މައިކް ޓައިޒަންގެ ޗެރިޓީ މެޗް އެއްވަރު

މީގެ 15 އަހަރު ކުރިން ބޮކްސިން އިން ރިޓަޔާކޮށްފައިވާ "އަޔަން މައިކް" ގެ ނަމުން މަޝްހޫރު ލެޖެންޑް މައިކް ޓައިޒަން ޗެރިޓީއަކަށް ނުކުތް ބޮކްސިން މެޗްގައި ރޯއި ޖޯންސް ޖޫނިއާއާ ވާދަކޮށްގެން މެޗް އެއްވަރުވެގެން ހޮނިހިރު ދުވަހު ނިންމައިލަން ޖެހިއްޖެ އެވެ.

އަހަރުތަކެއް ފަހުން ޓައިޒަން މެޗަކަށް ނުކުންނަކަން އިއުލާންކުރީ މި އަހަރުގެ މެއި މަހުގެ ތެރޭގަ އެވެ. އެއާ އެކު އޭނާގެ ވަރަށް ގިނަ ފޭނުން ދިޔައީ މި މެޗަށް އިންތިޒާރު ކުރަމުންނެވެ.

އެމެރިކާގެ ލޮސް އެންޖެލިސްގެ ސްޓެޕްލް ސެންޓަރުގައި "ފްރޮންޓްލައިން ބެޓްލް" ގެ ނަމުގައި ކުރިއަށް ގެންދިޔަ މެޗްގައި ޖޯންސްއާ ވާދަކޮށް މެޗް އެއްވަރުގެން ނިންމައިލުމުގެ ކުރިން މެޗްގެ އަށް ވަނަ ރައުންޑްގައި މައިކް ވަނީ ޖޯންސަށް 67 ޕަންޗްގެ ސްކޯއަކުން ކުރި ވެސް ހޯދައިފަ އެވެ. އެކަމަކު ތާރީހީ މެޗް އެންމެ ފަހު ވަގުތު ނިންމައިލަން ޖެހުނީ އެއްވަރުވެގެންނެވެ.

މެޗާ ބެހޭ ގޮތުން ޓައިޒަން ބުނީ އެއްވަރު ވިޔަސް މިއީ ހަމަ މެޗަކުން މޮޅުވުން ކަހަލަ ނަތީޖާއެއް ކަމަށާއި މެޗް ޑްރޯއަކަށް ދިއުމުގެ މާނަ އަކީ އަނެއްކާ ވެސް ބޮކްސިން ރިންގަށް އަރަންޖެހުން ކަމަށެވެ.

"އެހެންވީމާ އަދި އެބަޖެހޭ މިކަހަލަ މެޗަކަށް ނުކުންނަން. ހީވަނީ މާ ދުރު ނޫން މުސްތަގުބަލެއްގައި އެކަން ވާނެހެން." ޓައިޒަން ބުންޏެވެ. "ނަތީޖާއާ ދޭތެރޭ އަހަރެން ހަމަ ހިތްހަމަޖެހޭ. ބެލުންތެރިން ވެސް ތިބީ މެޗާ ދޭތެރޭ ހިތްހަމަޖެހިފައި."

ޓައިޒަނާއި ޖޯންސް އަހަރުތަކެއް ފަހުން ބޮކްސިން ރިންގަށް ނުކުތް އިރު ދެ ލެޖެންޑުންނަކީ ވެސް މިހާރު އުމުރުން 50 އަހަރުން މަތީގެ ދެ މީހުންނެވެ. ޓައިޒަންގެ އުމުރަކީ 54 އެވެ. ޖޯންސްގެ އުމުރަކީ 51 އެވެ. ޓައިޒަންއާ އެކު މެޗަކަށް ނުކުތް އިރު 2018 ގެ ފެބްރުއަރީގެ ފަހުން އޭނާ ބޮކްސިން ރިންގަކަށް ނާރަ އެވެ.

ދެހާސް ފަހައެއްގައި ރިޓަޔާކުރުމުގެ ކުރިން ޓައިޒަން ވަނީ 1985-2005 ވަނަ އަހަރާ ހަމައަށް ވަރަށް ކާމިޔާބު ބޮކްސިން ކެރިއަރެއް ބިނާކޮށްފަ އެވެ. ޓައިޒަން ފާހަގަކުރެވެނީ ހެވީވެއިޓް ޗެމްޕިއަންކަން މިހާތަނަށް އެންމެ ޒުވާން އުމުރުގައި އުފުލައިލި ހުނަރުވެރިޔާގެ ގޮތުގަ އެވެ. އޭނާ އެންމެ ފުރަތަމަ ޓައިޓްލް އުފުލައިލީ އުމުރުން 20 އަހަރުގަ އެވެ.

ޓައިޒަނާއި ޖޯންސްގެ މެޗުން ލިބުނު ފައިސާގެ ތެރެއިން ބޮޑު ބައެއް ހަދިޔާކުރާނީ އެކިއެކި ޗެރިޓީތަކަށެވެ. އޭގެ ތެރޭގައި އުރަމަތީގެ ކެންސަރާއި ހިއުމަން ޓްރެފިކިންއާ ދެކޮޅަށް މަސައްކަތްކުރާ ޖަމާއަތްތައް ހިމެނެ އެވެ. މީގެ އިތުރުން ދަ ވޯލްޑް ބޮކްސިން ކައުންސިލް (ޑަބްލިއުބީސީ) ޖޯޒް ސުލައިމާން ބޮކްސާޒް ފަންޑަށް ވެސް އެހީދޭނެ އެވެ.

ޑަބްލިއުބީސީ އާއި ލެޖެންޑްސް އޮންލީ ލީގް ގުޅިގެން އިންތިޒާމުކުރި އިންތިޒާމުކުރި މެޗުން މިލިއަން ޑޮލަރު ލިބުނު ކަމަށް ބައެއް މީޑިއާތަކުން ބުންޏެވެ.