ދަތުރު ދިޔަ އަންހެނުންތަކަކާއި ކުޑަކުދިންތަކެއް ހާލުގައި ޖެހިގެން ސިފައިން އެހީވެއްޖެ

ފަޅުރަށަކަށް މިއަދު ދަތުރު ދިޔަ ބަޔަކު، މޫސުން ގޯސްވެ އަނބުރާ ރަށަށް ނުދެވިގެން އެމްއެންޑީއެފްގެ އެހީތެރިކަމަށް އެދިއްޖެ އެވެ. ސިފައިން އެހީ ފޯރުކޮށްދިން މީހުންގެ ތެރޭގައި ހިމެނެނީ އަންހެނުންނާއި ކުޑަކުދިނެވެ.

އެމްއެންޑީއެފުން ބުނީ ބ. މުތާފުއްޓަށް ދަތުރު ގޮސް އުޅެނިކޮށް ހާލުގައި ޖެހުނު 11 މީހުންގެ ތެރޭގައި ހިމެނެނީ ހަ ކުޑަކުދިންނާއި ފަސް އަންހެނުންނެވެ. އެ އަތޮޅު ތުޅާދުއާ 10 ކިލޯމީޓަރު ދުރުގައި އޮންނަ ފަޅު ރަށަށް ދަތުރު ދިޔަ މީހުން، މޫސުން ގޯސްވެ، އަނބުރާ ރަށަށް ނުދެވިގެން ސިފައިންގެ އެހީތެރިކަމަށް އެދުނީ މިއަދު މެންދުރުފަހު ދޭއްޖަހާކަންހާއިރު އެވެ. ސިފައިންގެ އެހީތެރިކަމާއެކު އެ މީހުން ރަށަށް ގެންދިޔައީ ކޯސްޓްގާޑުގެ ލޯންޗުގަ އެވެ.

އުތުރުގެ އަތޮޅުތަކަށް މިއަދު މޫސުން ގޯހެވެ. އެގޮތުން ހާލުގައި ޖެހުނު މީހުން ރަށަށް ނާދެވިގެން ރިޕޯޓުކުރި އެ ސަރަހައްދަށް، މޫސުމާ ބެހޭ އިދާރާއިން ވަނީ ގުގުރުމާއެކު ބޯކޮށް ވާރޭވެހޭނެ ކަމަށް ލަފާކޮށް، ވައިޓް އެލާޓް ނެރެފަ އެވެ. އެ އެލާޓް ވަނީ މިއަދު ހަވީރު ހަތަރަކުން މިރޭ ނުވައެއް ޖަހަން ދެން ދިގު ދަންމާލާފަ އެވެ.