ކޮވިޑް-19ގެ ވެކްސިން ބުރާސްފަތި ދުވަހު ޓެސްޓްކުރަނީ

ލަންޑަން (އެޕްރީލް 21) - ކޮރޯނާވައިރަހުން ޖައްސާ ކޮވިޑް-19 ގެ ވެކްސިންގެ އިންސާނުން ބޭނުންކޮށްގެން ހަދާ ޓެސްޓްތައް ބުރާސްފަތި ދުވަހު ފަށާނެ ކަމަށް އިނގިރޭސި ވިލާތުގެ ހެލްތު ސެކްރެޓަރީ މެޓް ހެންކޮކް މިރޭ ވިދާޅުވެއްޖެ އެވެ.

ލަންޑަނުގައި ނޫސްވެރިންނާ ވާހަކަ ދައްކަވަމުން ހެންކޮކް ވިދާޅުވީ ކޮރޯނާވައިރަހަށް ވެކްސިނެއް ހޯދުމަށް ދުނިޔޭގެ އެހެން އެއްވެސް ގައުމަކަށް ވުރެ ބޮޑަށް އިނގިރޭސި ވިލާތުން ޚަރަދުކުރާ ކަމަށެވެ. ވެކްސިނެއް އުފެއްދުމަށް އޮކްސްފޯޑާއި އިމްޕީރިއަލް ކޮލެޖުގެ މަސައްކަތަށް ވަރަށް ބޮޑު ކުރިއެރުމެއް ލިބެމުން އަންނަ ކަމަށް ވިދާޅުވި އެވެ.

ހެލްތު ސެކްރެޓަރީ ވިދާޅުވީ ވެކްސިން އުފެއްދުމަށް އޮކްސްފޯޑް ޓީމުގެ ކްލިނިކަލް ޓްރަޔަލްސް އަށް އިނގިރޭސި ސަރުކާރުން 20 މިލިއަން ޕައުންޑް ޚަރަދުކުރާނެ ކަމަށެވެ.

ކޮރޯނާވައިރަހުގެ ވެކްސިން އަންނަ ސެޕްޓެމްބަރު މަސް ހިސާބުގައި ލިބޭވަރު ވާނެ ކަމަށް އޮކްސްފޯޑް ޔުނިވާސިޓީގެ ޕްރޮފެސަރަކު ވަނީ ވިދާޅުވެފަ އެވެ. ސައެންސްވެރިން ކުރިން ބުނަމުން އައީ އެކި މަރުހަލާތަކަށް ފަހު ކޮރޯނާވައިރަހުގެ ވެކްސިނެއް ލިބޭވަރު ވާނީ 12-18 މަހާ ދެމެދު ކަމަށެވެ.