މެމްބަރުން ވަކިކުރީ ރައީސް ޔާމީނަށް ޓަކައި: އެމްޑީޕީ

ފިންގަޕްރިންޓް ނެތް ކަމަށް ބުނެ އިލެކްޝަންސް ކޮމިޝަނުން އެމްޑީޕީގެ ގިނަ އަދަދެއްގެ މެމްބަރުން ވަކިކުރީ ރައީސް އަބްދުﷲ ޔާމީނަށް ކޮށްދެއްވި ކަމެއްގެ ގޮތުގައި ކަމަށް އެމްޑީޕީން މިއަދު ބުނެފި އެވެ.

ސިޔާސީ ޕާޓީތަކުގައި ރަޖިސްޓްރީ ވުމަށް ފިންގަޕްރިންޓް ހުށަނާޅާ މެމްބަރުން ޕާޓީން ވަކިކުރުމަށް އިލެކްޝަންސް ކޮމިޝަނުން ނިންމި ނިންމުން ތަންފީޒު ކުރަން ފަށައި ޕާޓީތަކުގެ އާ ދަފުތަރު މިދިޔަ ހޯމަ ދުވަހު ވަނީ އާއްމުކޮށްފަ އެވެ. އެ ދަފުތަރު އާއްމުކުރުމާ އެކު އެމްޑީޕީގެ ގާތްގަނޑަކަށް ދެބައިކުޅަ އެއްބައި މެމްބަރުން ވަނީ ވަކިވެފަ އެވެ.

އެމްޑީޕީގެ ނައިބު ލީޑަރު މުހައްމަދު ޝިފާޒު "މިހާރު" އަށް ވިދާޅުވީ، އެންމެ ބޮޑު ޕާޓީ އަށް ޕީޕީއެމް ހަދާނެ ކަމަށް ރައީސް ޔާމީން މީގެ ކުރިން ވިދާޅުވެފައިވާ ކަމަށާއި މިއީ އެ މަސައްކަތް ކަމަށެވެ. އަދި ވިދާޅުވީ އިލެކްޝަންސް ކޮމިޝަންގެ އެހީގައި "ގަދަބާރުން" އެންމެ ބޮޑު ޕާޓީގެ ލަގަބު ވެރިކަންކުރާ ޕީޕީއެމުން ހޯދާފައިވާ ކަމަށާއި ނަމަވެސް އެއީ ރައްޔިތުން ގަބޫލުކުރާނެ ކަމެއް ނޫން ކަމަށް އޭނާ ވިދާޅުވި އެވެ.

"ރައްޔިތުން އަދި އެމްޑީޕީގެ މެމްބަރުން ވެސް ގަބޫލުކުރާނެ އެންމެ ބޮޑު ޕާޓީއަކީ އެމްޑީޕީކަން. އެހެންކަމުން އެކަންކަމަކީ ޔާމީން ހިތްހަމަ ޖައްސައިދިނުމަށް އީސީން ކުރާ ކަމެއް،" ޝިފާޒު ވިދާޅުވި އެވެ.

އޭނާ ވިދާޅުވީ ގާނޫނަށް ބަދަލު ގެނެސް އެމްޑީޕީގެ މެމްބަރުންގެ އަދަދު މަދުކުރީ، ސަރުކާރުން އެމްޑީޕީއަށް ދޭންޖެހޭ ފައިސާގެ އަދަދު މަދުކުރުމަށް ކަމަށެވެ. އެމްޑީޕީގައި ސައްހަ މެމްބަރުންގެ އަދަދު ކުރިން 40،000ގައި ހުރިއިރު އެ ޕާޓީ އަށް 13 މިލިއަނަށް ވުރެ ގިނަ ރުފިޔާ ދައުލަތުން ދޭން ޖެހޭނެ އެވެ.

ފިންގަޕްރިންޓާއެކު އިލެކްޝަންސް އަށް ފޯމު ހުށަހަޅައިފިނަމަ އެ ފިންގަޕްރިންޓް ވެރިފައިކުރަން އެ ކޮމިޝަނުން ފޮނުވަނީ ފުލުހުންގެ މުއައްސަސާއަށެވެ. ޝިފާޒު ވިދާޅުވީ އީސީއަށްވުރެ ފުލުހުންގެ މުއައްސަސާ ސިޔާސީ ވެފައިވާއިރު ފިންގަޕްރިންޓް ވެރިފައިކުރަން ހުށަހަޅާ ފޯމުތަކަށް ވާނެގޮތާ މެދު ސުވާލު އުފެދޭނެ ޖާގަ އެބައޮތް ކަމަށެވެ.

ކުރިން އެންމެ ބޮޑު ޕާޓީގެ ގޮތުގައި އޮތް އެމްޑީޕީގައި މިދިޔަ އަހަރުގެ ފެބްރުއަރީގެ ނިޔަލަށް 46،608 މީހުން ރަޖިސްޓްރީވެފައިވީ ނަމަވެސް ފިންގަޕްރިންޓް ނެތުމުގެ ސަބަބުން އެ ޕާޓީން 18،803 މީހުން ވަނީ ވަކިކޮށްފަ އެވެ. މިހާރު އާއްމުކޮށްފައިވާ ދަފުތަރުގައިވާ ގޮތުން މިހާރު އެމްޑީޕީގައި ތިބީ 27،805 މެމްބަރުންނެވެ.

އާ ދަފުތަރުގައިވާ ގޮތުން ޕީޕީއެމްގެ މެމްބަރުންގެ އަދަދު ވަނީ 1،401 އަށް އިތުރުވެފަ އެވެ. ކުރިން އެ ޕާޓީގައި ތިބީ 36،232 މެމްބަރުން ކަމަށްވީ ނަމަވެސް، ފިންގަޕްރިންޓް ހިމެނޭ އިތުރު ފޯމު ހުށަހަޅައިގެން އެ ޕާޓީން ވަނީ މެމްބަރުންގެ އަދަދު 37،633 އަށް އިތުރުކޮށްފަ އެވެ. އެހެންކަމުން މިއީ އީސީން ފަހުން އާއްމުކުރި ދަފުތަރުގައިވާގޮތުން މެމްބަރުން އެންމެ ގިނަ ޕާޓީ އެވެ.