަފާރި އާއި މާކެޓިންއާ ބެހޭ ގޮތުން ޔޫޓިއުބްގައި މައުލޫމާތުތައް ހިއްސާކޮށްގެން ގިނަ ބައެއްގެ ސަމާލުކަން ހޯދި ޒުވާނެކެވެ. އޭރު އޭނާ ވިޔަފާރިވެރިއެއްގެ ގޮތުގައި އަމިއްލަ އަށް ޕްރޮމޯޓްވަމުން ދިޔަ އިރު ޔޫޓިއުބް ޗެނެލްގެ ޓެގް ލައިނަކަށް ބޭނުންކުރީ "އައި ތިންކް ދަ މައިންޑް އިޒް ދި އޮންލީ ތިންގް ދެޓް ލިމިޓް އަސް" އެވެ.

ކިޑްނެޕްގެ ދައުވާއާ ގުޅިގެން ޗިހުއާހުއާގެ ޑިސްޓްރިކްޓް އެޓާނީ ސީޒާ ޕެނީޝް ވަނީ އެކޯސްޓާ އަކީ އިންޓަނެޓް މުއާމަލާތުގެ ތެރެއިން މީހުން މަޅީގައި ޖެއްސުމަށް ވަރަށް މޮޅު އުކުޅުތައް ބޭނުންކުރާ ތަޖުރިބާކާރެއްގެ ގޮތުގައި ސިފަކޮށްފަ އެވެ.