ކޮވިޑް-19: ވެކްސިން ފުރަތަމަ ދިން މީހާ މަރުވި ޚަބަރަކީ ދޮގެއް

ލަންޑަން (އެޕްރީލް 27) - އިނގިރޭސި ވިލާތުގެ އޮކްސްފޯޑް ޔުނިވާސިޓީން އުފެއްދި، ކޮރޯނާވައިރަހުގެ ވެކްސިން އަޖުމަ ބެލުމުގެ ގޮތުން ފުރަތަމަ ދިން ޑޮކްޓަރު މަރުވެއްޖެ ކަމަށް ފަތުރާ ޚަބަރަކީ ދޮގެއް ކަމަށް އޭނާ ބުނެފި އެވެ.

އޮކްސްފޯޑް ޔުނިވާސިޓީގެ މައިކްރޯބަޔޮލޮޖިސްޓެއް ކަމަށްވާ ޑރ. އެލިސާ ގްރެނާޓޯ ބުނީ ވެކްސިން އަށް ފަހު އޭނާގެ ހާލު ރަނގަޅު ކަމަށާއި ހުރިހާ ކަމެއް ވެސް ވަރަށް ބަރާބަރު ކަމަށެވެ.

ޑރ. އެލިސާ އަކީ އިންސާނުން ބޭނުންކޮށްގެން ވެކްސިން ޓެސްޓް ކުރަން ހޮވި 800 ވޮލަންޓިއަރުންގެ ތެރޭން އަޖުމަ ބެލުމަށް މިދިޔަ ބުރާސްފަތި ދުވަހު ވެކްސިން ދިން ދެ މީހުންގެ ތެރޭން އެކަކެވެ. ނަމަވެސް ވެކްސިން ދިން ފަހުން ދިމާވި މައްސަލަތަކުގައި އޭނާ މަރުވެއްޖެ ކަމަށް އާދިއްތަ ދުވަހު ވަނީ ޚަބަރުތައް ފަތުރައިފަ އެވެ. އެކަމަކު 32 ވަނަ އުފަން ދުވަހު ވެކްސިން ޓެސްޓްކުރި ޑޮކްޓަރު ކުރި ޓްވީޓެއްގައި ބުނެފައި ވަނީ އޭނާގެ ރަހުމަތްތެރިންނާއި ގާތް މީހުންނަށް ސާފުކޮށް ދޭން ބޭނުން ވަނީ އޭނާ ސަލާމަތުން ހުރިކަން ކަމަށެވެ. އަދި ފޭކް ޚަބަރު ނުފެތުރުމަށް އޭނާ އިލްތިމާސް ކުރި އެވެ.

ވެކްސިންގެ ފުރަތަމަ ޝޮޓަށް ފަހު ޑރ. އެލިސާ ބުނެފައި ވަނީ އޭނާ އަކީ ސައެންސްވެރިއެއް ކަމަށާއި ސައެންޓިފިކް ގޮތުން އޭނާ އަށް ވެދެވެން އޮތް އެހީއެއްވާން ބޭނުންވާ ކަމަށެވެ.

ކޮވިޑް-19 ގެ ވެކްސިން އޮކްސްފޯޑް ޔުނިވާސިޓީގެ ޓީމަކުން އުފެއްދީ ތިން މަހެއްހާ ދުވަހުގެ މަސައްކަތުންނެވެ. އެ ރިސާޗުގައި އިސްކޮށް ހުންނެވީ ވެކްސިނޮލޮޖީ ޕްރޮފެސަރު ސާރާ ގިލްބާޓެވެ.

ޕްރޮފެސަރު ގިލްބާޓް ކުރިން ވިދާޅުވެފައި ވަނީ ކޮވިޑް-19 ގެ ވެކްސިން ކާމިޔާބުވާނެ ކަމުގެ 80 ޕަސެންޓް ޔަގީން ކަމަށެވެ. ނަމަވެސް ފަހުން އެކަމަނާ ވިދާޅުވީ ވަކި އަދަދެއް ހާމަކުރައްވަން ބޭނުން ނުވާ ކަމަށެވެ.

ވެކްސިންގެ އަޖުމަ ބެލުމުގެ ދެ ވަނަ މަރުހަލާގައި 5،000 ވޮލަންޓިއަރުން ބޭނުން ކުރާނެ އެވެ. އެފްރިކާގައި ވެސް ވެކްސިންގެ ޓެސްޓްތައް ހަދަން އޮކްސްފޯޑުގެ ޓީމުން ބޭނުންވެ އެވެ.

ސައެންސްވެރިން އުއްމީދު ކުރަނީ ކޮވިޑް-19 ގެ ވެކްސިންގެ އެއް މިލިއަން ޑޯޒް ސެޕްޓެމްބަރު މަހާ ހަމައަށް ތައްޔާރު ކުރެވޭނެ ކަމަށެވެ. ވެކްސިން ކާމިޔާބު ނަމަ ގިނަ އަދަދަކަށް އުފައްދަން ފަށާނެ އެވެ.

ކޮވިޑް-19 ގެ ވެކްސިންގެ އިންސާނުން ބޭނުންކޮށްގެން ހަދާ ޓެސްޓްތައް ޖޫން މަހު ފަށާނެ ކަމަށް ލަންޑަނުގެ އިމްޕީރިއަލް ކޮލެޖުން ވަނީ ބުނެފަ އެވެ. ވެކްސިން އުފެއްދުމުގެ މަސައްކަތަށް އޮކްސްފޯޑާއި އިމްޕީރިއަލް އަށް އިނގިރޭސި ސަރުކާރުން ވަނީ 40 މިލިއަން ޕައުންޑް ދީފަ އެވެ.