ގެއްލުވައިލި ނޫސްވެރިޔާ ރިލްވާންގެ އަގު ވަޒަންކޮށްފި

މީގެ ހަ އަހަރު ކުރިން ރަހީނުކޮށް ގެއްލުވައިލި ނޫސްވެރިޔާ އަހުމަދު ރިލްވާންގެ ހިތްވަރާއި ނޫސްވެރިކަމަށް ކޮށްދީފައިވާ ޚިދުމަތުގެ އަގުވަޒަންކޮށް، މޯލްޑިވްސް މީޑިއާ ކައުންސިލް (އެމްއެމްސީ) އިން ހާއްސަ ފިލައެއް ދީފި އެވެ.

ބިރު ދެއްކުންތަކާއި މަރުގެ އިންޒާރުތަކަށް ފަހު ގެއްލުވައިލި މިނިވަން ނޫހުގެ ނޫސްވެރިޔާ ރިލްވާންގެ މަސައްކަތުގެ އަގުވަޒަން މިކުރީ އޭނާ ވަގަށް ނެގިތާ ހަ އަހަރު ފަހުންނެވެ. ހުޅުމާލޭގައި އޭނާ ދިރިއުޅޭ އެޕާޓްމެންޓު ކައިރިން ކާރަކަށް އަރުވައިގެން ގޮސް ކަނޑުމަތީގައި ކަރުބުރިކޮށްލައި މަރައިލީ ކަމަށް މި ސަރުކާރުގެ ރިޔާސީ ކޮމިޝަނުން ނެރުނު ރިޕޯޓުގައިވެ އެވެ.

އެމްއެމްސީން ރޭ ބޭއްވި ނޫސްވެރިކަމުގެ އިނާމު ހަފުލާގައި، ރިލްވާނަށް ޚާއްސަކުރި ފިލައާ ހަވާލުވީ އޭނާގެ ދައްތަ ފާތުމަތު ޝެހެނާޒް އެވެ. މިއީ، ސިޔާސީ އަދި އިޖުތިމާއީ ދާއިރާ އިން ރައްޔިތުންނަށް މައުލޫމާތު ފޯރުކޮށްދީ، ފިއްތުންތަކަށް ފަސްޖެހުމެއް ނެތި ރިލްވާން ކޮށްދިން މަސައްކަތާއި ހިތްވަރު ފާހަގަކޮށް ދިން ފިލައެއް ކަމަށް މޯލްޑިވްސް މީޑިއާ ކައުންސިލުން ބުނެ އެވެ.

ރިލްވާނާ ގުޅޭ ގޮތުން މީޑިއާ ކައުންސިލުން ދެއްކި ވީޑިއޯގައި ވެސް އާއިލާގެ ކަންބޮޑުވުމަކީ ރިލްވާނަށް އިންސާފު ނުލިބި ލަސްވުމެވެ. ކުރީގެ ރައީސް އަބްދުﷲ ޔާމީންގެ ސަރުކާރުން ފެށިގެން އިންސާފު ހޯދަން ޓަކި ނުޖަހާ މުއައްސަސާއެއް ނެތް ކަމުގެ ކަންބޮޑުވުން ފާޅުކުރި އެވެ.

ރިލްވާންގެ މަންމަ އައިމިނަތު އީސާ ބުނިގޮތުގައި ދަރިފުޅާ ބެހޭ އެއްވެސް ވާހަކައެއް ދެއްކުމުގެ ހިތްވަރެއް މިހާރަކު ނެތެވެ. އިންސާފަށް އެދި އާދޭސްކޮށްކޮށް ވަރުބަލިވެއްޖެ ކަމަށް އެ މަންމަ ރޮމުން ބުންޏެވެ.

"ނިކަން ބޮޑު ބައްޔަކަށް ވެސް މިކަން ވެފައި މިހާރު މިވަނީ. އޭނަ ހަނދާންވަނީ އަބަދު. އޭނަ އަށް އެއްވެސް ކަމެއް މި ދުނިޔެމަތީގައި ކުރެވެނީކީއެއް ނޫން،" މަންމަ ބުންޏެވެ.

މަންމަ ބުނިގޮތުގައި ރިލްވާނަށް އެންމެ ކުޑަމިނުން ކަށުނަމާދު ވެސް ނުކުރެވުމަކީ ވަަރަށް ބޮޑު ހިތްދަތިކަމެކެވެ.

އިނާމު ހަފުލާގައި ނޫސްވެރިންނަށް ރައީސް އިބްރާހިމް މުހައްމަދު ސޯލިހް ދެއްވި މެސެޖުގައި ވިދާޅުވީ މިފަދަ ހަފުލާއެއް ފާހަގަކުރާއިރު ރިލްވާނާއި މަރލި ބްލޮގަރު ޔާމީން ރަޝީދުގެ މަތިން ހަނދުމަފުޅު ނުނެތޭ ކަމަށެވެ. ރިލްވާނާއި ޔާމީނަށް އިންސާފު ހޯދައިދޭން ސަރުކާރުން ކުރާ މަސައްކަތް ހުއްޓާނުލާ ކަމަށް ވިދާޅުވި އެވެ.

"އެ މަސައްކަތް ނުހުއްޓި ކުރިއަށް އެބަދޭ،" ރައީސް ވިދާޅުވި އެވެ.

ރިލްވާންގެ މައްސަލައިގެ ތަހުގީގު ރިޕޯޓުގައި މަރު ކޮމިޝަނުން ބުނެފައި ވަނީ ދީނީ ހަރުކަށި ފިކުރުގެ ބަޔަކު ރިލްވާން ވަގަށް ނަގައި، މަރައިލީ ކަމަށެވެ. އެކަމަކު އެ މައްސަލައާ ގުޅިގެން މިހާތަނަށް އެއްވެސް މީހަކަށް ދައުވާ ކުރެވި، ކުށް ސާބިތުވެފައެއް ނުވެ އެވެ.

ރިލްވާން ގަދަކަމުން ފޮރުވި ކަމަށް ބުނެ ޔާމީންގެ ސަރުކާރުގެ ދުވަސްވަރު ދެ މީހަކަށް ޓެރަރިޒަމްގެ ދައުވާ ދައުލަތުން ކުރި އެވެ. އެކަމަކު ތަހުގީގުގައި ހެދިފައި ހުރި ބޮޑެތި ގޯސްތަކަކާ ހެދި، އެ ދައުވާތައް ވެސް ކޯޓުގައި ކާމިޔާބެއް ނުވި އެވެ. މި ވެރިކަމުގައި ވެސް އެ މައްސަލައިގައި ދައުވާކުރަން އެދި މަރު ކޮމިޝަނުން ޕްރޮސިކިއުޓާ ޖެނެރަލްގެ އޮފީހަށް ފޮނުވި އެވެ. އެކަމަކު ތަހުގީގު ފުރިހަމަކުރަން މައްސަލަ ވަނީ އަނބުރާ ފޮނުވާލައިފަ އެވެ.