"އިސްތިރީ" ގެ ޓީމުން ފައިސާގެ މައްސަލަ ހައްލުކޮށްފި

މީގެ ދެ އަހަރު ކުރިން ރިލީޒްކުރި ކާމިޔާބު ހޮރޯ ކޮމެޑީ "އިސްތިރީ" ގެ ފައިދާއިން ބައިއެޅުމުގެ މައްސަލާގައި، އެ ފިލްމުގެ ސްކްރީންޕްލޭ ލިޔުނު ރާޖް އެންޑް ޑީކޭ އާއި ޕްރޮޑިއުސަރު ދިނޭޝް ވިޖަންގެ މެޑޮކް ފިލްމްސްއާ ދެމެދު ޖެހުނު މައްސަލަތައް ހައްލުކޮށްފި އެވެ.

މިކަން ހިއްސާކޮށް މެޑޮކް އާއި ރާޖް އެންޑް ޑީކޭގެ ފިލްމު ކުންފުނި ޑީ2އާރް ފިލްމްސް ގުޅިގެން ނެރުނު ބަޔާނެއްގައި ބުނީ މައްސަލަ މިހާރު އެއްކޮށް ހައްލުވެފައިވާ އިރު، ފިލްމުގެ ހުރިހާ ރައިޓްސްއެއް އޮތީ މެޑޮކްސް އަށް ކަމަށެވެ.

އަމަރު ކޯޝިކް ޑައިރެކްޓްކުރި ފިލްމުން ލިބުނު ފައިދާ އިން ބައިއަޅާނެ ގޮތުގެ މައްސަލާގައި އުފެދުނު ހިޔާލު ތަފާތުވުންތަކާ ގުޅިގެން ރާޖް އެންޑް ޑީކޭ ވަނީ ކުރިން "އިސްތިރީ" ގެ ސީކްއެލްގެ ސްކްރީންޕްލޭ ވެސް ލިޔެ ނުދޭން ނިންމައި، ފިލްމުގެ ދެވަނަ ބައި މެޑޮކް އަށް ހެދިޔަ ނުދޭން ވެސް ނިންމައިފަ އެވެ.

ނަމަވެސް މައްސަލަ މިހާރު ހައްލުވެފައިވާތީ ކުރިއެކޭ އެއްގޮތަށް އެ މީހުން "އިސްތިރީ" ގެ ސްކްރީންޕްލޭ ލިޔެދޭނެ އެވެ. އަދި ރާޖް އެންޑް ޑީކޭ ފިލްމުގައި ހިއްސާވާނީ ވެސް ސްކްރީން ރައިޓަރުންގެ ގޮތުގައި އެކަންޏެވެ.

"އިސްތިރީ" ގެ ދެވަނަ ބައެއް ހަދަން ނިންމި ނަމަވެސް، އެ ފިލްމު ބެލުންތެރިންނަށް ގެނެސްދޭނެ އިރެއް އަދި ނޭނގެ އެވެ. އަމަރް މިދިޔަ އަހަރު "ބާލާ" ގެނެސްދިނުމަށް ފަހު މިހާރު އަންނަނީ "ބޭޅިޔާ" ކިޔާ ފިލްމެއް މެޑޮކް އަށް ހަދައިދޭން ތައްޔާރުވަމުންނެވެ. ރިޕޯޓްތައް ބުނާގޮތުން އެ ފިލްމުގެ ތަރިންނަކީ ވަރުން ދަވަނާއި "އިސްތިރީ" ގެ ބަތަލާ ޝްރަދާ ކަޕޫރެވެ.

އިންޑިއާގެ ރަށްފުށުގައި ރޭގަނޑު އަންހެން ޖިންނިއެއް ފެނި، ފިރިހެނުން ގެއްލޭ ކަމަށް ގަބޫލުކުރާ ގަބޫލުކުރުންތަކުގެ މައްޗަށް ހެދި "އިސްތިރީ" ގެ ލީޑް ރޯލް ކުޅުނީ ޝްރަދާ އާއި ރާޖްކުމާރު ރާއޯ އެވެ. އެންމެ 20 ކްރޯޑް ރުޕީސް (2.7 މިލިއަން ޑޮލަރު) ގެ ބަޖެޓަކުން ހެދި އެ ފިލްމަކީ ބޮކްސް އޮފީހުގައި 180.76 ރުޕީސް (24.373 މިލިއަން ޑޮލަރު) ގެ އާމްދަނީއެއް ލިބުނު ފިލްމެކެވެ.

މި ފިލްމުގެ ލިޔުންތެރިންނާއި ޕްރޮޑިއުސަރާ ދެމެދު ޖެހުނު މައްސަލަ ހައްލުކޮށްފައިވާ އިރު ރާޖް އެންޑް ޑީކޭ ލިޔެ، ޑައިރެކްޓްކޮށް، މެޑޮކް އިން 2013 ގައި ގެނެސްދިން ޒޮމްބީ ފިލްމު "ގޯ ގޯއާ ގޯން" ގެ ދެވަނަ ބައި ވެސް އެ ސްޓޫޑިއޯ އިން ޖެނުއަރީ މަހު އިއުލާންކޮށްފައިވެ އެވެ. ބެލެވޭ ގޮތުން ދެން އެ ފިލްމުގައި ވެސް ރާޖް އެންޑް ޑީކޭ ހިއްސާވާނެ އެވެ. އެކަމަކު އެ މީހުން އެ ފިލްމު ޑައިރެކްޓްކުރާނެތޯ ނޫންތޯ އަދި ކަށަވަރެއް ނުވެ އެވެ.