ޖައްވަށް ގެންދަން ހާއްސަ ނޫޑުލްސްއެއް އުފައްދައިފި

އާންމުކޮށް ވިއްކަން މި ހުންނަ ކަޕް ނޫޑްސް ތައްޓަކީ ޖަައްވީ މިޝަންތަކަށް ދާއިރު ބޭނުންކުރެވޭ އެއްޗެއް ނޫނެވެ. ސަބަބަކީ ޖައްވީ ސްޓޭޝަން އައިއެސްއެސްގައި 100 ޑިގްރީ އަށް ފެން ހޫނު ނުކުރެވުމެވެ. އެހެންވެ ކަޕް ނޫޑްސްލް ޖައްވުގައި މަޑުނުކުރެވި، އެސްޓްރޮނޯޓުން ނޫޑްލްސް އިން މަހުރޫމްވާތީ ޖަޕާނުގެ ކުންފުންޏަކުން މިއޮތީ މިކަމަށް ހައްލެއް ހޯދައިދީފަ އެވެ.

އެ ގައުމުގެ ކުންފުންޏެއް ކަމަށްވާ ނިސިން އިން ވަނީ "ސްޕޭސް ކަޕް ނޫޑްލްސް" ގެ ނަމުގައި ތަފާތު ރަހަތަކެއްގެ ނޫޑުލްސް ތައްޔާރުކޮށްފަ އެވެ. މީގެ ހަތް ރަހައެއް އެކުލެވޭ އިރު އޭގެ ތެރޭގައި ހިމެނެނީ ޗިކެން ރަމެން، ސީފުޑް ކަރީ، ކީމާ ކަރީ، ހަޔާޝީ މެޝީ، ޔަކި ސޯބާ އަދި އޮރިޖިނަލް އެވެ. މި ނޫޑުލްސްގެ ޕެކްތައް ހުންނަނީ ލޭ ނަގާފައި އަޅާ ކަހަލަ ޕެކެއްގަ އެވެ.

"ސްޕޭސް ކަޕް ނޫޑްލްސް" ތައްޔާރުކޮށްފައި ވަނި އައިއެސްއެސްގައި ފެން ހޫނުކުރެވޭ މިންގަނޑު ކަމަށްވާ 70 ޑިގްރީގައި ރީއްޗަށް މަޑުކޮށްލައިގެން ކާލެވޭ ގޮތަށެވެ. މި ނޫޑުލްސް ނިސިން އިން އުފެއްދީ ޖަޕާނުގެ އެސްޓްރޮނޯޓެއް ކަމަށްވާ ސޮއިޗީ ނޮގޫޗީގެ އެހީގަ އެވެ. މި މަސައްކަތަށް އޭނާގެ ތަޖުރިބާ ވަރަށް ބޮޑަށް ބޭނުންކޮށްފައިވެ އެވެ.

ސޮއިޗީ ދެން އެންމެ އަވަހަށް ޖައްވަށް ކުރާ ދަތުރުގައި "ސްޕޭސް ކަޕް ނޫޑްލް" ގެންގޮސް، ތަޖުރިބާކުރާނެ އެވެ. މި ނޫޑްލްސްގެ ވާހަކަ 55 އަހަރުގެ އެސްޓްރޮނޯޓް ޓްވިޓާގައި ވެސް ހިއްސާކޮށްފައިވެ އެވެ.