ކޮމެޑީއަކުން އަކްޝޭ ކުމާރަށް 100 ކްރޯޑް ރުޕީސް

މިދިޔަ ހަފުތާގައި މީޑިއާތަކުން ރިޕޯޓްކޮށްފައިވާ ގޮތުގައި އަކްޝޭ ކުމާރު ވަނީ ޑައިރެކްޓަރު މުދައްސަރު އަޒީޒް އަލަށް ހަދަން ނިންމާފައިވާ ކޮމެޑީއަކަށް ސޮއިކޮށްފަ އެވެ. އޭނާ އަކީ މިދިޔަ އަހަރު "ޕަތީ ޕަތުނީ އޯރް ވޯ" ގެނެސްދިން ޑައިރެކްޓަރެވެ.

މުދައްސަރުގެ އާ ފިލްމާ ބެހޭ އެންމެ ފަހުގެ ޚަބަރުތައް ބުނާގޮތުން މި ފިލްމު ޕްރޮޑިއުސްކުރާނީ ދާދި ފަހުން އަކްޝޭ ޝޫޓިން ނިންމައިލި ސްޕައި ތުރިލާ "ބެލް ބޮޓަމް" ގެ ޕްރޮޑިއުސަރުން ކަމަށްވާ ވާޝޫ ބަގްނާނީ އާއި އޭނާގެ ދަރިފުޅު ޖެކީ ބަންގާނީ އެވެ. އަދި މި ފިލްމަށް އަކްޝޭ ސޮއިކުރީ 100 ކްރޯޑް ރުޕީސް (13.4 މިލިއަން ޑޮލަރު) އެވެ. ރިޕޯޓްތައް ބުނާގޮތުން އަކްޝޭ "ބެލް ބޮޓަމް" ކުޅުނީ 90 ކްރޯޑް ރުޕީސް (12.1 މިލިއަން) ޑޮލަރަށެވެ.

އަކްޝޭ އަށް ބޮޑު އަގެއް ދޭން ޕްރޮޑިއުސަރުން އެއްވެސް އިރަކު ޖެހިލުމެއް ނުވެ އެވެ. ސަބަބަކީ އޭނާ ފިލްމެއް ހިޓަކަށް ހަދައިދޭނެ ކަމުގެ ގެރެންޓީ އޮތުމެވެ. އަނެއްކޮޅުން ސްކޮޓްލެންޑްގައި "ބެލް ބޮޓަމް" ސެޕްޓެމްބަރު މަހުގެ ތެރޭގައި ޝޫޓްކުރީ ކޮވިޑްގެ ވަރަށް ދަތި ހާލަތުގެ ތެރޭގައި ކަމަށްވާތީ އެ ފިލްމުގެ މަސައްކަތް އަވަސްކޮށް، ހަރަދުތައް ވެސް ކުޑަކޮށްދޭން އަކްޝޭ ވަރަށް މަސައްކަތްކުރި އެވެ. އެގޮތުން މީގެ 18 އަހަރު ކުރިން ފެށިގެން އެއް ޝިފްޓަށް ނޫނީ މަސައްކަތް ނުކުރާ އަކްޝޭ ވަނީ "ބެލް ބޮޓަމް" ގެ މަސައްކަތް އަވަސް ކުރަން އެ އުސޫލު ވެސް އޭރު ދޫކޮށްލައިފަ އެވެ.

ބޮލީވުޑް ހަންގާމާ އިން ބުނީ ވަރަށް މަޖާ ކޮމެޑީއެއްގެ ގޮތުގައި ގެނެސްދޭން ނިންމާފައިވާ އެކަމަކު އަދި ނަން އިއުލާން ނުކުރާ ފިލްމުގެ ޝޫޓިން އަކްޝޭ 45 ދުވަހުގެ ތެރޭގައި ނިންމާނެ ކަމަށެވެ. އެ ނޫހުން ބުނި ގޮތުގައި މުދައްސަރުގެ ފިލްމުގެ ޖުމްލަ ބަޖެޓަކީ އަކްޝޭގެ ފީއާ އެކު ގާތްގަނޑަކަށް 150 ކްރޯޑް ރުޕީސް އެވެ. އެއީ އަކްޝޭ ކަހަލަ ބިޒީ ތަރިއަކާ އެކު 45 ދުވަހުގެ ތެރޭގައި ފިލްމެއް ނިންމަން ބަލާ ނަމަ މާ ބޮޑު އަދަދެއް ނޫނެވެ.

ނަމަވެސް މި ފިލްމާ ބެހޭ މާ ބޮޑު ތަފުސީލުތަކެއް އަދި ހާމައެއްނުކުރެ އެވެ. ފިލްމު ރަސްމީކޮށް އިއުލާނެއް ވެސް ނުކުރެ އެވެ. އެކަމަކު ފިލްމުގެ ޝޫޓިން ތާވަލުކޮށްފައި ވަނީ އަންނަ އަހަރުގެ ޖުލައިގައި ފަށައި އޮގަސްޓް މަހުގެ ތެރޭގައި ނިންމާ ގޮތަށެވެ. ސިނަމާތަކަށް ފިލްމު ގެންނާނީ 2022 ގެ ކުރީކޮޅު އެވެ.

އަކްޝޭ މިހާރު އަންނަނީ ޔާޝްރާޖް ފިލްމްސްގެ "ޕްރިތުވީރާޖް" ގެ މަސައްކަތް ކުރަމުންނެވެ. އެ ފިލްމަށް ފަހު އޭނާ ދެން ފަށާނީ ޑައިރެކްޓަރު އާނަންދު އެލް ރާއީގެ "އަތުރަންގީ ރޭ" ގެ ޝޫޓިން އެވެ. އަކްޝޭ ސޮއިކޮށްފައި ހުރި އިތުރު ފިލްމުތަކުގެ ތެރޭގައި ފަރުހާދު ސަމްޖީގެ "ބައްޗަން ޕާންޑޭ" އާއި އާނަންދުގެ "ރަކްޝާބަންދަން" ހިމެނެ އެވެ. މި ހުރިހާ ފިލްމުތަކެއް ވެސް ސިނަމާތަކަށް އަންނާނީ އަންނަ އަހަރު އެވެ.

އަކްޝޭގެ އެންމެ ފަހުގެ ފިލްމަކީ މި މަހުގެ 9 ގައި ޑިޒްނީ ޕްލަސް ހޮޓްސްޓާ އިން ޕްރިމިއާކުރި ހޮރޯ ކޮމެޑީ "ލަކްޝްމީ" އެވެ. އޭނާ ދެން އެންމެ އަވަހަށް ފެނިގެން ދާނީ ކޮޕް ޑްރާމާ "ސޫރިޔަވަންޝީ" އިންނެވެ.