ޑްރަގްގެ ފަރުވާ ނިންމާ މީހުން މުޖުތަމައަށް ގެނައުމަށް ކަލައިދޫގައި މަރުކަޒެއް ގާއިމް ކުރަނީ

މަސްތުވާތަކެތީގެ ޝިކާރައަކަށް ވި ނަމަވެސް އެއިން ސަލާމަތް ވުމަށް ފަރުވާ ހޯދާފައިވާ މީހުން، އަނބުރާ މުޖުތަމައުއަށް ގެނައުމަށް އެކި ކަހަލަ ހުނަރުތައް ދަސްކޮށްދިނުމަށް ލ. ކަލައިދޫގައި މަރުކަޒެއް ގާއިމު ކުރުމަށް ނިންމާފައިވާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ލ. ގަމުގައި ސަރުކާރުން ކުރިއަށް ގެންދިޔަ ބައެއް މަޝްރޫއުތަކާއި ހިދުމަތްތައް ފައްޓަވައިދެއްވުމަށް މިއަދު އެ ރަށަށް ކުރެއްވި ދަތުރުފުޅެއްގައި ވާހަކަފުޅު ދައްކަވަމުން ރައީސް ވިދާޅުވީ، މަސްތުވާތަކެތި ޝިކާރައަކަށްވެ، އާއިލާތަކުގައި އުޅުމުގެ ފުރުސަތު ގެއްލިފައިވާ މީހުން، އަނބުރާ މުޖުތަމައަށް ގެނައުމަށް މަސައްކަތްތަކެއް ކުރަން ޖެހޭ ކަމަށެވެ. އެއީ ވޭތުވެ ދިޔަ އަހަރުތަކުގައި އަޅާ ނުލެވި އޮތް އިޖްތިމާއީ އަދި އިގްތިސޯދީ ބޮޑު މައްސަލައެއް ކަމަށް އެ މަނިކުފާނު ވިދާޅުވި އެވެ.

"މަސްތުވާތަކެތި ބޭނުން ކުރާ މީހުންނަށް ހަމައެކަނި އަދަބު ދީގެންނެއް އެ މައްސަލައެއް ހައްލެއް ނުކުރެވޭނެ. އެހެންވެ، ސަރުކާރުން އަންނަނީ އެ ފަދަ ޒުވާނުން ސަލާމަތްކޮށް، ބިނާކުރަނިވި ބަޔަކަށް ހެދުމަށް މަސައްކަތް ކުރަމުން،" ރައީސް ވިދާޅުވި އެވެ.

ކަލައިދޫގައި މަރުކަޒެއް އަޅަނީ، ސަރުކާރުގެ އެ މަޝްރޫއުގެ ދަށުންނެވެ. އެތަނުގައި އަޅާ މަރުކަޒުގައި، މަސްތުވާތަކެތިން ފަރުވާ ހޯދާފައިވާ ޒުވާނުންނަށް، ތައުލީމާއި ދިރިއުޅުމުގެ ހުނަރުތައް ދަސްކޮށްދޭނެ އެވެ. އަދި އެ މަރުކަޒުން ތަމްރީނުތައް ފުރިހަމަ ކުރާ މީހުންނަށް، އަމިއްލަ މަސައްކަތެއް ފަށައިގަތުމަށް ސަރުކާރުން އެހީ ވެދޭނެ ކަމަށް ރައީސް ވިދާޅުވި އެވެ.

އެ މަނިކުފާނު ވިދާޅުވި ގޮތުގައި މަސްތުވާތަކެތިން ޒުވާނުން ސަލާމަތް ކުރުމަށް ހާއްސަ އެކްޝަން ޕްލޭނެއް ހެދުމުގެ މަސައްކަތް މިހާރު އަންނަނީ ކުރަމުންނެވެ. އޭގެ ދަށުން، ޖަލުގައި މަސްތުވާތަކެތީގެ ނެޓްވޯކްތައް އޮޕަރޭޓް ކުރުން ހުއްޓުވުމާއި މަސްތުވާތަކެތީގެ ވިޔަފާރި ކުރުމުގައި ޓްރާންސިޓް ޕޮއިންޓެއްގެ ގޮތުގައި ރާއްޖެ ބޭނުން ކުރުން ހުއްޓުވުމަށް އިސްކަމެއް ދޭނެ އެވެ އަދި ޑްރަގް އޮފެންޑާސް ރިމާންޑް ސެންޓަރަކާއި ކުޑަކުދިންގެ ރިހިބިލިޓޭޝަން ސެންޓަރެއް ހުޅުމާލޭގައި ހުޅުވަން ނިންމާފައިވާ ކަމަށް ވެސް އެ މަނިކުފާނު ވިދާޅުވި އެވެ.

"މަސްތުވާތަކެތީގެ މައްސަލަތައް އަވަސް ކުރުމަކީ ވެސް އެކްޝަން ޕްލޭންގައި ހިމެނޭ ކަންކަން،" ރައީސް އިތުރުކުރެއްވި އެވެ.

މަސްތުވާތަކެތީގެ ހާލަތު ރާއްޖޭގައި ގޯސްވެފައިވާއިރު، ކޮވިޑް-19އާ ގުޅިގެން ހާލުގައި ޖެހި ގެދޮރު ގެއްލިފައިވާ މީހުން ވަނީ އިތުރުވެފަ އެވެ. އޭގެ ތެރެއިން ގިނަ މީހުންނަކީ، މަސްތުވާތަކެއްޗަށް ދެވިހިފާފައިވާ މީހުންނެވެ. އެ ފަދަ ގިނަ މީހުން އުޅެނީ، މާލޭގެ މަގުތައް މަތީ ނިދައިގެން ޑަސްބިން ހޮވައިގެން ކައިގެންނެވެ.