ނުއުމާން އަވަހާރަވުމުގެ ހިތާމައިގައި ކަސްޓަމްސްގެ ހެޑް އޮފީސް މިއަދު ބަންދު

ކޮމިޝަނާ ޖެނެރަލް އޮފް ކަސްޓަމްސް އަހުމަދު ނުއުމާން ރޭ އަވަހާރަވުމާ ގުޅިގެން، އެކަމުގެ ހިތާމައިގައި ކަސްޓަމްސްގެ ހެޑް އޮފީސް މިއަދު ބަންދުކޮށްފި އެވެ.

މި ވަގުތު ކަސްޓަމްސްއާ ހަވާލުވެ ހުންނެވި ޑެޕިއުޓީ ކޮމިޝަނަރު އަބްދުﷲ ޝަރީފް ވިދާޅުވީ، ކަސްޓަމްސްގެ ހެޑް އޮފީސް ބަންދުވި ނަމަވެސް އެހެން އޮފީސްތައް ހިންގާނެ ކަމަށެވެ. އަދި މިއަދުން ފެށިފެން ތިން ދުވަސް ވަންދެން ކަސްޓަމްސްގެ ދިދަ ބައިދަނޑި އަށް ތިރިކުރުމަށް ވަނީ ނިންމައިފަ އެވެ.

"މިދިޔަ މުއްދަތުގައި ސީޖީ ނުއުމާނަކީ ކަސްޓަމްސްގެ މުވައްޒަފުންނާއި ކަސްޓަމަރުންނަށް ވެސް ވަރަށް ހެޔޮ، އެންމެންގެ އަޑު އެއްސެވި ބޭފުޅެއް. އަޅުގަނޑުމެން އެންމެން ވެސް މި ތިބީ ނުއުމާން ވަކިވެގެން ދިއުމުން ފުން ހިތާމައެއްގައި،" ޝަރީފް ވިދާޅުވި އެވެ.

ޑިސެމްބަރު 11، 2018 ގައި ކަސްޓަމްސްގެ އިސްވެރިއަކަށް ރައީސް އިބްރާހިމް މުހައްމަދު ސޯލިހު އައްޔަން ކުރެއްވި ނުއުމާން 48، އަވަހާރަވީ އާލާސްކަންފުޅެއްގައި އިންޑިއާގެ ބެންގަލޫރަށް ވަޑައިގެން އުޅުއްވަނިކޮށެވެ. އޭނާ އެ އާލާސްކަންފުޅަށް ފަރުވާ ހޯއްދަވަން އިންޑިއާގައި އުޅުއްވާތާ ހައެއްކަ މަސް ވެދާނެ އެވެ.

ތަފާތު ފިކުރުގެ ބޭފުޅުންނާ ވެސް ގުޅުން އޮންނަ ނުއުމާނަކީ އަދާލަތު ޕާޓީގެ މަޝްވަރާ މަޖިލީހުގެ މެމްބަރެއްގެ އިތުރުން އެ ޕާޓީގެ އިންސާނީ ހައްގުތަކާ ބެހޭ ކޮމިޓީގެ ރައީސް ވެސް މެ އެވެ.

ސ. ހިތަދޫ ޖަނަވަރީމާގޭ ނުއުމާނަކީ ކުރީގެ ރައީސް މުހައްމަދު ވަހީދުގެ ވެރިކަމުގައި އުފެއްދި ފެނަކައިގެ ފުރަތަމަ ޗެއާމަނެވެ. އޭނާ ވަނީ ސްޓެލްކޯ އާއި ގައުމީ ޔުނިވަސިޓީ އަދި ހައުސިން މިނިސްޓްރީގައި ވެސް ކުރިން މަސައްކަތް ކުރައްވައިފަ އެވެ.

ރައީސް އިބްރާހިމް މުހައްމަދު ސޯލިހު ވެރިކަމަށް ގެންނަން ކޯލިޝަންގެ ތެރޭގައި އިސްކޮށް މަސައްކަތްޕުޅު ކުރެއްވި ނުއުމާނަކީ އަނިޔާވެރިކަމާ ދެކޮޅަށް އަމަލީ ގޮތުން އުޅުއްވި، އޭރުގެ އިސްލާހީ ހަރަކާތުގެ މުހިންމު ބައިވެރި އެކެވެ.