މާސްކް ނާޅާ ކަސްޓަމަރަކަށް ހިދުމަތް ނުދިނުމުން އިނާމަކަށް 20،000 ޑޮލަރު

ކަމަކަށް އުސޫލެއް ކަނޑާއަޅާފައި އޮންނަ ނަމަ އެގޮތަށް އަމަލުކުރަން ލާޒިމުވާނެ އެވެ. އަދި އެކަމެއް ތަންފީޒުކުރަން ތިބޭ ބަޔަކު އެ ޒިންމާ ނަގަން ވެސް ޖެހޭނެ އެވެ. އެމެރިކާގެ ކެލިފޯނިއާގައި ހިންގާ ސްޓާބަކްސްގެ މުވައްޒަފަކު އަދާކުރީ އެ ދައުރެވެ. އެއާ އެކު އިނާމަކީ 20،000 ޑޮލަރުގެ ޓިޕްސްއެކެވެ.

މިކަމެއް މެދުވެރިވީ މިދިޔަ ހަފުތާގައި ކެލިފޯނިއާގެ ސްޓާބަކްސްގެ އައުޓްލެޓެއްގައި މަސައްކަތްކުރާ މުވައްޒަފަކު، ކަސްޓަމަރަކު ފޭސް މާސްކް ނާޅަން ގަދަ ދެއްކުމުން ހިދުމަތް ދޭން ދެކޮޅު ހެދުމުންނެވެ. އުސޫލު ހަމަޖެހިފައި އޮތް ގޮތުން ކަސްޓަމަރުންނަށް އެތަނަށް ވަދެވެނީ ވެސް ކޮވިޑް-19 އިން ރައްކާތެރިކަން ހޯދަން މާސްކް އަޅައިގެންނެވެ. އެއީ އެންމެންގެ ރައްކަލަށްޓަކައި ކުރަން ޖެހޭ ކަމެކެވެ.

އެކަމަކު އެ ވަގުތު ޑިއުޓީގައި ހުރި ބެރިސްޓާ ލެނިން ގުޓަރޭޒް އަށް ކުރިމަތިލާން ޖެހުނީ މާސްކް ނާޅަން ގަދަ ދެއްކި ކަސްޓަމަރަކާ އެވެ. ނަމަވެސް އޭނާ ވަނީ އުސޫލާ އެއްގޮތަށް އަމަލުނުކުރުމުން ކަސްޓަމަރަށް ހިދުމަތް ދޭން ދެކޮޅު ހަދައިފަ އެވެ.

ލެނިން އަށް އެންމެންގެ ތައުރީފް ލިބުނީ، މާސްކް ނާޅައި ހުރުމުން ހިދުމަތް ނުލިބުނު އެމްބާ ލީން ގިލްޒް، ލެނިން އަށް މަލާމާތްކޮށް އެ ވާހަކަ ފޭސްބުކްގައި ހާމަކުރުމާ އެކުގަ އެވެ. އޭނާ ވަނީ މާސްކް ނާޅައި ހިދުމަތް ހޯދަން ގަދަ ދައްކާފައިވާތީ ލެނިން އޭނާގެ ކަސްޓަމަރާ ކުރި މުއާމަލާތް ކުރުކޮށް ކިޔައިދީފަ އެވެ.

އެއާ އެކު ލެނިންގެ ހިތްވަރަށް ތައުރީފުކޮށް، ސާބަސްދީ ލެނިން އަދާކުރި ދައުރުގެ މުހިއްމުކަން ހާމަކޮށް ދިނުމުގެ ގޮތުން ގޯފަންޑްމީން ލެނެން އަށް ޓިޕްސް ހޯދައި ދިނުމުގެ މަސައްކަތް ފެށި އެވެ. ނަތީޖާ އަކީ އޭނާ އުސޫލު ދަމަހައްޓަން ކުރި މަސައްކަތާއި ފަރުދީ ގޮތުން އަދާކުރި އިޖުތިމާއީ ޒިންމާގެ އިނާމަކަށް 20،000 ޑޮލަރުގެ ޓިޕްސްއެއް ދޭން ނިންމުމެވެ.

ލެނިން އަށް ޓިޕްސް ދޭން ގޯފަންޑްމީ ޕޭޖްގައި ފައިސާ އެއްކުރުމުގެ ކެމްޕޭނުގައި އިސްކޮށްހުރި މެޓް ކޯވެން ބުނި ގޮތުގައި ސްޓާބަކްސްގެ ބެރިސްޓާ އަދާކުރީ ޒިންމާއަކީ ނަމޫނާއެކެވެ. އަދި މުޖުތަމައަށް ބޭނުން ވަނީ އެކަހަލަ މީހުން ކަމަށް ބުންޏެވެ.

"އަހަރެމެން މި އެއްކުރި ފައިސާ ލެނެންއާ ހަވާލުކުރާނީ އޭނާ މަސައްކަތްކުރާ އައުލެޓަށް ގޮސް، ވަރަށް ވެސް ހާއްސަ ކަމެއްގެ ގޮތުގައި." މެޓް ބުންޏެވެ. "އަހަރެމެން ފަހުރުވެރިން މުވައްޒަފު ދެއްކި ހިތްވަރަށްޓަކައި."

ހީވެސް ނުކުރާ ކަހަލަ ގޮތަކަށް އެތައް ބައެއްގެ ސަމާލުކަން ލިބުމުން ލެނިން ވަނީ އޭނާ އަށް ސަޕޯޓްކުރި އެންމެންނަށް ޝުކުރުއަދާކޮށް ފޭސްބުކްގައި ވީޑިއޯއެއް އާންމުކޮށްފަ އެވެ.

"މިއީ އުފަލުން ގޮސް ނަށާވަރުގެ ކަމެއް. ހިތުގެ އެންމެ އަޑިން ހުރިހާ އެންމެންނަށް ވަރަށް ބޮޑަށް ޝުކުރިއްޔާ."