ސިންގަޕޫރާއި ބަންގްލަދޭޝަށް ސަފީރުން އައްޔަން ކޮށްފި

ރައީސް އިބްރާހިމް މުހައްމަދު ސޯލިހް، ސިންގަޕޫރާއި ބަންގްލަދޭޝަށް މިއަދު ސަފީރުން އައްޔަންކުރައްވައިފި އެވެ.

ސިންގަޕޫރަށް ރާއްޖޭން ކަނޑައަޅާފައި ހުންނަވާ ސަފީރުކަމަށް އައްޔަންކުރެއްވީ ހ.ޖެހޭ ވައި އިބްރާހީމް ޝަހީބެވެ. ބަންގްލަދޭޝަށް ކަނޑައަޅާފައި ހުންނަވާ ސަފީރު ކަމަށް އައްޔަންކުރެއްވީ މ. ޒީނާ ޝިރުޒިމަތެވެ.

އެ ދެ ބޭފުޅުން ސަފީރުކަމަށް އައްޔަންކުރެއްވީ މިއަދު ހެނދުނު ރައީސް އޮފީހުގައި ބޭއްވި ރަސްމިއްޔާތެއްގަ އެވެ.

ސަފީރުކަމަށް މިއަދު އައްޔަންކުރެއްވި ދެ ބޭފުޅުންގެ ތެރެއިން އިބްރާހީމް ޝަހީބު މިހާތަނަށް ހުންނެވީ ފޮރިން މިނިސްޓްރީގެ ޗީފް އޮފް ޕްރޮޓޮކޯލްގެ މަގާމުގަ އެވެ. ފޮރިން މިނިސްޓްރީގެ އެޑިޝަނަލް ސެކްރެޓަރީކަމުގެ މަގާމާއި ޕާމަނަންޓް ސެކްރެޓަރީގެ މަގާމު ވެސް އޭނާ ކުރިން ފުރުއްވާފައިވެ އެވެ. ސިންގަޕޫރުގައި ހުންނަ ރާއްޖޭގެ ހައިކޮމިޝަންގެ ފަސްޓް ސެކްރެޓަރީގެ މަގާމާއި އެ ގައުމުގައި ހުންނަވާ ރާއްޖޭގެ އެކްޓިން ހައިިކޮމިޝަނަރުކަމުގެ މަގާމު ވެސް އޭނާ ފުރުއްވި އެވެ.

ޝަހީބަކީ ސިންގަޕޫރުގެ ލީކުއާން ޔިއު ސްކޫލް އޮފް ޕަބްލިކް ޕޮލިސީ އިން ޕަބްލިކް ޕޮލިސީގެ ދާއިރާއިން މާސްޓާސް ހާސިލުކުރައްވާފައިވާ ބޭފުޅެކެވެ. ޕޮލިޓިކަލް ސައިންސް އަދި ޑިވެލޮޕްމެންޓްގެ ދާއިރާއިން އޭނާ ފުރަތަމަ ޑިގްރީ ހާސިލުކުރެއްވީ އޮސްޓްރޭލިއާގެ އޮސްޓްރޭލިއަން ނެޝަނަލް ޔުނިވާސިޓީންނެވެ.

ބަންގްލަދޭޝްގައި ހުންނަވާ ސަފީރުކަމުގެ މަގާމަށް މިއަދު އައްޔަން ކުރެއްވި ޝިރުޒިމަތު އެންމެ ފަހުން ހުންނެވީ ފޮރިން މިނިސްޓްރީގެ އީސްޓް އެންޑް ސެންޓްރަލް އޭޝިއާ ޑިވިޝަނުގެ އެޑިޝަނަލް ސެކްރެޓަރީގެ މަގާމުގަ އެވެ. ޖަރުމަނުގައި ހުންނަ ރާއްޖޭގެ ހައިކޮމިޝަނުގެ މިނިސްޓަ ކައުންސެލާގެ މަގާމު ވެސް އޭނާ ކުރިން އަދާކުރެއްވި އެވެ.

ޝިރުޒިމަތަކީ ސްޓްރެޓެޖީ އެންޑް ޑިޕްލޮމަސީ އިން މާސްޓާސް ހާސިލުކުރައްވާފައިވާ ބޭފުޅެކެވެ. އޭނާ މާސްޓާސް ހެއްދެވީ ނެޝަނަލް ޔުނިވާސިޓީ އޮފް މެލޭޝިއާގެ އިންސްޓްޓިއުޓް އޮފް ޑިޕްލޮމަސީ އެންޑް ފޮރިން ރިލޭޝަންސް އިންނެވެ. އިންޓަނޭޝަނަލް ބިޒްނަސްގެ ދާއިރާއިން އޭނާ ފުރަތަމަ ޑިގްރީ ހާސިލުކުރެއްވީ އިނގިރޭސިވިލާތުގެ ޔުނިވާސިޓީ އޮފް އީސްޓް ލަންޑް އިންނެވެ.

ޝަހީބާއި ޝިރުޒިމަތު ސަފީރުކަމަށް އައްޔަންކުރަން ރައްޔިތުންގެ މަޖިލީހުން ރުހުން ދިނީ މިދިޔަމަހު އެވެ. ސިންގަޕޫރުގައި ހުންނަވާ ރާއްޖޭގެ ސަފީރުކަމަށް މިސަރުކާރުން ފުރަތަމަ އައްޔަން ކުރީ މިހާރުގެ ޓޫރިޒަމް މިނިސްޓަރު ޑރ. އަބްދުﷲ މައުސޫމެވެ.