ކޮރަޕްޝަން ރިޕޯޓިންއާ ގުޅޭ ހާއްސަ ސެޝަނެއް މިރޭ

ކޮރަޕްޝަން ރިޕޯޓު ކުރުމުގައި ނޫސްވެރިންނަށް ދިމާވާ ގޮންޖެހުންތަކާ ގުޅޭ ހާއްސަ ސެޝަނެއް، މޯލްޑިވްސް ޓްރާންސްޕޭރެންސީ އެންޑް އެންޓި-ކޮރަޕްޝަން ކޮންފަރެންސުގައި މިރޭ ކުރިއަށް ގެންދަން ނިންމައިފި އެވެ.

އެންޓި-ކޮރަޕްޝަން ކޮމިޝަން (އޭސީސީ) އާ ގުޅިގެން ޓްރާންސްޕޭރެންސީ މޯލްޑިވްސް (ޓީއެމް) އިން ބާއްވާ މި ކޮންފަރެންސުގެ މި ސެޝަން އިންތިޒާމު ކުރަނީ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިންނެވެ.

މިރޭ 8:30 ގައި ޒޫމް މެދުވެރިކޮށް ބާއްވާ ޕެނަލުގައި ބައިވެރިވެވަޑައިގަންނަވަނީ އިންފޮމޭޝަން ކޮމިޝަނަރު އަދި ރާއްޖެ ޓީވީ އާއި "ހަވީރު" ގައި ކުރިން މަސައްކަތް ކުރެއްވި ހުސެއިން ފިޔާޒް މޫސާ އާއި "މިހާރު" ގެ އެޑިޓަރު މޫސާ ލަތީފާއި އަލް ޖަޒީރާގެ ނޫސްވެރިޔާ ޒަހީނާ ރަޝީދާއި އައްޑޫ ލައިވްގެ ފައުންޑަރު މުހައްމަދު ޝަރަފުއްދީނެވެ. މި ސެޝަން މޮޑަރޭޓްކުރައްވާނީ އެމްޖޭއޭގެ ޖެނެރަލް ސެކްރެޓަރީ އަދި ސަން އޮންލައިނުގެ މެނޭޖިން އެޑިޓަރު އަހުމަދު ނާއިފެވެ.

މި ސެޝަނުގައި ފޯކަސް ކުރާނީ ތަހުގީގީ ނޫސްވެރިކަމުގެ ތެރެއިންނާއި ކްރިޓިކަލް ރިޕޯޓިންގެ ތެރެއިން ކޮރަޕްޝަން ފަޅާއަރުވާލުމަށް ނޫސްވެރިން އަދާކުރާ ދައުރަށެވެ. އަދި ކޮރަޕްޝަން ރިޕޯޓްކުރުމުގައި ރާއްޖޭގައި ނޫސްވެރިންނަށް ދިމާވާ ގޮންޖެހުންތަކަށް ވެސް އަލިއަޅުވާލާނެ އެވެ.

އެމްޖޭއޭގެ އޮފިޝަލަކު ވިދާޅުވިގޮތުގައި، ރާއްޖޭގެ ތަޖުރިބާކާރު ނޫސްވެރިންނާއި އެޑިޓަރުންގެ ޕެނަލެއް ބައިވެރިވާ މިއީ ވަރަށް ޝައުގުވެރި އަދި މައުލޫއުގެ ފުންމިނަށް ވާސިލްވެވޭނެ ސެޝަނަކަށް ވާނެ އެވެ.

ރާއްޖެ އަށް ޒަމާނީ ޑިމޮކްރަސީ އައުމުގެ ކުރިންނާއި އާ ގާނޫނުގެއަސާސީގެ ދަށުން ލިބުނު ނޫސްވެރިކަމުގެ މިނިވަންކަމާ އެކު، ކޮރަޕްޝަން ރިޕޯޓްކުރުމުގައި ނޫސްވެރިން އަދާކުރި ދައުރާއި އަމިއްލަ ތަޖުރިބާތައް ވެސް ހިއްސާ ކުރާނެ އެވެ. އާއްމުންނަށް ސުވާލުކުރުމުގެ ފުރުސަތު ވެސް މިރޭގެ ސެޝަންގައި އޮންނާނެ އެވެ.

"ކޮރަޕްޝަން ހުއްޓުވުމާއި ފަޅާއެރުވުމުގައި ނޫސްވެރިންގެ ދައުރު ނުހަނު ބޮޑު. އެހެންވެ އެކަމާ ގުޅޭގޮތުން ތަޖުރިބާކާރު ނޫސްވެރިންތަކެއް ދައްކާ ވާހަކަތައް ވެގެންދާނީ އަލަށް ނޫސްވެރިކަމަށް ނުކުންނަ ޒުވާނުންނަށް ވެސް މުހިއްމު ވާހަކަތަކަށް. އަދި އާއްމުންނަށް ވެސް މިއީ ޝައުގުވެރި މުހިއްމު ސެޝަކަށް ވާނެ،" އޭނާ ވިދާޅުވި އެވެ.

މި ސެޝަން ޓްރާންސްޕޭރެންސީ އެމްވީ އާއި އޭސީސީ މޯލްޑިވްސްގެ ފޭސްބުކާއި ޓްވިޓާ ޕޭޖުން ލައިވްކޮށް ފެންނާނެ އެވެ. ސެޝަނުގައި ރަޖިސްޓްރީކޮށްގެން ވެސް ބައިވެރިވެވޭނެ އެވެ.